ગજબ / લે આલે! સરપંચ પદના ઉમેદવાર પતિ હારી જતાં પત્ની ચક્કર ખાઈને પડ્યા, જાણો કેટલા મતે હાર્યા

• નાંદોદના ચિત્રાવાડીમાં વિચિત્ર ઘટના
• સરપંચની હાર થતા પત્નીની તબિયત લથડી
• ચક્કર ખાઈને ઢળી પડ્યા સરપંચના પત્ની

ગુજરાતનાં તમામ કેન્દ્રો પર મતગણતરીની પ્રક્રિયા શરૂ કરવામાં આવી, પોલીસનો ચાંપતો બંદોબસ્ત ગોઠવાયો છે અને રાજ્યની 8 હજારથી વધુ ગ્રામપંચાયતોના સરપંચ અને સભ્યોનું આજે ભાવિ નક્કી થવાનું છે ત્યારે નર્મદા જિલ્લાના ચિત્રાવાડીમાં ચોંકી જવાય તેવી ઘટના બની હતી. 

પતિ હારી જતાં પત્નીને આવી ગયા ચક્કર 

ચિત્રાવાડી ગ્રામ પંચાયત પદના ઉમેદવાર વાસુદેવ વસાવાની હાર થતાં પત્નીની તબિયત લથડી હતી. તેઓ મતદાન કેન્દ્રની બહાર જ અચાનક ચક્કર ખાઈને ઢળી પડતા થોડો સમય અફરાતફરી મચી હતી અને સ્થાનિક ટેકેદારો દ્વારા ઉમદવારના પત્નીને તાત્કાલિક અસરથી દવાખાને સારવાર અર્થે ખસેડવામાં આવ્યા હતા. નોંધનીય છે કે, સરપંચ પદના ઉમેદવાર વાસુદેવ વસાવા માત્ર 10 મતથી હારી ગયા હતા. 

કયા ઝોનમાં કેટલું થયું છે મતદાન?

રાજ્યમાં 8,684  ગ્રામ પંચાયતોની ચૂંટણીઓનું  પરિણામ 21 ડિસેમ્બરે જાહેર થનાર છે. ત્યારે જો રાજ્યમાં સરેરાશ જો મતદાનની ટકાવારીની વાત કરવામાં આવે તો રાજ્યમાં કુલ 74.70 ટકા જેટલું સરેરાશ મતદાન થયું છે. જેમાં સૌથી વધુ ઉત્તર ગુજરાતમાં સરેરાશ 75.1 ટકા મતદાન છે. દક્ષિણ ગુજરાતમાં 57 ટકા મતદાન થયું છે, તો સૌરાષ્ટ્રમાં સરેરાશ 70 ટકા જયારે કચ્છમાં 73.98 ટકા મતદાન જ્યારે મધ્ય ગુજરાતમાં 58 ટકા મતદાન થયું છે. સરપંચ પદ માટે 27 હજાર 200 ઉમેદવારો અને 53 હજાર 507 સભ્ય પદ માટે 1 લાખ 19 હજાર 998 ઉમેદવારોનું ભાવી મતપેટીમાં સીલ છે.જ્યારે 1167 ગ્રામ પંચાયતો સંપૂર્ણ રીતે બિનહરીફ જાહેર કરવામાં આવી છે. 

અમદાવાદ જિલ્લામાં ખાસ વ્યવસ્થા

અમદાવાદ જિલ્લા ગ્રામ પંચાયત માટે સવારે 9 વાગ્યાથી 362 ગ્રામ પંચાયત માટે મત ગણતરી શરૂ થશે. જેમાં એક પછી એક વોર્ડની ચૂંટણીની મત ગણતરી હાથ ધરવામાં આવશે. જેમાં 78 ચૂંટણી અધિકારીઓ અને મદદનીશ 78 ચૂંટણી અધિકારીઓ મત ગણતરીમાં હાજર રહેશે.અમદાવાદ જિલ્લાના 9 તાલુકા મથકે ચૂંટણીની મત ગણતરી હાથ ધરવામાં આવશે.જિલ્લાના મતગણતરી માટે 68 જેટલા હૉલ રાખવામા આવ્યા છે જેમાં મતગણતરી હાથ ધરવામાં આવશે.મત ગણતરી 141 ટેબલ પર કરવામાં આવશે સાથે સાથે મતગણતરી માટે 534 સ્ટાફ ખડેપગે તૈનાત રાખવામાં આવ્યા છે. ઉપરાંત 833 પોલીસ સ્ટાફની  નિગરાની હેઠળ યોજાશે.

ક્યાંથી જોવા મળશે LIVE અપડેટ્સ 

ગ્રામ પંચાયતની ચૂંટણીનું LIVE અપડેટ્સ VTV ન્યૂઝ તથા sec-poll.gujarat.gov.in વેબસાઈટ પર મળી રહેશે.