ગાંધીનગર / ગુજરાત સરકારનો મોટો નિર્ણયઃ 3 શહેરમાં 4 ટીપી સ્કીમને મંજૂરી, અમદાવાદમાં 7100 EWS આવાસ બનશે

• અમદાવાદમાં બે સ્કીમમાં ૭૧૦૦ EWS આવાસો બનશે
• અમદાવાદમાં કુલ ૧ર.૧૦ હેક્ટર્સ જમીન પ્રાપ્ત થશે
• સુરતની પ્રારંભિક ટી.પી-૪૦ ડિંડોલીને મંજૂરી

અમદાવાદ, સુરત અને જૂનાગઢ શહેરની ચાર ટાઉન પ્લાનિંગ સ્કીમ પર મુખ્યમંત્રી ભૂપેન્દ્ર પટેલે મંજૂરીની મહોર લગાવી છે. જેને લઈને આ શહેરોનો વિકાસ આગામી સમયમાં સોળે કળાએ ખીલશે.અમદાવાદની એક પ્રિલિમિનરી ટીપી સ્કિમ નં. ૮૦ (વટવા-૬)-એક ડ્રાફ્ટ ટીપી સ્કિમ નં. ૪૨૬ (કઠવાડા) અને જુનાગઢની એક ડ્રાફ્ટ ટીપી સ્કિમ નં. ૧૦(શાપુર)ને તથા સુરતની પ્રારંભિક ટી.પી-૪૦ ડિંડોલીને મુખ્યમંત્રીએ મંજૂરી આપી છે.

અમદાવાદમાં આશરે ૭૧૦૦ જેટલા આવાસો બનશે
મુખ્યમંત્રી ભૂપેન્દ્ર પટેલે અમદાવાદની મંજુર કરેલી બે ટીપી સ્કીમમાં અમદાવાદ મહાનગરપાલિકાની પ્રિલિમિનરી ટીપી સ્કિમ નં. ૮૦ (વટવા-૬) અને ઔડા અંતર્ગત ડ્રાફટ ટીપી સ્કીમ નં. ૪૨૬ (કઠવાડા) તેમજ એક ડ્રાફ્ટ ટીપી સ્કીમમાં જુનાગઢ શહેરી વિકાસ સત્તામંડળની ટીપી સ્કીમ નં. ૧૦ (શાપુર)નો સમાવેશ થાય છે. અમદાવાદ મ્યુનિસિપલ કોર્પોરેશનની પ્રીલીમનરી TP સ્કીમ નં. ૮૦ (વટવા -૬) માં સામાજીક અને આર્થિક રીતે નબળા વર્ગના લોકોના રહેઠાણ માટે આશરે ૪.૨૬ હેકટર્સ જમીન મળતાં આશરે ૩૮૦૦ જેટલા આવાસો બનશે. ખુલ્લી જગ્યા/બાગ- બગીચા તથા રમત-ગમતના મેદાન માટે ૨.૭૩ હેકટર્સ, જાહેર સુવિધા માટે ૫.૭૬ હેકટર્સ તથા આંતર માળખાકીય સવલતોના ખર્ચને પહોંચી વળવા વેચાણ માટે આશરે ૬.૩૬ હેક્ટર્સ જમીન મળી કુલ આશરે ૧૯.૧૩ હેકટર્સ જમીન સંપ્રાપ્ત થશે.

અમદાવાદમાં આશરે ૧૧.૮૧ હેકટર્સ જમીન પ્રાપ્ત થશે
અમદાવાદ શહેરી વિકાસ સત્તામંડળની ડ્રાફટ TP સ્કીમ નં. ૪૨૬ (કઠવાડા) માં સામાજીક અને આર્થિક રીતે નબળા વર્ગના લોકોના રહેઠાણ માટે આશરે ૩.૬૯ હેકટર્સ જમીન મળતા આશરે ૩૩૦૦ જેટલા આવાસો બનાવી શકાશે. ખુલ્લી જગ્યા/બાગ-બગીચા તથા રમત-ગમતના મેદાન માટે ૦.૯૪ હેકટર્સ, જાહેર સુવિધા માટે ૦.૯૨ હેકટર્સ તથા આંતર માળખાકીય સવલતોના ખર્ચને પહોંચી વળવા વેચાણ માટે આશરે ૫.૭૪ હેકટર્સ જમીન મળી કુલ આશરે ૧૧.૮૧ હેકટર્સ જમીન પ્રાપ્ત થશે. અમદાવાદની બેય ટી.પી માં કુલ ૭૧૦૦ જેટલા EWS આવાસોનું જરૂરતમંદ પરિવારો માટે નિર્માણ થશે. એટલું જ નહિ, આંતરમાળખાકીય સવલતોના ખર્ચને પહોચી વળવા વેચાણ માટે આ બે સ્કીમની મળીને કુલ ૧ર.૧૦ હેક્ટર્સ જમીન ઉપલબ્ધ થશે.

સુરતમાં ર૧૦૦ અને જુનાગઢ ૬૦૦૦ જેટલા આવાસો બનશે
મુખ્યમંત્રીએ મંજૂર કરેલી સુરત મહાનગરપાલિકાની પ્રારંભિક ટી.પી સ્કીમ ૪૦ ડિંડોલીને પરિણામે આશરે ર.૪૦ હેક્ટર્સ જમીન સંપ્રાપ્ત થશે. આ જમીન પર ર૧૦૦ EWS આવાસો બની શકશે. સુરતની આ પ્રારંભિક ટી.પી સ્કીમમાં ખુલ્લી જગ્યા, બાગ-બગીચા તથા રમત-ગમતના મેદાન માટે ૦.૬૮ હેક્ટર્સ, જાહેર સુવિધા માટે ૭.૪ર હેક્ટર્સ અને આંતરમાળખાકીય સવલતોના ખર્ચને પહોચી વળવા વેચાણ માટે અંદાજે ૧.૯૯ હેક્ટર્સ જમીન સાથે આ પ્રારંભિક ટી.પી માં કુલ મળીને આશરે ૧ર.પ૧ હેક્ટર્સ જમીન સંપ્રાપ્ત થશે. જુનાગઢ શહેરી વિકાસ સત્તામંડળની ડ્રાફટ TP સ્કીમ નં. ૧૦ (શાપુર)માં સામાજીક અને આર્થિક રીતે નબળા વર્ગના લોકોના રહેઠાણ માટે આશરે ૬.૭૫ હેકટર્સ જમીન મળતા આશરે ૬૦૦૦ જેટલા આવાસો બનાવી શકાશે. ખુલ્લી જગ્યા/બાગ-બગીચા તથા રમત-ગમતના મેદાન માટે ૭.૭૬ હેકટર્સ, જાહેર સુવિધા માટે ૭.૩૬ હેકટર્સ તથા આંતરમાળખાકીય સવલતોના ખર્ચને પહોંચી વળવા વેચાણ માટે આશરે ૧૬.૯૩ હેક્ટર્સ જમીન મળી કુલ આશરે ૩૮.૮૨ હેકટર્સ જમીન પ્રાપ્ત થશે.