22 ડિસેમ્બર 2020ના રોજ ગુજરાતમાં કોરોના વાયરસ સંક્રમણના 988 નવા કોરોનાના કેસ નોંધાયા છે. તેથી છેલ્લા થોડા દિવસોથી કોરોનાના કેસ ઘટતા જોવા મળી રહ્યા છે જે રાહતના સમાચાર છે. જોકે, રાજ્યમાં કોરોનાના થતા ટેસ્ટની સંખ્યા પણ ઘટી છે. દરરોજના મુકાબલે 10 હજારથી વધુ ટેસ્ટ ઘટાડી દેવામાં આવ્યા છે. તો બીજી તરફ સાજા થવાનો દર 93 ટકાને પાર પહોંચ્યો છે.
988 નવા કોરોનાના કેસ નોંધાયા
કુલ આંકડો 2,37,247 પર પહોંચ્યો
1209 દર્દીઓ સાજા થયા અને 7 દર્દીઓના મોત
પ્રેસનોટ અનુસાર, ગત 24 કલાક દરમિયાન કોરોનાના 988 નવા કેસ સામે આવ્યા છે. જેથી ગુજરાતમાં અત્યાર સુધીમાં 2,37,247 દર્દીઓ નોંધાઇ ચૂક્યા છે. રાજ્યમાં કોરોનાથી સાજા થવાનો દર 93.41 ટકા થયો છે. તો ગુજરાતમાં આજે 54,587 ટેસ્ટ કરવામાં આવ્યા છે. જેથી અત્યાર સુધીમાં કુલ 91,62,980 ટેસ્ટ કરવામાં આવ્યા છે. જોકે પહેલા કરતા કોરોનાના ટેસ્ટની સંખ્યા ઘટાડી દેવામાં આવી છે.
રાજ્યના સ્વાસ્થ્ય વિભાગ દ્વારા જાહેર કરવામાં આવેલી માહિતી અનુસાર, રાજ્યમાં આજે 1209 સાજા થયાં અને અત્યાર સુધીમાં કુલ 2,21,602 દર્દીઓ સાજા થયાં છે. આજે કોવિડ-19થી 7 દર્દીઓના મોત થવા પર રાજ્યમાં કોરોનાથી મૃત્યુ પામનારાઓની સંખ્યા વધીને 4248 થઇ ગઇ છે. તો હાલ 11,397 એક્ટિવ કેસ છે. જેમાંથી 64 દર્દીઓ વેન્ટિલેટર પર છે.
અમદાવાદમાં સૌથી વધુ મોતનો સિલસિલો યથાવત્
રાજ્યમાં આજે અમદાવાદમાં 5, સુરતમાં 1 અને બોટાદમાં 1 સાથે 24 કલાક દરમિયાન કુલ 7 લોકોના કોરોનાથી મોત થયા છે. ત્યારે છેલ્લા કેટલાક મહિનાઓથી સૌથી વધુ દર્દીઓના અમદાવાદમાં મૃત્યુ થઇ રહ્યા છે.
રાજ્યમાં આજે અમદાવાદ શહેરમાં 201-ગ્રામ્યમાં 8 કેસ, સુરત શહેરમાં 128-ગ્રામ્યમાં 32 કેસ, વડોદરા શહેરમાં 104-ગ્રામ્યમાં 33 કેસ, રાજકોટ શહેરમાં 102-ગ્રામ્યમાં 31 કેસ અને મહેસાણામાં આજે 35 કેસ નોંધાયા છે. જ્યારે ડાંગમાં એક પણ કેસ નથી નોંધાયો.
આજે બ્રિટનથી ભારત પરત ફરેલા મુસાફરોમાં 7 કોરોના પોઝિટિવ આવ્યા હતા
બ્રિટનમાં કોરોનાનો શરૂ થયેલો નવો સ્ટ્રેઇન માત્ર બ્રિટન સુધી સિમિત નથી રહ્યો. બ્રિટન સહિત ડેનમાર્ક, નેધરલેન્ડ, ઓસ્ટ્રેલિયા અને ઈટલીમાં નવા સ્ટ્રેનનો ફેલાવો થયો છે. ત્યારે બ્રિટનમાં કોરોનાના નવા સ્ટ્રેનને લઈ અમદાવાદમાં ફફડાટ જોવા મળ્યો છે. બ્રિટનથી દિલ્હીની ફ્લાઈટમાં આવેલા 5 મુસાફર પોઝિટિવ આવ્યા હતા. આ 5 પોઝિટિવ મુસાફરોના સેમ્પલ તપાસ માટે NCDC મોકલાયા છે. UKથી કોલકાતા આવેલા 2 મુસાફરના રિપોર્ટ પણ પોઝિટિવ આવ્યા છે. UKમાં ફેલાયેલા કોરોનાના નવા પ્રકાર અંગે હજુ ખુલાસો થયો નથી. રિપોર્ટની તપાસ બાદ નવા પ્રકાર અંગે ખુલાસો થઇ શકશે.
રાજ્યમાં આજે જિલ્લાવાર નોંધાયેલા કોરોનાના કેસની વિગત