કાર્યવાહી / GSTમાં કરોડોનાં કૌભાંડ સામે રૂપાણી સરકાર એક્શનમાં, એક ઝાટકે 36 અધિકારીઓના ટ્રાન્સફર

• બોગસ બિલિંગ કૌભાડ મામલે કાર્યવાહી
• સરકારે 36 અધિકારીની કરી બદલી
• 7 કરોડના કૌભાંડ મામલે તપાસના આદેશ

કૌભાંડ મામલે રાજ્ય સરકાર એક્શનમાં 
ગુજરાતમાં ટેક્સચોરી અને તેમાં મદદ કરી રહેલા અધિકારીઓ સામે હવે સરકારે બાંયો ચડાવી છે. રાજ્યમાં છેલ્લા ઘણા સમયથી ટેક્સ ચોરીને જલસા કરી રહેલી કંપનીઓ તથા આવી કંપનીઓને છાવરતા અમુક અધિકારીઓ વિશે ચર્ચા જોરમાં હતી ત્યારે આજે એક ઝાટકે સરકારે મોટા પાયે અધિકારીઓની બદલીઓ કરવાનો નિર્ણય કર્યો છે. 

એક ઝાટકે 36 અધિકારીઓની બદલી 
નોંધનીય છે કે રાજ્યની ઘણી બધી કંપનીઓ GSTમાં કરચોરી કરીને કૌભાંડ આચરતી હોવાનું GST વિભાગ દ્વારા ખુલાસો કરવામાં આવ્યો હતો. એક અંદાજ મુજબ આખા રાજ્યમાં એક હજાર કરોડથી વધારે રૂપિયાની કરચોરીનું કૌભાંડ GSTમાં કરવામાં આવ્યું છે ત્યારે સરકાર હવે એક્શનમાં આવતા તપાસમાં ખલેલ ન પહોંચે તે માટે એક સાથે 36 અધિકારીઓની બદલી કરવાના આદેશ આપ્યા છે. 

આ બદલીઓમાં નાયબ વેરા કમિશનરનું પણ નામ આવે છે જ્યારે ક્લાસ-1 હિસાબી અધિકારી હાર્દિક પ્રજાપતિને સસ્પેન્ડ કરવામાં આવ્યા છે. 

એક બાદ એક થઈ રહી છે કાર્યવાહી 
આ સાથે જ ભાવનગરમાં સાત કરોડ રૂપિયાનાં બીલ કૌભાંડ મામલે પણ કાર્યવાહી કરવામાં આવી છે તથા તપાસનાં આદેશ આપવામાં આવ્યા છે. નોંધનીય છે કે થોડા દિવસ પહેલા જ ભાવનગરનાં એક રોહિત ડાભી નામક વ્યક્તિની બોગસ બિલિંગ કૌભાંડ મામલે જ ધરપકડ કરવામાં આવી હતી. કૌભાંડ મામલે અત્યાર સુધીમાં કેટલાય આરોપીઓની ધરપકડ કરવામાં આવી છે. 

GST વિભાગે પકડી પાડ્યું હતું કૌભાંડ 
નોંધનીય છે કે આજે જ ટેક્સ અધિકારીઓએ 1000 કરોડનાં બોગસ બિલિંગ કૌભાંડ મામલે વધુ કંપનીઓનાં નામ શોધી કાઢ્યા છે અને ભાવનગરમાં તપાસ શરૂ કરવામાં આવી છે. ગુજરાત સ્ટેટ GST વિભાગે આખું કૌભાંડ ઝડપી પાડ્યું છે અને તે હેઠળ સમગ્ર કાર્યવાહી હાથ ધરવામાં આવી રહી છે.