મોટા સમાચાર / ગુજરાતના નાગરિકો માટે ગૂડ ન્યૂઝ, રાજ્ય સરકારે કર્યું એવું કામ કે મોટા પ્રમાણમાં ઉભી થશે રોજગારીની તક

• ગુજરાતની નવી IT/ITeS પોલિસી-૨૦૨૨-૨૭ની પ્રથમ ફળશ્રુતિ
• આંતરરાષ્ટ્રીય કંપની QX ગ્લોબલે MOU સાઈન કર્યા 
• રાજ્યમાં હવે 2 હજાર રોજગારીનું સર્જન થશે

મુખ્યમંત્રી  ભૂપેન્દ્ર પટેલના દ્રષ્ટિવંત નેતૃત્વમાં રાજ્ય સરકારે IT અને ITeS સેક્ટરના સર્વગ્રાહી વિકાસ માટે તાજેતરમાં જાહેર કરેલી નવી IT/ITeS પોલિસી-ર૦રર-૨૭ની પ્રથમ ફલશ્રુતિ રૂપે રાજ્ય સરકાર અને બિઝનેસ પ્રોસેસ મેનેજમેન્ટ ક્ષેત્રની આંતરરાષ્ટ્રિય કંપની વચ્ચે સ્ટ્રેટેજિક MoU સંપન્ન થયા છે

રાજ્ય સરકાર દ્વારા તાજેતરમાં જાહેર કરાયેલ ગુજરાતની નવી IT/ITeS પોલિસી 2022-27 ની પ્રથમ ફળશ્રુતિ રૂપે આજે મુખ્યમંત્રીશ્રી ભૂપેન્દ્ર પટેલની ઉપસ્થિતિમાં રાજ્ય સરકાર અને બિઝનેસ પ્રોસેસ મેનેજમેન્ટ ક્ષેત્રની આંતરરાષ્ટ્રિય કંપની QX ગ્લોબલ ગ્રુપ લિ. વચ્ચે સ્ટ્રેટેજિક MoU સંપન્ન થયા. pic.twitter.com/wt9oaCrPRb

— CMO Gujarat (@CMOGuj) February 15, 2022

MOU પર હસ્તાક્ષર 

મુખ્યમંત્રીની ઉપસ્થિતીમાં આ સ્ટ્રેટેજિક MoU સાયન્સ ટેકનોલોજી સચિવ શ્રી વિજય નહેરા ના માર્ગદર્શન માં સંપન્ન થયા હતા. સાયન્સ ટેક્નોલોજી ના નાયબ નિયામક  અને QX ગ્લોબલ ગૃપ લિમિટેડના ગુજરાત પ્રતિનિધિ સ્નેહલ પટેલે આ એમ.ઓ.યુ પર હસ્તાક્ષર કર્યા હતા. 

ગુજરાત માટે નવી IT પોલીસી પ્રતિબદ્ધ 

CM ભૂપેન્દ્ર પટેલે રાજ્યમાં IT સેક્ટરના વિકાસને વેગ આપવા રોબસ્ટ ઇન્ફ્રાસ્ટ્રકચર ઉભું કરવાના હેતુસર જાહેર થયેલી પ્રોત્સાહક IT પોલિસી અંતર્ગત થયેલા આ સૌ પ્રથમ સ્ટ્રેટેજિક MoUને આવકાર્યા હતા. તેમણે ઉમેર્યુ કે, PM મોદીના નેતૃત્વમાં આત્મનિર્ભર ભારતના નિર્માણમાં આ નવી IT પોલિસીથી યોગદાન આપવા ગુજરાત પ્રતિબદ્ધ છે. 

CM ભૂપેન્દ્ર પટેલે અભિનંદન પાઠવ્યા 

વધુમાં તેમણે QX ગ્લોબલની આ પહેલ માટે અભિનંદન પાઠવતાં જણાવ્યું કે, રાજ્ય સરકાર તેમના ગુજરાત ઓપરેશન્સમાં જરૂરી યોગ્ય સહયોગ પણ આપશે. QX ગ્લોબલના ગૃપ સી.ઇ.ઓ યુત ફ્રેન્ક રોબિન્સને આ MoU વેળાએ વિડીયો કોન્ફરન્સથી સહભાગી થતાં જણાવ્યું કે, અમદાવાદમાં ર૦૦૩-૦૪માં તેમના સહયોગથી શરૂ થયેલી આ QX ગ્લોબલ હવે ર૩૦૦ જેટલા આઇ.ટી સેક્ટરના પ્રશિક્ષિત માનવબળ સાથે આંતરરાષ્ટ્રિય ખ્યાતિ પ્રાપ્ત બની છે. 

આઈટી વિભાગના અધિકારીઓ પણ હાજર રહ્યા હતા 

આ ર૩૦૦ પૈકીના મોટાભાગના ૧૭૦૦ જેટલા પ્રોફેશનલ્સ ગુજરાતમાં કાર્યરત છે અને આ સ્ટ્રેટેજિક MoUના પરિણામે આગામી વર્ષોમાં આઇ.ટી ક્ષેત્રે બે હજાર જેટલી રોજગારીનું સર્જન થશે તેમ તેમણે ઉમેર્યુ હતું. આ MoU વેળાએ મુખ્યમંત્રીના અધિક મુખ્ય સચિવ પંકજ જોષી તેમજ આઇ.ટી વિભાગના અધિકારીઓ પણ ઉપસ્થિત રહ્યા હતા