હાઈકોર્ટના જજે કહ્યું કે, સરકાર જે ગતિથી રસી ખરીદી કરી રહી છે, તે પ્રમાણે સંપૂર્ણરીતે લોકોને રસી આપવાના ઉદેશ્યને પૂરો કરતા 5 વર્ષ લાગી જશે
ગુજરાત હાઈકોર્ટમાં રસીકરણ મુદ્દે સરકારની કામગીરી અંગે સવાલ
જજે કહ્યું કે, આ રીતે રસી ખરીદી કરશો તો લક્ષ્યાંક પૂરુ કરવામાં 5 વર્ષ લાગશે
મે મહિનામાં માત્ર 16 અને જૂન મહિનામાં 10.7 લાખ ડોઝ રસીની ખરીદી
ગુજરાત હાઈકોર્ટમાં વેક્સિન મુદ્દે સરકારની કામગીરી પર જજ બેલાબેન ત્રિવેદી અને જજ ભાર્ગવ કારિયાની ખંડપીઠે સરકાર કેટલી રસીના ડોઝ ખરીદી કરી રહી છે. જેના જવાબમાં ગુજરાત સરકાર તરફથી એજી કમલ ત્રિવેદીએ આંકડાઓ રજૂ કર્યા કે, સરકારે મે મહિનામાં 16 લાખ ડોઝની ખરીદી કરી છે. અને જૂન મહિનામાં 10.7 લાખ ડોઝ વધારે ખરીદી કરશે. આ જવાબથી વ્યંગત્મ રીતે જજે કહ્યું કે, મતલબ તમે પંચવર્ષિય યોજના ચલાવી રહ્યા છો. સરકાર જે ગતિથી રસી ખરીદી કરી રહી છે. તે પ્રમાણે સંપૂર્ણરીતે લોકોને રસી આપવાના ઉદેશ્યને પૂરો કરતા 5 વર્ષ લાગી જશે.
ગુજરાત સરકારને હાઇકોર્ટના સણસણતા સવાલ
ગુજરાત હાઇકોર્ટે સરકારને સવાલ કર્યો કે સરકારે અત્યાર સુધીમાં વેક્સિનના કેટલા ડોઝ ઓર્ડર કર્યા છે. જેના પર સરકાર તરફથી પક્ષ રજૂ કરતાં વકીલ કમલ ત્રિવેદીએ જવાબ આપ્યો કે ગુજરાત સરકારે 2.5 કરોડ ડોઝ ઓર્ડર કર્યા છે અને દેશમાં માત્ર 2 જ કંપની વેક્સિન બનાવી રહી છે. હાઇકોર્ટે સરકારને સવાલો કરતાં કહ્યું કે ગ્લોબલ ટેન્ડરિંગમાં શું વાંધો છે? તથા જેમની પાસે રજિસ્ટ્રેશન કરવાનું એક્સેસ નથી તેમનું શું? ઓનલાઈન રજિસ્ટ્રેશન છતાં વેક્સિન કેવી રીતે વેડફાય છે? ગુજરાત સરકારને હાઇકોર્ટે પૂછ્યું કે રાજ્ય સરકાર પાસે લાંબા સમય માટે કોઈ પ્લાન છે?
ગ્રામીણ વિસ્તારમાં વેક્સિન માટે આપી સૂચના
ગુજરાત હાઇકોર્ટે નિર્દેશ આપતા કહ્યું કે જૉ દિવસની 150 વેક્સિન હોય તો ગ્રામ્ય માટે 20 રિઝર્વ રાખો. 130 એલોટ કરો, 20 ડોઝ સ્પોટ રજીસ્ટ્રેશન માટે રિઝર્વ રાખો. આ સિવાય હાઇકોર્ટે સરકારને સૂચવ્યું કે જે લોકોને પ્રથમ ડોઝ અપાઇ ચૂક્યો છે તેને જલ્દી બીજો ડોઝ મળે તથા બીજા ડોઝ માટેનો સમય થયો છે એવા લોકોને સામેથી બોલાવો.
વેક્સિન માટે રજીસ્ટ્રેશનમાં લોકોને મુશ્કેલી
નોંધનીય છે કે કોરોના વાયરસની બીજી લહેરમાં ભારત પાસે વેક્સિનરૂપે હથિયાર છે જે કોરોના સામે લડવામાં મદદરૂપ થઈ શકે છે ત્યારે ભારત સરકારે 18 વર્ષથી વધારે બધાને વેક્સિન લેવા માટે મંજૂરી આપી છે ત્યારે ઓનલાઈન રજીસ્ટ્રેશનના કારણે મુશ્કેલીનો સામનો કરવો પડી રહ્યો છે.