વિરોધ / SKY યોજનામાં ગઢડાના ખેડૂતોના હાલ બેહાલ, હવે આંદોલનની ચીમકી, જાણો સમગ્ર મામલો

• ગઢડા સ્કાય યોજનાને લઇ ખેડૂતોનો વિરોધ
• લાભાર્થીઓને આવ્યા મોટા વીજ બિલ 
• 65 ખેડૂતોને 9થી 80 હજાર સુધીના બિલ

ગઢડા ગામના કાપરડી ફિડરમાં આવતા ખેડૂતોને સૂર્ય શક્તિ કિસાન યોજના ( SKY યોજના ) હેઠળ સરકાર દ્વારા મોટામોટા સપના દેખાડવામાં આવ્યા હતા પરંતુ ઊલટાનું ખેડૂતોને PGVCLનું 9 હજાર થી 80 હજાર જેટલું બિલ ફટકારી દેવાતા ખેડૂતો મુશ્કેલીમાં મૂકાયા છે.

65 જેટલા ખેડૂતો દ્વારા આ યોજનાનો લાભ લીધો હતો 

ખેડૂતો ની આવક બમણી કરવાની વાત સાથે સ્કાય યોજનાની સરકાર દ્વારા જાહેરાત કરવામાં આવેલ. જેને લઈ બોટાદ ના ગઢડા શહેરના  કાપરડી ફીડરમા આવતા 65 જેટલા ખેડૂતો દ્વારા આ યોજનાનો લાભ લીધો હતો . આ યોજના માં 30 % રાજ્ય સરકાર 35%કેન્દ્ર સરકાર 30% લૉનના લાભ સાથે 5% કેશ ખેડૂતોએ ભરવાના હોય છે. અને ખેડૂતોના ખેતરમાં ઉતપન્ન થતી વીજળીનું વેચાણ કરી ખેડૂત આવક મેળવી શકે તેવી આ યોજના હતી પરંતુ હથેળીના ચાંદ જેવી આ યોજનામાં તો આવક તો ઠીક પણ ખેડૂતો ઉલ્ટાના દેવાના ખાડામાં ઉતરી ગયા. 

બમણી આવકની આશા રાખી બેઠા હાલ તો આ યોજનાથી દેવાદાર બન્યા 

જે જિલ્લાના ઉર્જા મંત્રી હોય અને તે જ જિલ્લાના ખેડૂતો સાથે સરકારે છેતરપીંડી કરી હોય તેવો ભાસ આ ખેડૂતોને થઈ રહ્યો છે. કાપરડી ફીડરના આ યોજનાનો લાભ લીધેલા ખેડૂતો સરકાર દ્વારા આપવામાં આવતી સબસીડી પણ હજુ સુધી ખાતામાં જમા કરાવવામાં આવી નથી ત્યારે ખેડૂતો કહે છે કે, માથે દેવા કરી અમે આ યોજનામાં આવક બમણી કરવા જોડાયા છે પરંતુ અહીં ખેડૂતો ને આવક બમણી થવાની વાત તો જાવ દયો પરંતુ ખેડૂતોને PGVCL દ્વારા 80 હજાર રૂપિયા જેવા મસમોટા બિલ થપકારી દેવામાં આવ્યા છે. બમણી આવકની આશા રાખી બેઠા હાલ તો આ યોજનાથી દેવાદાર બન્યા તેવું ખેડૂતોનું માનવું છે.
 
ગાંધી ચીંધ્યા માર્ગે આંદોલન કરવાની ચીમકી ખેડૂતોએ ઉચ્ચારી

આ અંગે કાપરડી ફીડરના ખેડૂતો મુખ્યમંત્રી, મામલતદાર સહિતના અધિકારી ઓને રજૂઆત કરવામાં આવી પણ કોઈ નિરાકરણ નહિ. ત્યારે આ રકમ કેવી રીતે ભરવી તેને લઈ ખેડૂતો ચિંતા માં મુકાયા છે. આ બાબતે જો કોઈ નિરાકરણ ટૂંક સમયમાં નહિ લાવવામાં આવે તો ગાંધી ચીંધ્યા માર્ગે આંદોલન કરવાની ચીમકી ખેડૂતોએ ઉચ્ચારી છે. ત્યારે આ બાબતે ગઢડાના ખેડુતોએ અગાઉ ગઢડા મામલતદાર ને પણ આવેદનપત્ર આપી રજુઆત કરી હતી જયારે મામલતદાર દ્વારા કલેકટરને તેમજ PGVCL વિભાગને આવેદનપત્ર રવાના કરી ઘટતુ કરવા જણાવ્યું હતું. 

શું છે યોજના

ખેડૂતોને પોતાના ખેતરમા વીજળી ઉત્પન કરવા માટે સોલર પેનલ આપવામાં આવશે. આ યોજના અંતરગત ખેડૂતોએ સૌર પેનલ માટે થતા કુલ ખર્ચ ની ઓછામાં ઓછા 5% રકમ ભરવાની રહેશે અથવા 5% થી વધારે રકમ ભરી શકશે. ખેડૂત જેટલી વધારે રકમ ભરશે તેટલો વધારે ફાયદો થશે. આ યોજના અંતર્ગત રાજ્ય સરકાર 60 % રકમ સબસિડી પેટે ચુકવશે તથા બાકીની 35 % રકમ નિયા સસ્તા વ્યાજ ની લોન કરી આપવામાં આવશે, તે લોન નો સમયગાળો 7 વર્ષ નો રહેશે.

ખેડૂતો આ યોજનામા જોડાયા નહિ હોય તે લોકોને 8 કલાક વીજળી મળવા પાત્ર છે

જો કોઈ ખેડૂત વધારે કિલોવોટ નો પેનલ લગાવવા ઈચ્છતા હોય તો નિયમોને આધીન રહી મંજુરી અપવવામાં આવશે. આ વધારા ની પેનલ દ્વારા ઉત્પન થતી વીજળી 3.50 રૂપિયા પ્રતિ યુનિટના દરથી ખરીદવામાં આવશે. તેના પર રાજ્ય સરકાર ની સબસિડી મળવવા પાત્ર રહેશે નહિ. સ્કાય ફીડર દીઠ યોજનામા જોડતા ખેડૂત મિત્રોની સમિતિ બનાવવાની રહેશે. સ્કાય ફીડર પર દિવસે 12 કલાક વીજળી મેળવી શકશે તેમજ જે ખેડૂતો આ યોજનામા જોડાયા નહિ હોય તે લોકોને 8 કલાક વીજળી મળવા પાત્ર છે.

યુનિટ દીઠ પહેલા 7 વર્ષ મા 7 રૂપિયા પ્રતિ યુનિટ લેખે ખેડૂતો ને ચુકવવામાં આવશે

વીજળી નું ઉત્પાદન થાય અને વપરાશ કર્યા બાદ જેટલા યુનિટ ગ્રીડમાં આવે તે યુનિટ દીઠ પહેલા 7 વર્ષ મા 7 રૂપિયા પ્રતિ યુનિટ લેખે ખેડૂતો ને ચુકવવામાં આવશે. જે પૈકી 3.50 રૂ પ્રતિ યુનિટ વીજ વિતરણ કંપની ચુકવશે અને બાકીના 3.50 રૂ પ્રતિ યુનિટ (1000 યુનિટ પ્રતિ કિલોવોટ પ્રતિ વર્ષની મર્યાદામા) ખેડૂતને સબસિડી રૂપે ચૂકવાશે. તેમજ આવી કુલ રકમમાંથી ખેડૂતની લોનના હપ્તા ભરાઈ જાય ત્યાર બાદ જે રકમ વધશે તે સીધી ખેડૂતોના બેંક એકાઉન્ટમા જમા કરવામાં આવશે. 7 વર્ષ ની લોન પૂરી થયા બાદ બાકીના 18 વર્ષ સુધી ગ્રીડ મા આપેલ વીજળીના 3.50 રૂ લેખે વીજ વિતરણ કંપની દ્વારા ખેડૂતોને ચૂકવામાં આવશે.