મહારાષ્ટ્ર બાદ હવે ગુજરાત પર કોરોનાનું સંક્રમણ વધવાનો ખતરો મંડરાઇ રહ્યો છે ત્યારે ગત 24 કલાકમાં ગુજરાતમાં કોરોનાના નવા 424 કેસ નોંધાયા છે.
ગુજરાતમાં કોરોનાએ ફરીવાર ચિંતા વધારી
24 કલાકમાં 424 નવા કેસ સાથે 301 દર્દી થયાં સાજા
કુલ 8,19,801 લોકોને વેક્સિનનો પ્રથમ ડોઝ અપાયો
રાજ્ય સરકાર દ્વારા જાહેર કરાયેલ વિગત પ્રમાણે, 24 કલાકમાં 301 દર્દીઓ સાજા થયાં. કોરોનાને કારણે અમદાવાદમાં 1 દર્દીનું સારવાર દરમિયાન મોત થયું હોવાનું સામે આવ્યું છે. તો હાલ 35 લોકો વેન્ટિલેટર પર છે.
અત્યાર સુધીમાં 4408 લોકોના સારવાર દરમિયાન મોત
અત્યાર સુધીમાં 2,62,172 દર્દીઓએ કોરોનાને મ્હાત આપી છે અને રાજ્યમાં 4408 લોકોના સારવાર દરમિયાન મોત થયાં છે. જો કે, વેક્સિનેશન અભિયાન પુરજોશમાં ચાલી રહ્યું છે અને રાજ્યમાં હવે માત્ર 1991 એક્ટિવ કેસ છે. રિકવરી રેટ વધીને વધીને 97.62 ટકા થયો.
કુલ 8,19,801 લોકોને વેક્સિનનો પ્રથમ ડોઝ અપાયો
વેક્સિનેસન કાર્યક્રમ અંતર્ગત અત્યાર સુધીમાં કુલ 8,19,801 લોકોને વેક્સિનનો પ્રથમ ડોઝ આપવામાં આવ્યો છે. તો અત્યાર સુધીમાં 1,15,338 લોકોને કોરોનાની રસીનો બીજો ડોઝ આપવામાં આવ્યો છે.
મહાનગરોમાં ફરીવાર ચિંતા વધી
24 કલાકમાં અમદાવાદમાં શહેરમાં કોરોનાના 71 તથા ગ્રામ્યમાં 4, સુરત શહેરમાં 79 તથા ગ્રામ્યમાં 8, વડોદરા શહેરમાં 79 તથા ગ્રામ્યમાં 10, રાજકોટમાં 54 તથા ગ્રામ્યમાં 9 નવા કેસ નોંધાયા છે. મહાનગરોમાં ધીમે-ધીમે વધી રહેલા કેસના કારણે ફરીવાર ચિંતામાં વધારો કર્યો છે.
મહાનગરપાલિકાની ચૂંટણી પૂર્ણ થતા જ શહેરોમાં કોરોનાના કેસ વધ્યા
ગુજરાતમાં 6 મહાનગરપાલિકા અમદાવાદ, રાજકોટ, સુરત, વડોદરા, જામનગર અને ભાવનગરની 21 ફેબ્રુઆરીએ ચૂંટણી યોજાઇ હતી. આ ચૂંટણી પહેલા જ કોરોનાના કેસમાં ઘટાડો આવ્યો હતો. જોકે નેતાઓની સભામાં અને પ્રચારમાં સોશિયલ ડિસ્ટન્સનો ભંગ થયો, ભીડ ભેગી કરી અને હવે શહેરોમાં કોરોનાના કેસમાં વધારો થઇ રહ્યો છે.
કોરોનાની નવી પેટર્નને લઈ ડૉ.વસંત પટેલે વ્યક્ત કરી ચિંતા
ડૉ.વસંત પટેલે જણાવ્યું હતું કે, મહારાષ્ટ્રની જેમ ગુજરાતમાં પણ કેસ વધી શકે છે. આફ્રિકા-બ્રાઝિલનો નવો સ્ટ્રેન ખતરનાક છે. ચૂંટણીના પર્વ દરમિયાન લોકોને ડૉ.વસંતે અપીલ કરી છે. ચૂંટણીમાં કાર્યકર્તાઓએ નિયમોનો ભંગ કરતા દેખાયા છે. લોકો કોવિડ ગાઇડલાઇનનું પાલન કરે તેવી અપીલ કરી.
અમદાવાદમાં કોરોના ડોમ ફરી શરૂ કરવામાં આવ્યા
અમદાવાદમાં કોરોનાનું સંક્રમણ વધતા AMC હરકતમાં આવ્યું છે. અમદાવાદ શહેરમાં કોરોના ડોમ ફરી શરૂ કરવામાં આવ્યા છે. પબ્લિક પ્લેસ પર ફરી ટેસ્ટિંગ ડોમ શરૂ કરાયા છે. અમદાવાદમાં કોરોના એક્ટિવ કેસની સંખ્યા 210 છે. ટેસ્ટિંગ ડોમ પર કોરોના રેપિડ ટેસ્ટ લોકો કરાવી રહ્યાં છે.