100% પ્રાકૃતિક જિલ્લો / ગુજરાતના આ જિલ્લાના ખેડૂતોએ એવું કરી બતાવ્યું કે એકર દીઠ 10 હજાર રૂપિયા ફાળવશે સરકાર

• પ્રાકૃતિક જિલ્લો ઘોષિત કરી સમગ્ર દેશમાં ડાંગ જિલ્લાને નવી ઓળખ મળશે
• ડાંગ જિલ્લાને રાજ્ય સરકારે ૩૧ કરોડ જેટલી મોટી રકમ ફાળવી
• એકર દીઠ 10,000 રૂપિયા જેટલી મોટી રકમ આપવાનું સરકારે નક્કી કર્યું

પ્રકૃતિની સાથે તાલ મિલાવી જીવન જીવવું સમયની માંગ બની ગઈ છે અને ગ્લોબલ વોર્મિંગ જેવી સમસ્યા સામે ઝીક ઝીલવા માટે પ્રકૃતિનો સહારો લેવો જરૂરી બની ગયો છે. પ્રકૃતિની સાથે તાલ મિલાવી ઓર્ગેનિક ખોરાક આરોગવો શરીરની તંદુરસ્તી માટે જરૂરી બની ગયો છે. ગુજરાતના આદિવાસી અને પછાત ગણાતા કુદરતી વનરાજી વચ્ચે વસેલો ડાંગ જિલ્લા પારંપારિક ખેતી અને વિશેષ જીવનશૈલીના કારણે ડાંગ જિલ્લો હવે દેશનો પ્રથમ 100 ટકા પ્રાકૃતિક જિલ્લો બની ગયો છે.

એકર દીઠ 10,000 રૂપિયા જેટલી મોટી રકમ આપવાનું સરકારે નક્કી કર્યું

ડાંગ જિલ્લાને રાજ્ય સરકારે 31 કરોડ જેટલી મોટી રકમ ફાળવી છે. ડાંગના ખેડૂતોને પ્રોત્સાહિત કરવા માટે એકર દીઠ 10,000 રૂપિયા જેટલી મોટી રકમ આપવાનું પણ નક્કી કરવામાં આવ્યું છે ત્યારે ડાંગ જિલ્લો પાકૃતિક જિલ્લો બનવાની સાથે સમગ્ર દેશમાં એક અલાયદુ સ્થાન પણ મેળવશે. તો સ્થાનિક વેદો અને ફાર્મસીઓને પણ પ્રોત્સાહન મળવાની સાથે રોજગારીની તકો ઉભી થવાની શક્યતાઓ જોવાઈ રહી છે.

ડાંગ જિલ્લાને સંપૂર્ણ રસાયણ મુક્ત જિલ્લો જાહેર કરાયો

ગુજરાતના અતિ પછાત ગણાતા પરંતુ કુદરતી વનરાજી વચ્ચે વસેલા ડાંગ જિલ્લાની પ્રકૃતિ સૌ કોઈ માટે એકવાર મુલાકાત લેવા જેવી છે ત્રણ તાલુકા ધરાવતા અને 95% જેટલા આદિજાતિ બહુલ વિસ્તાર ગણાતા ડાંગ જિલ્લાને તેની વિશેષતાઓ ભૌગોલિક સ્થિતિ અને લોકોનો પ્રકૃતિ સાથેનો તાલમેલ અને જીવન જીવવાની પદ્ધતિને ધ્યાને રાખીને દેશનો પહેલો પ્રાકૃતિક જિલ્લો ઘોષિત કરવામાં આવ્યો છે ગુજરાતના મહામહિમ રાજ્યપાલ આચાર્ય દેવવ્રત અને ગુજરાતના મુખ્યમંત્રી ભુપેન્દ્ર પટેલ દ્વારા ડાંગ જિલ્લાને વિધિવત રીતે કાર્યક્રમો યોજીને પ્રાકૃતિક જિલ્લો ઘોષિત કરવામાં આવ્યો છે.

ડાંગ જિલ્લો હવે પછાત નહીં પ્રાકૃતિક જિલ્લો

કુદરતની સાથે રહીને પ્રકૃતિનું દર્શન કર્યા વિના જીવાથી જીવન પદ્ધતિ સાચી જીવન જીવવાની પદ્ધતિ તરીકે ગણી શકાય એવી જ રીતે ડાંગના લોકો પોતાની પરંપરાગત ખેતીના કારણે સમગ્ર દેશમાં જાણીતા છે. વિવિધ ખેત પેદાશો ઓર્ગેનિક રીતે પકવીને આરોગતા હોય છે, સાથે વિવિધ આયુર્વેદિક જડીબુટ્ટીઓ પણ સમગ્ર ગુજરાતને ભેટ આપી છે. સાપુતારા જેવા હિલ સ્ટેશન પર લોકો હરવા-ફરવા અને ટહેલવા આવે છે. ડાંગ જિલ્લાની વિશેષતાને પગલે હવે ડાંગએ પછાત નહીં પરંતુ પ્રાકૃતિક જિલ્લો બની ગયો છે.

ચોમાસામાં ડાંગનું જંગલ અને ધોધ સોળે કળાએ ખીલી ઉઠે છે

ચોમાસા દરમિયાન પ્રકૃતિના ખોળે વસેલા ડાંગ જિલ્લામાં નાના નાના ધોધ સોળે કળાએ ખીલી ઉઠતા હોય છે. જંગલનું કુદરતી દ્રશ્ય મનમોહક બની જાય છે જેના કારણે સહેલાણીઓ ડાંગ જિલ્લા તરફ ખેંચાઈ આવે છે. રાજ્ય સરકારના આ પ્રયાસથી ડાંગ જિલ્લાને વિકસાવવા માટે ઓર્ગેનિક જિલ્લાની સાથે હવે પ્રાકૃતિક જિલ્લો ઘોષિત કરી ડાંગ જિલ્લાને નવી ઓળખ આપી છે ડાંગ જિલ્લાને મળેલી પ્રાકૃતિક જિલ્લાની ઓળખ સમગ્ર દેશ માટે એક રોલ મોડલ જિલ્લો બની રહેશે.

મહત્વનું છે કે, ડાંગ જિલ્લાના લોકોની આગવી જીવનશૈલી સમગ્ર રાજ્યમાં જાણીતી છે. જેથી પ્રાકૃતિક જિલ્લો ઘોષિત કરી સમગ્ર દેશમાં ડાંગ જિલ્લો પોતાની નવી ઓળખ સ્થાપિત કરશે. ફેલાતા વાયરસો અને વધતા રોગો સામે માણસની જાત લાચાર બનતી દેખાઈ રહી છે. હવે સમય એ આવ્યો છે કે લોકોને પોતાના ખાન-પાનથી લઈને દિનચર્યામાં ફેરફારો કરવા જ રહ્યા.