Good News / વૃદ્ધ થયા એટલે ચિંતા ના કરો! સંતાનો નહીં સાચવે તો સરકાર સાચવશે, આ રહ્યો પ્લાન

• નિસહાય વૃદ્ધો માટે સરકારની વધુ ઘરડાઘર શરૂ કરવાની તૈયારી
• આર્થિક પરિસ્થિતિ સામે ઝઝુમતા વૃદ્ધો માટે સારા સમાચાર
• વૃદ્ધોને સંતાનો નહીં સાચવે તો સરકાર સાચવવા તૈયાર

સરકાર 10 નવા ઘરડાઘરો ઉભા કરશે

રાજ્યમાં અસહાય વૃદ્ધોની સંખ્યામાં ઝડપી વધારો નોંધાઈ રહ્યો છે. એવા વખતે ગુજરાત સરકારે રાજ્યમાં સરકારી ઘરડાઘરોની સંખ્યા વધારવાનો નિર્ણય કર્યો છે. ઉલ્લેખનીય છે કે રાજ્યમાં અત્યારે પાંચ સરકારી ઘરડાઘરો પહેલેથી કાર્યરત છે અને હવે ૧૦ બીજા ઘરડાઘરોને મંજુરી આપવામાં આવી છે.

ક્યાં હશે નવા ઘરડાઘરો? 

નવા ઘરડાઘરો અમરેલી, પોરબંદર, બોટાદ, સોમનાથ, દેવભૂમિ દ્વારકા, ડાંગ, અરવલ્લી, તાપી, છોટા ઉદેપુર અને વલસાડ જિલ્લાઓમાં શરુ કરાશે. 

ઘરડાઘરો ચલાવતા NGOને મળતી ગ્રાન્ટમાં વધારો થશે 

આ ઉપરાંત સરકાર ૪૫ જેટલા NGOને કે જેઓ રાજ્યભરમાં ઘરડાઘરો ચલાવે છે તેને ગ્રાન્ટ આપે છે. સરકારે આ ફંડિગમાં પણ વધારો કર્યો છે. નોંધનીય છે કે નવા NGO નાના નગરોમાં શરુ થશે. સરકારની લાંબા ગાળાની યોજના એવી છે કે તેઓ દરેક જિલ્લામાં એક ઘરડાઘર ખોલવા ઈચ્છે છે. 

સમાજ કલ્યાણ વિભાગના અગ્ર સચિવ મનોજ અગ્રવાલે કહ્યું કે...

ઘરડાઘરોની જરૂરિયાત ક્રમશ: વધી રહી છે. અત્યારે એક ઘરડાઘરમાં ૫૦ વ્યક્તિઓ રહી શકે છે. તેમની લોકોને રાખવાની ક્ષમતા પણ ભવિષ્યમાં વધશે. આ ઉપરાંત તેમણે જણાવ્યું હતું કે સરકાર ફક્ત NGOની ગ્રાન્ટ વધારવાની છે. ખાનગી ઘરડાઘરોને ફંડિંગ મળશે નહિ, સરકારની પોલીસી જે વૃદ્ધો આર્થિક રીતે અક્ષમ છે તેવા લોકોને મદદ કરવાની છે.

શું છે વિશેષજ્ઞોનો મત 

સરકારના આ નિર્ણયને નિષ્ણાતોએ આવકાર્યો છે. તેમના મતે સરકારને પણ હવે ખ્યાલ આવી ગયો છે કે સમાજમાં વિભક્ત કુટુંબ પ્રથાનું ચલણ વધવાથી અને વધુ બાળકો વિદેશ અથવા દેશમાં બીજા ભાગોમાં વસવાથી વધુ ઘરડાઘરોની જરૂરિયાત વધી છે. આ ઘરડાઘરો વૃદ્ધોને સ્વમાનથી રહેવામાં પાયારૂપ રહેશે.