રાજ્યમાં વરસાદી માહોલ સર્જાયો છે ત્યારે હવામાન વિભાગે આગામી 5 દિવસ ભારેથી અતિભારે વરસાદની આગાહી કરી છે. હવામાન વિભાગના જણાવ્યા અનુસાર દક્ષિણ ગુજરાત અને સૌરાષ્ટ્રમાં ભારે વરસાદ પડી શકે છે. જ્યારે અમદાવાદમાં સામાન્ય વરસાદ પડશે.
બંગાળની ખાડીમાં અપર એર સાયક્લોનિક સિસ્ટમ સર્જાઇ હોવાનું હવામાન વિભાગે જણાવ્યું. જેના પગલે રાજ્યભરમાં વરસાદ આવશે તેવી આગાહી કરવામાં આવી છે. આજે વલસાડ, નવસારીમાં ભારેથી અતિભારે વરસાદ પડી શકે છે.
ઉત્તર ગુજરાતમાં ભારે વરસાદની આગાહી
હવામાન વિભાગે ઉત્તર ગુજરાતમાં ભારે વરસાદની આગાહી કરી છે ત્યારે તંત્ર એલર્ટ થઇ ગયું છે. ભારે વરસાદની આગાહીને લઇને અરવલ્લીમાં NDRFની ટીમ તૈના કરવામાં આવી છે. વડોદરાથી 30 સભ્યોની NDRFની ટીમ અરવલ્લી પહોંચી છે. આ સાથે જ અરવલ્લીમાં તમામ અધિકારીઓની રજા પણ રદ્દ કરવામાં આવી છે.
વલસાડમાં મેઘમહેર યથાવત....
વલસાડ જિલ્લાના તમામ તાલુકાઓમાં વરસાદ મન મૂકીને વરસી રહ્યો છે. જિલ્લાના ઉપરવાસ એવા કપરાડા, ધરમપુર તાલુકામાં ગતરોજ સૌથી વધુ વરસાદ નોંધાયો છે. ઉપરવાસમાં પડેલા ભારે વરસાદના કારણે મધુવન ડેમમાં પાણીની આવક યથાવત રહી છે. મધુવન ડેમના દરવાજા ખોલી 16 હજાર ક્યુસેક પાણી છોડવામાં આવતાં વાપી પાસે આવેલો વિયર ફરી એકવાર ઓવરફલો થયો છે.
નવસારીમાં ધોધમાર વરસાદ પડયો
નવસારીમાં રાત દરમિયાન ધોધમાર વરસાદ વરસ્યો હતો. ભારે વરસાદના કારણે પૂર્ણા, અંબિકા અને કાવેરી નદીના જળસ્તરમાં વધારો થયો છે. ડાંગના વધઇમાં સાડા ચાર ઇંચ, ચીખલીમાં અઢી ઇંચ, વાંસદા અને ખેરગામમાં દોઢ ઇંચ વરસાદ નોંધાયો છે.
છેલ્લા 24 કલાકમાં તાપી જિલ્લાના તમામ તાલુકામાં વરસાદ
તાપી જિલ્લામાં છેલ્લા 24 કલાકમાં તમામ તાલુકામાં વરસાદ વરસ્યો છે. ભારે વરસાદના કારણે અનેક નીચાણવાળા વિસ્તારોમાં પાણી ભરાયાં છે. ભારે વરસાદને પગલે ઉકાઇ ડેમમાં પાણીની આવક જોવા મળી છે. હાલમાં ઉકાઇ ડેમમાં 600 ક્યુસેક પાણીની આવક થઇ છે. જેના કારણે ડેમની જળસપાટી વધીને 280 ફૂટે પહોંચી છે.
ડાંગમાં સાર્વત્રિક વરસાદથી મનમોહક કુદરતી દ્રશ્યોનો નજારો
ડાંગ જિલ્લામાં સાર્વત્રિક વરસાદ નોંધાયો છે. ત્યારે વરસાદ વચ્ચે મનમોહક કુદરતી દ્રશ્યોનો નજારો જોવા મળ્યો છે. ગુજરાતના ચેરાપુંજી ગણાતાં ડાંગમાં વરસાદી માહોલમાંથી રમણીય વાતાવરણ જોવા મળ્યું છે. પહાડ પરથી ધોધ સ્વરૂપે પડતા પાણીના નજારા લોકોનું મનમોહી રહ્યાં છે. ત્યારે સહેલાણીઓ આ વાતાવરણની ખુબ મજા માણી રહ્યા છે.