નિર્ણય / ગુજરાતમાં ડૉક્ટર્સની હડતાળ: દર્દીઓને આંશિક રાહત, 10 હજારમાંથી 4 હજાર ડૉક્ટર્સ ડ્યુટીમાં જોડાયા

• તબીબોની હડતાળને લઈને સંગઠનોમાં ભાગલા
• 4 હજાર તબીબો હડતાળ સમેટીને ડ્યુટીમાં જોડાયા
• સોમવાર સુધી ઠરાવની રાહ સાથે ડ્યુટીમાં જોડાયા

રાજ્યમાં તબીબોની હડતાળને લઈને અલગ અલગ સંગઠનોમાં ભાગલા પડ્યા છે. GIDA સાથે જોડાયેલા રાજ્યના 4 હજાર સરકારી ડોક્ટર્સ ડ્યુટીમાં જોડાયા છે. CHC અને PHC કેન્દ્ર પર તબીબો કામ પર જોડાયા છે. CM ભૂપેન્દ્ર પટેલ દ્વારા મળેલી બાંહેધરી બાદ GIDA સાથે જોડાયેલા તબીબોએ હડતાળ સમેટી લીધી છે. સોમવાર સુધી GIDA સાથે જોડાયેલા તબીબો સરકારના ઠરાવ રાહ જોશે. રાજ્યના કુલ 10 હજાર તબીબો હડતાળ પર બેઠા હતા. 10 હજાર તબીબોમાંથી 4 હજાર તબીબોએ હડતાળ સમેટી લીધી છે.

તબીબોની હડતાળ મુદ્દે ઉચ્ચ અધિકારીઓની બેઠક યોજાઈ હતી. 14 મેડીકલ કોલેજના ડીનની આરોગ્ય વિભાગના અધિક મુખ્ય સચિવ મનોજ અગ્રવાલ સાથે બેઠક યોજાઈ હતી. બેઠકમાં RDD અધિકારીઓ પણ હાજર રહ્યા હતા. હડતાળમાં જોડાયેલા તબીબોની વિગતો મુદ્દે ચર્ચા કરશે.

સરકારી તબીબોની હડતાળથી દર્દીઓને હાલાકી

સરકારી તબીબોની હડતાળથી દર્દીઓને હાલાકી ભોગવવાનો વારો આવ્યો છે. દર્દીઓની હાલાકી જાણવા માટે VTVની ટીમ અમદાવાદ સિવિલ હોસ્પિટલ ખાતે પહોંચી હતી. જ્યાં દર્દીઓને પડી રહેલી હાલાકીને જાણવાનો પ્રયાસ કરાયો હતો. અમદાવાદ સિવિલ હોસ્પિટલ ખાતે રાજ્ય બહારથી આવતા દર્દીઓ સારવાર માટે રાહ જોઇ રહ્યા હોવાની વિગતો પ્રાપ્ત થઇ છે. સમયસર સારવાર ન મળતા હોસ્પિટલમાં દર્દીઓ બેહાલ બન્યા છે. બિહાર, હરિયાણા, રાજકોટ, મોરબીથી દર્દીઓ સારવાર માટે અમદાવાદ સિવિલ હોસ્પિટલ ખાતે આવ્યા છે. પરંતુ સારવાર ન મળતાં દર્દીઓ પરેશાન થઇ રહ્યા છે.

તબીબોની માગ શું છે ?

• છેલ્લા 12 વર્ષથી બઢતી કરવામાં નથી આવી તે બઢતી તાત્કાલિક આપવામાં આવે
• 800 સરકારી મેડિકલ પ્રોફેસરને બઢતી આપવામાં આવે
• રાજ્યની સરકારી મેડિકલ કોલેજમાં 400 પોસ્ટ ખાલી છે તેને ભરવામાં આવે
• 16 મેના સરકારના ઠરાવ પ્રમાણે ભથ્થા આપવા
• 16 મેનો ઠરાવ 22 નવેમ્બરે રદ્દ કરવામાં આવ્યો હતો તેને ફેરઅમલમાં લાવવામાં આવે
• રિટાયર્ડ તબીબી શિક્ષકોને તાત્કાલિક પેન્શન આપવામાં આવે
• તબીબોની કોન્ટ્રાકટ ભરતી બંધ કરી કાયમી ભરતી કરવામાં આવે
• થોડા સમય પહેલાં સરકારે આપેલી બાંહેધરીઓ તાત્કાલિક પૂર્ણ કરવામાં આવે
• ગ્રેડ પેમાં સુધારો
• ક્ષેત્રિય ફેરણી ભથ્થાની માગણી
• કોરોના વોરિયર્સ તરીકે ગણતરી કરી ભથ્થા
• જૂની પેન્શન યોજના લાગુ કરવી
• તા. 1-7-2017થી 20 ટકા NPA આપવું
• એડહોક સેવા વિનિમિયત કરી ઉચ્ચ પગાર ધોરણ આપવું
• ઉચ્ચ પગાર ધોરણ સાથે નામાભિધાન કરવું
• 15 ટકા સિનિયર ટયૂટરોને ત્રીજા ટીકુનો લાભ આપવો