નેનો કેમ્પસમાં 7000 લોકોને રોજગારી મળે છે:વિશ્વકર્મા
વિધાનસભા ગૃહમાં ચાલી રહેલા પ્રશ્નોત્તરી કાળ દરમિયાન એક મુદ્દો નેનો પ્લાન્ટનો પણ ગુંજ્યો. ગુજરાતમાં નેનો પ્લાન્ટની સ્થિતિ અંગે કોંગ્રેસે રાજ્ય સરકાર પાસે જવાબ માગ્યો. કોંગ્રેસના ધારાસભ્ય શૈલેષ પરમારે નેનો પ્રોજેક્ટ અંગે વિગતવાર માહિતી માંગી હતી.જેના જવાબમાં રાજ્ય સરકારે જણાવ્યું કે અત્યાર સુધીમાં 2 લાખ 60 હજાર નેનો કારનું ઉત્પાદન થયું છે.
કોંગ્રેસે નેનો પ્લાન્ટની વિગતો માંગી
કોંગ્રેસના ધારાસભ્ય શૈલેષ પરમારે ગૃહમાં નેનો પ્રોજેક્ટ અંગે સરકાર પાસે ટાટા કંપની સાથે શું એગ્રિમેન્ટ થયા તેની વિગતે માહિતી માંગી હતી. સાથે કોંગ્રેસે એમ પણ કહ્યું કે પ્રથમ ફેઝમાં 2લાખ 50 હજાર નેનો કાર ઉત્પાદન કરવાનું લક્ષ્યાંક હતું જ્યારે બીજા ફેઝમાં 3 લાખ 50 હજાર નેનો ઉત્પાદન કરવાનું લક્ષ્યાંક હતું આ બાબતે હાલની સ્થિતિ અંગે માહિતી માંગી હતી.
ઉદ્યોગ મંત્રી જગદીશ વિશ્વકર્માનું ગૃહમાં નિવેદન
ઉદ્યોગમંત્રી જગદીશ વિશ્વકર્માએ ગૃહમાં નિવેદન આપતા જણાવ્યું હતું કે નેનો કેમ્પસમાં 7000 લોકોને રોજગારી મળે છે. નેનો પ્લાન્ટની વાર્ષિક 2.50 લાખ ઉત્પાદન ક્ષમતા છે અને અત્યાર સુધીમાં 2 લાખ 60 હજાર નેનો કારનું ઉત્પાદન થયું છે.
20 મિનિટ સુધી ગૃહમાં નેનો પ્રોજેકટ મામલે ચર્ચા ચાલી
ગૃહમાં નેનો પ્રોજેકટ મામલે 20 મિનિટ સુધી ચર્ચા ચાલી હતી. વિપક્ષે એમ પણ આક્ષેપ કર્યો હતો કે સરકાર જે શરતે નેનો પ્લાન્ટ માટે જમીન અને લોનમાં રાહત આપી હતી એ પૂર્ણ થઈ નથી. સરકાર આંકડા છુપાવી રહી છે. તો આ તરફ સરકારે સ્પષ્ટતા કરી હતી કે કોઈ આંકડા છુપાવવામાં આવ્યા નથી.
મફતના ભાવે જમીન આપી હોવાનો આક્ષેપ
વિપક્ષે ગૃહમાં આક્ષેપ કર્યો હતો કે સાણંદમાં સરકારે મફતના ભાવે ટાટા નેનો પ્રોજેકટ માટે જમીન આપી છે. આ બાબતે સરકારે જવાબ આપ્યો હતો કે નેનો પ્રોજકટના કારણે અનેક લોકોને રોજગારી મળી છે. ઔધોગિક નિયમોને ધ્યાનમાં રાખીને જ જમીનની ફાળવણી કરવામાં આવી હતી.