ગુજરાતના સુમો બેબીનું વજન ઘટ્યું બે વર્ષમાં બાળકો થશે નોર્મલ

ઉનાઃ વાદરી ગામના સુમો બાળકો માટે અમદાવાદની એક હોસ્પિટલ આશિર્વાદ સમાન બની છે. હોસ્પિટલમાં લેપ્રોસ્કોપિક સીલ્વ ગેસ્ટ્રોમી બારીયાટીક સર્જરી દ્વારા આ સુમો બેબીઝની સારવાર કરવામાં આવી. ભુખ સંતોષવાનું કામ કરતા હાર્મોન લેપ્ટિન રેસેપ્ટર ન હોવાના કારણે બાળકોને આ સમસ્યા થઈ હોવાનું તબીબોએ જણાવ્યું છે.

ડો. મહેન્દ્ર નારવારિયાનું કહેવું છે કે છ વર્ષની અમિશાનું વજન સર્જરી પહેલાં 82 કિલો હતું જે આજે ઘટીને 72 કિલો થઈ ગયું. તેવી જ રીતે સાડા આઠ વર્ષની યોગિતાનું વજન 59 કિલો હતું. જે સર્જરી બાદ 50 કિલો થઈ ગયું. આગામી બે વર્ષમાં આ બાળકો સંપૂર્ણપણે સામાન્ય થઈ જશે એવી ડોક્ટર આશા વ્યક્ત કરી રહ્યાં છે.

સફળ સર્જરી બાદ બાળકોના પિતાનું કહેવું છે કે સરકાર દ્વારા આ મામલે સહાય કરવાની વાત કરવામાં આવી હતી. પરંતુ આજ દિન સુધી એક પણ રૂપિયાની સહાય મળી નથી. તો બાળકીઓનો મફત સારવાર કરવા બદલ તેઓએ ડોક્ટર્સનો પણ આભાર માન્યો. હાલ સારવાર બાદ બંને બાળકોના વજનમાં 9થી 10 કિલો વજન ઘટ્યું છે.

આ સુમો બેબીઝનું વજન ઘટાડવા માટે તેમને અનેક હોસ્પિટલમાં લઈ જવાયા હતા. પરંતુ સફળતા ના મળતા છેવટે અમદાવાદમાં ઓપરેશન સફળ બન્યું. ડોક્ટરોએ લેપ્રોસ્કોપિક સીલ્વ ગેસ્ટ્રોમી બારીયાટિક સર્જરી દ્વારા તેમના પેટના ભાગને 70 ટકા જેટલું ઓછું કરી દેવામાં આવ્યું. હવે બાળકોને ભૂખ ઓછી લાગે છે અને દોઢ વર્ષમાં વજન પણ ઘટ્યું.