મહત્વની જાહેરાત / રૂપાણી સરકારની વિદ્યાર્થીઓ, ખેડૂતો, કર્મચારીઓ અને પેન્શનર્સને નવા વર્ષની મોટી ભેટ

• મેડિકલમાં અભ્યાસ કરવા ઈચ્છુક વિદ્યાર્થીઓ માટે મહત્વની જાહેરાત
• 7માં પગારપંચના અમલ બાદ 12 ટકા મોંઘવારી ભથ્થુ આપ્યું છેઃ DyCM
• કેન્દ્ર સરકારના સહયોગથી બનશે કોલેજ

ગુજરાતના મેડિકલ અભ્યાસ માટે મહત્વની જાહેરાત

ગુજરાતના મેડિકલ અભ્યાસ કરવા ઇચ્છુકો માટે મહત્વની જાહેરાત કરવામાં આવી છે. ભારત સરકારના સહયોગથી મેડિકલ કોલેજ શરૂ કરવામાં આવશે. પંચમહાલના ગોધરામાં અને ગીર સોમનાથના વેરાવળમાં મેડિકલ કોલેજ બનશે. તેમજ દ્વારકાના ખંભાળીયામાં અને બોટાદમાં મેડિકલ કોલેજ બનાવવામાં આવશે. મોરબીમાં 300 બેડની હોસ્પિટલ નિર્માણ કરી મેડિકલ કોલેજ શરૂ થશે. આ મેડિકલ કોલેજના નિર્માણ માટે કુલ રૂપિયા 1500 કરોડનો ખર્ચ થશે. આ બેઠકમાં 5500 મેડિકલ બેઠક છે. આ વર્ષે 5 હજાર વિદ્યાર્થીઓને મેડિકલમાં પ્રવેશ આપવામાં આવ્યો છે.

કર્મચારીઓ અને પેન્શનર્સના મોંઘવારી ભથ્થામાં કરાયો વધારો

આ બેઠકમાં રાજ્ય સરકારના કર્મચારીઓના મોંઘવારી ભથ્થામાં વધારો કરવાનો નિર્ણય લેવામાં આવ્યો હતો. આમ આ નિર્ણય સાથે રાજ્ય સરકારે સરકારી કર્મચારીઓ અને પેન્શનર્સને નવા વર્ષની ભેટ આપી છે. રાજ્ય સરકારે તમામ સરકારી કર્મચારીઓ અને પેન્શનર્સના મોંઘવારી ભથ્થામાં પાંચ ટકાનો વધારો કર્યો છે. મોંઘવારી ભથ્થુ 12 ટકાથી વધારી 17 ટકા કરવામાં આવ્યું છે. આ વધારો 1 જુલાઈ 2019થી અમલમાં આવશે અને તેનું એરિયર્સ ત્રણ તબક્કામાં ચૂકવવામાં આવશે. આમ હવે કર્મચારીઓને અને પેન્શનર્સને 12 ટકાની જગ્યાએ 17 ટકા મોંઘવારી ભથ્થું મળશે. જો કે આ નિર્ણયને પગલે રાજ્ય સરકારને દર વર્ષે એક હજાર 821 કરોડનો બોજ પડશે.

ખેડૂતોને થયેલા નુક્સાન માટે અરજી કરવાની છેલ્લી તારીખ

નાયબ મુખ્યમંત્રીએ કમોસમી વરસાદથી થયેલ ખેડૂતોને નુકસાન અંગે ચિંતા વ્યક્ત કરી હતી. ખેડૂતો માટે નીતિન પટેલે મોટી જાહેરાત કરી છે. પાક નુકસાન મુદ્દે ઓનલાઇન અરજીની સમય મર્યાદામાં વધારો કરવામાં આવ્યો છે. અરજી માટે 15 દિવસનો વધારો કરવામાં આવ્યો છે. અત્યાર સુધી 8 લાખ ખેડૂતોને સહાય ચૂકવવામાં આવી છે.