અમદાવાદઃ લાલજી પટેલને હાઇકોર્ટ તરફથી મોટી રાહત અપાઇ છે. પાટીદાર આંદોલન સમયે વિસનગરના ધારાસભ્યની ઓફિસમાં તોડફોડ મામલે થયેલી સજા પર હાઇકોર્ટે લાલજી પટેલને સ્ટે આપી દિધો છે. વિસનગર કોર્ટે તોડફોડના ગુનામાં બે વર્ષની સજા ફટકારી હતી. આ ચુકાદાને લાલજી પટેલ અને એ.કે. પટેલે હાઇકોર્ટમાં પડકાર્યો હતો. જેમાં બન્નેને રાહત આપવામાં આવી છે.
હાર્દિક પટેલની સજા પર પણ હાઇકોર્ટે લગાવ્યો હતો સ્ટે
મહત્વનું છે કે પાટીદાર દ્વારા અનામત આંદોલન દરમિયાન વિસનગરમાં ધારાસભ્ય ઋષિકેશની ઓફિસમાં તોડફોડ મામલે કોર્ટે ચૂકાદો આપતા હાર્દિક પટેલ લાલજી પટેલ અને એ.કે.પટેલને દોષિત જાહેર કર્યા હતા. ત્યારે આ અગાઉ વિસનગર કેસમાં હાર્દિક પટેલને થોડી રાહતના મળી હતી. વિસનગર કોર્ટે હાર્દિકની અરજી ગ્રાહ્ય રાખી હતી. હાર્દિક પટેલની સજાના આદેશ પર હાઇકોર્ટે સ્ટે ઓર્ડર લગાવ્યો હતો.
શું છે સમગ્ર મામલો...?
પાટીદાર અનામત આંદોલન દરમિયાન વિસનગરમાં રેલી દરમિયાન ધારાસભ્ય ઋષિકેશ પટેલની ઓફિસમાં તોડફોડ મામલે વિસનગર કોર્ટ ચુકાદો આપ્યો હતો. કોર્ટે હાર્દિક પટેલ લાલજી પટેલ અને એ.કે.પટેલને આ કેસમાં દોષિત જાહેર કર્યા હતા. આ કેસમાં કોર્ટે ત્રણેય આરોપીઓને બે-બે વર્ષની સજા ફટકારી હતી. સાથે 40 હજાર વળતર ચુકવવાનો આદેશ કર્યો હતો. હાર્દિક લાલજી અને એ.કે.પટેલને રાયોટિંગના ગુના હેઠળ દોષિત જાહેર કરવામાં આવ્યા હતા. જો કે ધારાસભ્યની ઓફિસમાં તોડફોડ મામલે હાર્દિક પટેલ સહિત ત્રણેયના જામીન મંજૂર કરાયા હતા.