રૂપાણીરાજના છેલ્લા બે વર્ષમાં ગુજરાત સરકારે સરકારી પ્રાથમિક શાળાઓની સરખામણીએ 10 ગણી વધુ ખાનગી પ્રાથમિક શાળાઓને મંજૂરી આપી છે. વિધાનસભાના ચોમાસું સત્રની પ્રશ્નોતરીમાંથી માહિતી મળે છે કે શિક્ષણવિભાગે સરેરાશ 1 સરકારી શાળાની સામે 10 ખાનગી શાળાઓની મંજૂરી આપી છે.
કેમ ભણશે ગુજરાત?
શિક્ષણ વિભાગે છેલ્લા 2 વર્ષમાં 122 સરકારી કે ગ્રાન્ટેડ પ્રાથમિક શાળાઓની સામે 1287 ખાનગી પ્રાથમિક શાળાઓને મંજૂરી આપી છે. કોંગ્રેસના ધારાસભ્ય દ્વારા પૂછાયેલા સવાલમાં સરકારે કરેલાં ખાનગીકરણની ચોંકાવનારી વિગતો સામે આવી છે. સરકાર દ્વારા આપવામાં આવેલી માહિતી અનુસાર રાજ્યમાં 32,574 સરકારી, 605 ગ્રાન્ટેડ અને 10,940 ખાનગી પ્રાથમિક શાળાઓ છે, તે પૈકી છેલ્લા બે વર્ષમાં 122 સરકારી, 13 ગ્રાન્ટેડ અને 1,287 ખાનગી નવી પ્રાથમિક શાળાઓને મંજૂરી આપવામાં આવી છે.
આવનાર વર્ષોમાં સરકાર ખાનગીશાળાઓમાં પ્રવેશોત્સવનું આયોજન કરે તો નવાઈ નઈ
રાજ્યવ્યાપી શિક્ષણના ખાનગીકરણથી તો એવું લાગી રહ્યું છે કે આવનાર વર્ષોમાં સરકાર ખાનગીશાળાઓમાં પ્રવેશોત્સવનું આયોજન કરે તો ય નવાઈ નઈ. રૂપાણી રાજના છેલ્લા બે વર્ષમાં 1 સરકારી શાળાની સામે 10 ખાનગી શાળોને મંજૂરી મળી હોય તો હવે ખાનગી શાળામાં જ પ્રવેશોત્સવ કરવા પડશે.
સૌથી વધુ ખાનગીશાળાની મંજૂરી અમદાવાદ, સુરત, રાજકોટમાં
રાજ્યના મેટ્રો સિટી એવાં અમદાવાદમાં 211, સુરતમાં 140 અને રાજકોટમાં 129 ખાનગી શાળાઓ શરૂ થઇ છે. જ્યારે અમદાવાદમાં 16, સુરતમાં 5 અને રાજકોટમાં 1 સરકારી ગ્રાન્ટેડ શાળાને મંજૂરી આપવામાં આવી છે.
રાજ્યના 13 જિલ્લાઓમાં એક પણ સરકારી શાળાને મંજૂરી નહીં
રાજ્યના 13 જિલ્લાઓમાં તો એક પણ સરકારી પ્રાથમિક શાળાને મંજૂરી આપવામાં આવી નથી. જેમાં ખેડા, પંચમહાલ, અરવલ્લી, ભરૂચ, વલસાડ, જુનાગઢ, અમરેલી, ગાંધીનગર, પાટણ, નવસારી, નર્મદા, પોરબંદર, ડાંગ જિલ્લાની એક પણ સરકારી શાળાને મંજૂરી આપવામાં આવી નથી.