મહારાષ્ટ્ર બાદ હવે ગુજરાત પર કોરોનાનું સંક્રમણ વધવાનો ખતરો મંડરાઇ રહ્યો છે ત્યારે ગત 24 કલાકમાં ગુજરાતમાં કોરોનાના નવા 380 કેસ નોંધાયા છે.
ગુજરાતમાં ફરીવાર કોરોનાના કેસમાં ઉછાળો
24 કલાકમાં 380 નવા કેસ સાથે 296 દર્દીઓ સાજા થયાં
અત્યાર સુધીમાં 4407 લોકોના સારવાર દરમિયાન મોત
રાજ્ય સરકાર દ્વારા જાહેર કરાયેલ વિગત પ્રમાણે, 24 કલાકમાં 296 દર્દીઓ સાજા થયાં. કોરોનાને કારણે અમદાવાદમાં 1 દર્દીનું સારવાર દરમિયાન મોત થયું હોવાનું સામે આવ્યું છે. તો હાલ 33 લોકો વેન્ટિલેટર પર છે.
અત્યાર સુધીમાં 4407 લોકોના સારવાર દરમિયાન મોત
અત્યાર સુધીમાં 2,61,871 દર્દીઓએ કોરોનાને મ્હાત આપી છે અને રાજ્યમાં 4407 લોકોના સારવાર દરમિયાન મોત થયાં છે. જો કે, વેક્સિનેશન અભિયાન પુરજોશમાં ચાલી રહ્યું છે અને રાજ્યમાં હવે માત્ર 1869 એક્ટિવ કેસ છે. રિકવરી રેટ વધીને વધીને 97.66 ટકા થયો.
24 કલાકમાં 74,457 દર્દીઓને વેક્સિન અપાઇ
વેક્સિનેસન કાર્યક્રમ અંતર્ગત ગત 24 કલાકમાં 74,457 દર્દીઓને વેક્સિન આપવામાં આવી છે અને અત્યાર સુધીમાં કુલ 8,16,238 લોકોને વેક્સિનનો પ્રથમ ડોઝ આપવામાં આવ્યો છે.
અમદાવાદમાં ફરીવાર ચિંતા વધી
24 કલાકમાં અમદાવાદમાં શહેરમાં કોરોનાના 81 કેસ તથા ગ્રામ્યમાં 1 કેસ નોંધાયો છે. ધીમે-ધીમે વધી રહેલા કેસના કારણે ફરીવાર ચિંતામાં વધારો કર્યો છે.
મહાનગરપાલિકાની ચૂંટણી પૂર્ણ થતા જ શહેરોમાં કોરોનાના કેસ વધ્યા
ગુજરાતમાં 6 મહાનગરપાલિકા અમદાવાદ, રાજકોટ, સુરત, વડોદરા, જામનગર અને ભાવનગરની 21 ફેબ્રુઆરીએ ચૂંટણી યોજાઇ હતી. આ ચૂંટણી પહેલા જ કોરોનાના કેસમાં ઘટાડો આવ્યો હતો. જોકે નેતાઓની સભામાં અને પ્રચારમાં સોશિયલ ડિસ્ટન્સનો ભંગ થયો, ભીડ ભેગી કરી અને હવે શહેરોમાં કોરોનાના કેસમાં વધારો થઇ રહ્યો છે.
કોરોનાની નવી પેટર્નને લઈ ડૉ.વસંત પટેલે વ્યક્ત કરી ચિંતા
ડૉ.વસંત પટેલે જણાવ્યું હતું કે, મહારાષ્ટ્રની જેમ ગુજરાતમાં પણ કેસ વધી શકે છે. આફ્રિકા-બ્રાઝિલનો નવો સ્ટ્રેન ખતરનાક છે. ચૂંટણીના પર્વ દરમિયાન લોકોને ડૉ.વસંતે અપીલ કરી છે. ચૂંટણીમાં કાર્યકર્તાઓએ નિયમોનો ભંગ કરતા દેખાયા છે. લોકો કોવિડ ગાઇડલાઇનનું પાલન કરે તેવી અપીલ કરી.
અમદાવાદમાં કોરોના ડોમ ફરી શરૂ કરવામાં આવ્યા
અમદાવાદમાં કોરોનાનું સંક્રમણ વધતા AMC હરકતમાં આવ્યું છે. અમદાવાદ શહેરમાં કોરોના ડોમ ફરી શરૂ કરવામાં આવ્યા છે. પબ્લિક પ્લેસ પર ફરી ટેસ્ટિંગ ડોમ શરૂ કરાયા છે. અમદાવાદમાં કોરોના એક્ટિવ કેસની સંખ્યા 210 છે. ટેસ્ટિંગ ડોમ પર કોરોના રેપિડ ટેસ્ટ લોકો કરાવી રહ્યાં છે.