મોટા સમાચાર / 5 મે પછી પણ ગુજરાતના શહેરો માટે લેવાઈ શકે છે આ નિર્ણયો, આટલું બંધ રહેવાની શક્યતા

• 15 મે સુધી લંબાવાઈ શકે છે ગુજરાતના પ્રતિબંધો 
• 29 શહેરમાં મિનિ લોકડાઉન જેવા પ્રતિબંધોની અવધિ 5 મે સુધી છે 
• કેબિનેટની બેઠક બાદ ગુજરાત સરકાર કરી શકે છે જાહેરાત 

અઘોષિત લોકડાઉનના સમયમાં થઈ શકે છે વધારો

ગુજરાતમાં સતત વધી રહેલા કોરોના વાયરસના કેસ વચ્ચે ગુજરાત માટે મોટા સમાચાર સામે આવી રહ્યા છે. સરકાર દ્વારા 29 શહેરોમાં જે પ્રતિબંધો લગાવી દેવામાં આવ્યા છે તે 5મી મે સુધી લગાવવામાં આવ્યા હતા એવામાં હવે આ પ્રતિબંધો લંબાવવા મુદ્દે ગુજરાત સરકાર મોટી મૂંઝવણમાં છે. લોકડાઉનની જાહેરાત કરવા મુદ્દે રાજ્યની સરકાર મોટી મૂંઝવણમાં દેખાઈ રહી છે. રાજ્યમાં અત્યારે રાતના 8 વાગ્યાથી સવારના 6 વાગ્યા સુધી નાઈટ કર્ફ્યૂ તથા વિવિધ પ્રકારના પ્રતિબંધ કરવામાં આવ્યા છે આ પ્રતિબંધોને હવે લંબાવવામાં આવે તેવી પૂરી સંભાવના છે. જેનો અર્થ થાય છે કે રાજ્યમાં અત્યારે જે જગ્યાઓને બંધ કરવાના આદેશ આપવામાં આવ્યા છે તે હજુ પણ બંધ જ રહેશે. 

29 શહેરમાં મિનિ લોકડાઉન જેવા પ્રતિબંધોની જાહેરાત કરાઇ હતી 

રાજ્ય સરકારની કેબિનેટ મીટિંગ બાદ ગુજરાત સરકાર મોટી જાહેરાત કરી શકે છે. આટલું જ નહીં આ નિયમોને વધુ કડક બનાવે તેવી પણ સંભાવના છે. નોંધનીય છે કે ગુજરાતમાં કોરોના વાયરસના વધતાં કેસના કારણે પહેલાં નાઈટ કર્ફ્યૂ અને તે બાદ વિવિધ પ્રતિબંધો લગાવી દેવામાં આવ્યા હતા. આ પ્રતિબંધોને મિનિ લોકડાઉન અથવા અઘોષિત લોકડાઉન જેવી પરિસ્થિતિ કહી શકાય. એવામાં આ પ્રતિબંધોની કડક અમલવારી સાથે પ્રતિબંધોને 15મી મે સુધી લંબાવી દેવામાં આવે તેવી સંભાવના છે. 

કેન્દ્ર સરકારની કોમન ગાઇડલાઇનનું પાલન કરી શકે છે છે રાજ્ય સરકાર 

આ સિવાય રાજ્ય સરકાર કેન્દ્ર સરકારની કોમન ગાઇડલાઇનનું પાલન કરી શકે છે. સાંપ્રત સ્થિતિને અનુલક્ષી અઘોષિત લોકડાઉન વધારાઇ શકે છે પરંતુ કેસ ઘટે તેવા વિસ્તારોને તબક્કાવાર કર્ફ્યુ મુક્ત કરવા વિચારણા કરાઇ રહી હોવાની માહિતી સામે આવી છે. નોંધનીય છે કે હાલમાં જે પ્રતિબંધો છે તેની અવધિ 5મી મેના રોજ પૂરી થઈ જશે.