ખુશખબર / વરસાદથી થયેલ પાક નુકસાનીને લઈને ખેડૂતો માટે સરકારની મોટી જાહેરાત, માત્ર 15 દિવસમાં...

• પાક નુકસાનીને લઈને ખેડૂતો માટે સરકારની મોટી જાહેરાત
• 33 ટકાથી વધુ નુકસાન થયું હશે તેમને વળતર મળશે
• SDRFના ધોરણો પ્રમાણે સહાય કરવામાં આવશે

ઉલ્લેખનીય છે કે, કેટલાક વિસ્તારોમાં તો પાક બળી ગયો છે. જે મામલે હવે રાજ્ય સરકારે નુકસાનીનો સર્વે કરવાની જાહેરાત કરી છે. રાજ્યમાં આગામી 15 દિવસમાં નુકસાનનો સર્વે કરવામાં આવશે અને SDRFના ધારા ધોરણો પ્રમાણે 33 ટકાથી વધુ નુકસાન થયું હશે તો સરકાર સહાય કરશે.

કૃષિ મંત્રી આર.સી. ફળદુનું નિવેદન 

કૃષિ મંત્રી આર.સી. ફળદુએ જણાવ્યું કે રાજ્યમાં સારો વરસાદ પડ્યો છે જે બે વર્ષથી ખોટ પુરી કરશે. રવિ અને ઉનાળુ સિઝનમાં ખેડૂતો સારો પાક લઈ શકશે. 85 ટકાથી વધુ જળાશયોમાં જળસંગ્રહ થયો છે. પાણી સંગ્રહ થવાથી ધરતી રિચાર્જ થઈ ગઈ છે. જેથી ખેડૂતો આગામી સમયમાં સારો પાક લઈ શકશે. 

કોંગ્રેસ ધારાસભ્ય વિરજી ઠુમ્મરે કર્યા સરકાર પર પ્રહાર

ગુજરાતમાં વરસાદથી પાકને ભારે નુકસાન થયું છે. સરકારે 15 દિવસમાં નુકસાનનો સર્વે કરવાની જાહેરાત કરી છે. આ મામલે કોંગ્રેસ ધારાસભ્ય વિરજી ઠુમ્મરે સરકાર પર પ્રહાર કર્યા છે. ઠુમ્મરે કહ્યું કે સરકાર પાસે તંત્ર નથી, ગ્રામ સેવકની 80 ટકા જગ્યા ખાલી છે, 4 તાલુકાનો ચાર્જ એક જ અધિકારી સંભાળે છે તો સરકાર સર્વે કઈ રીતે કરશે. 

સરકાર પાસે જ આપવા માટે નાણા નથી જેથી ખેડૂતોને કંઈ મળે એવું દેખાતું નથી. 150 ટકા વરસાદ પડ્યો છે તો હવે સર્વે શા માટે? વિરજી ઠુમ્મરે જણાવ્યું કે સરકાર પાસે તમામ ખેડૂતના ડેટા છે જો સહાય આપવાની નીતિ હોય તો સીધા આપી શકે છે. સૌરાષ્ટ્રમાં ખેડૂતો પાસે કંઈ બચ્યું નથી. 100 ટકા પાકનું નુકસાન થયું છે.

ભાવનગર જિલ્લામાં વરસાદથી ખેતીના પાકને નુકસાન 

ભાવનગર જિલ્લામાં ખેતીના પાકને સીધુ નુકસાન થયું નથી પરંતુ ઉપરવાસના ભારે વરસાદના પાણી ભાલ પંથકમાં ફરી વળતા ખેડૂતોને મોટાપાયે પાકમાં નુક્શાન થયું છે. ભાવનગર જિલ્લાના ભાલ પંથકમાં દર વર્ષ મુજબ આ વર્ષે પણ કાળુભાર, ઘેલો અને વાગડ નદીના છોડાયેલા પાણીના કારણે પુરની સ્થિતિ ઉભી થઇ છે. 

ખેડૂતોને રાતા પાણીએ રોવાનો વારો આવ્યો

આ વિસ્તારમાં ખેડૂતોએ કપાસ, બાજરી અને તલનું વાવેતર કર્યું હતું પરંતુ નદીઓના પાણી અહીં ફરી વળતા ખેતરો ધોવાઈ ગયા છે. ભાલના ખેતખાટલી, માઢિયા, કાળા તળાવ, પાળીયાદ સહિત અનેક ખેતરોમાં પાણી ભરાઈ જતા ખેડૂતોને રાતા પાણીએ રોવાનો વારો આવ્યો છે.  ખેડૂતોની માંગ છે કે તાકીદે સર્વે થાય અને તેમને પાક વિમાની રકમ મળે.