ગુજરાત / કોરોના સંકટ: કેન્દ્રના પગલે ગુજરાત સરકાર, તમામ મંત્રીઓ સહિત ધારાસભ્યોના પગારને લઈને લેવાયો મોટો નિર્ણય

• એક વર્ષ સુધી મંત્રીઓ અને ધારાસભ્યોના પગારમાં 30 ટકાનો કાપ
• એક વર્ષ સુધી ધારાસભ્યોની ગ્રાન્ટ રદ્દ કરાઇ 
• કોરોના વાયરસ મહામારી સામેની લડાઇમાં વપરાશે નાણાં

ગુજરાત સરકારના મંત્રીઓ અને ધારાસભ્યોના પગારમાં 30 ટકાનો કાપ મુકવાનો નિર્ણય કરવામાં આવ્યો છે. એક વર્ષ સુધી તેમના પગારમાં 30 ટકાનો કાપ મુકાયો છે. જ્યારે પ્રત્યેક ધારાસભ્યને મળતી 1.5 કરોડ ગ્રાન્ટ પણ એક વર્ષ સુધી નહીં મળે. આ નાણાં કોરોના મહામારી સામે લડવા માટે વપરાશે.

મહત્વનું છે કે આ અગાઉ કેન્દ્રીય કેબિનેટે કેટલાક મહત્વપૂર્ણ નિર્ણય કર્યા છે. સાંસદ નિધિ હેઠળ મળતા ફંડને પણ બે વર્ષ સુધી ટાળી દીધું છે. તમામ સાંસદોના પગારમાં વાર્ષિક 30 ટકાનો કાપ મૂકવા સંબંધિત કાયદાને કેબિનેટે મંજૂરી આપી દીધી છે. સરકાર તરફથી કેન્દ્રીય મંત્રી પ્રકાશ જાવડેકરે કેબિનેટના નિર્ણયની માહિતી આપી હતી.