આજે રાજ્યમાં સાર્વત્રિક વરસાદની આગાહી કરવામાં આવી છે. રાજ્ય પર ત્રણ વરસાદી સિસ્ટમ સક્રિય થઇ છે. લો પ્રેશર અને બે સાયક્લોનીક સર્ક્યૂલેશન સક્રિય થતા ભારે વરસાદની આગાહી કરવામાં આવી છે.
આજે રાજ્યમાં સાર્વત્રિક વરસાદની આગાહી
કેટલાક વિસ્તારોની નદીઓમાં પૂર આવતા સ્થિતિ વણસી
નોંધનીય છે કે,આજે બનાસકાંઠા, પાટણ, મહેસાણા, વલસાડ, દમણમાં વરસાદની આગાહી કરાઇ છે. તો દાદરા નગરહવેલી, સુરેન્દ્રનગર, રાજકોટમાં પણ વરસાદ પડશે. જામનગર, પોરબંદર, જૂનાગઢ, મોરબી, દેવભૂમિ દ્વારકા, ગીર સોમનાથ, કચ્છમાં વરસાદ પડશે.
ભારે વરસાદથી નદીઓમાં ઘોડાપૂર
તો બીજી તરફ છેલ્લા એક દિવસમાં પડેલા ભારે વરસાદથી નદી-નાળા છલકાઇ ગયા છે. ભારે વરસાદથી નદીઓમાં ઘોડાપૂરની સ્થિતિ જોવા મળી છે. તો અનેક જગ્યાએ પાણી ભરાયા છે. ઠેર ઠેર પાણી ભરાતા લોકોને ભારે હાલાકી પડી રહી છે.
રાજ્યના 204 તાલુકામાં વરસાદ વરસ્યો
છેલ્લા એક દિવસની વાત કરીએ તો રાજ્યના 204 તાલુકામાં વરસાદ વરસ્યો છે. જેમાં સૌથી વધારે સુરતના માંગરોળમાં 8 ઇંચ વરસાદ ખાબક્યો છે. જ્યારે કામરેજમાં 6.5 ઇંચ, ઉમરગામમાં 5.5 ઇંચ વરસાદ વરસ્યો છે. સૌરાષ્ટ્ર, મધ્ય અને ઉત્તર ગુજરાતમાં પણ સારો વરસાદ થયો છે.
ડાંગ જિલ્લામાં પણ ધોધમાર વરસાદ
ડાંગ જિલ્લામાં પણ ધોધમાર વરસાદ વરસ્યો છે. ભારે વરસાદથી રસ્તાઓ પાણી પાણી થઇ ગયા છે. ડાંગમાં સતત વરસાદને પગલે ગીરાધોધનું રૌદ્ર સ્વરૂપ જોવા મળી રહ્યું છે. અંબિકા નદી પર આવેલો કુમારબંધ કોઝ-વે પર પાણી ફરી વળ્યા છે. કોઝ-વે પર પાણી ફરી વળતા વાહન વ્યવહારને અસર થઇ છે. આહવામાં 1.12 ઇંચ અને વઘઇમાં 1.72 ઇંચ વરસાદ વરસ્યો છે. તો સુબિરમાં 1.28 ઇંચ અને સાપુતારામાં 1.56 ઇંચ વરસાદ પડ્યો છે.
ગીર સોમનાથમાં ભારે વરસાદ
ગીર સોમનાથમાં ભારે વરસાદના કારણે નદીઓમાં ઘોડાપૂર આવ્યું છે. હીરણ, કપીલા અને સરસ્વતી નદીના પાણી ત્રિવેણી સંગમ પર પહોંચ્યા છે. ત્રણેય નદીઓમાં પૂર આવતા ત્રિવેણી ઘાટ પાણીમાં ગરકાવ થયો છે. તો સરસ્વતી નદીમાં ઘોડાપૂરથી પ્રાચીતીર્થ મંદિર પાણીમાં ગરકાવ થયું છે. જ્યારે ઉપરવાસમાં વરસાદથી માધવરાય મંદિર નદીના પ્રવાહમાં જળમગ્ન થયું છે.
દક્ષિણમાં આફત બન્યો વરસાદ
દક્ષિણમાં આફત બની વરસી રહેલા વરસાદની. એવી આફત કે જેની ક્યારેય લોકોએ કલ્પના પણ નહોતી કરી. છેલ્લા 24 કલાકમાં 12 ઈંચથી પણ વધુ વરસાદ પડતા જળબંબાકારની સ્થિતિ સર્જાઈ છે. ક્યાંક આખા ગામનું રેસ્ક્યું કરવું પડ્યું. તો ક્યાંક લોકો આફત બચવા પોતાના ઘરની છત પર પઢ્યા.