ઉનાળો / હજુ તપશે ગુજરાત, ગરમીથી કંટાળેલા લોકો માટે માઠા સમાચાર

જયંત સરકારે જણાવ્યું કે સામાન્ય રીતે ગુજરાતમાં 15 જૂન પછી ચોમાસાની શરૂઆત થતી હોય છે, પણ આ વર્ષે ચોમાસું થોડું મોડું શરૂ થશે. હવામાન વિભાગનું માનીએ તો કેરળમાં ચોમાસાના આગમનની તૈયારીઓ થઈ રહી છે. તો ગુજરાત વાસીઓને 5 દિવસ બાદ તાપમાનમાં ઘટાડો થઈ શકે છે.

તમને જણાવી દઇએ કે, દેશભરમાં ભીષણ ગરમીના કારણે લોકો પરેશાન છે. અંગ દઝાડતી ગરમીના કારણે દેશભરમાં 32 લોકોના મોત નિપજ્યા છે જેમાં બે લોકો ગુજરાતના છે. ત્યારે છેલ્લા 24 કલાક દરમિયાન રેકોર્ડ કરવામાં આવેલા વિશ્વના 15 સૌથી ગરમ શહેરોમાં 10 ભારતના જ છે.

રાજસ્થાનના ચુરુનો પારો સૌથી વધુ 50 ડિગ્રી સેલ્સિયસ રેકોર્ડ થયો છે. જ્યારે બીકાનેરમાં 48.5 ડિગ્રી, ફલોદી-જોધપુરમાં 48.2 ડિગ્રી, જૈસલમેરમાં 47.8 ડિગ્રી, નૈગાંવમાં 47.7 ડિગ્રી, કોટા એરોડ્રામમાં 47.5 ડિગ્રી તાપમાન નોંધાયું છે. જ્યારે બાડમેર અને નરૈનલમાં 47.2 ડિગ્રી અને 47.6 ડિગ્રી તાપમાન નોંધાયું છે. જ્યારે શ્રી ગંગાનગરમાં ગરમીનો પારો 48.8 ડિગ્રીએ પહોંચ્યો છે. 

રાજસ્થાનમાં કેટલીક જગ્યાએ લૂના કારણે રેડ એલર્ટ જાહેર કરવામાં આવ્યું છે. તો ચૂરુમાં ગરમીને જોતા સ્થાનિક વહીવટતંત્ર એ લૂની ચેતવણી આપી છે. સરકારી દવાખાનાઓને ઈમરજન્સી વોર્ડમાં એરકન્ડીશનર, કુલર્સ, દવાઓ સાથે તૈયાર રહેવા માટે કહેવામાં આવ્યું છે. રસ્તાઓ પર પાણી પણ નાખવામાં આવી રહ્યું છે. 

જ્યારે મધ્યપ્રદેશમાં પણ ગરમીના કારણે લોકો પરેશાન છે. મધ્યપ્રદેશની રાજધાની ભોપાલમાં તાપમાન 45.3 ડિગ્રી રહ્યું જે સિઝનનો સૌથી ગરમ દિવસ હતો. અને મધ્ય પ્રદેશમાં પણ અગામી 24 કલાક સુધીમાં રેડ એલર્ટ જાહેર કરવામાં આવ્યું છે. 25 જિલ્લામાં લૂની ચેતવણી આપવામાં આવી.