Vtv Exclusive / આર્સેલર મિત્તલે 600 કરોડની જમીનનું કરી નાંખ્યું છતાં સરકાર મહેરબાન હોવાનો આરોપ, માત્ર 18 કરોડ જ દંડ ફટકાર્યો

• આર્સલર મિત્તલ નિપ્પોન સ્ટીલ ઈન્ડીયા પર જંગલની જમીન પચાવી પાડવાનો આરોપ
• સ્ટીલ કંપનીએ હજીરા સ્ટીલ પ્લાન્ટ નજીક જંગલની જમીન પર દબાણ કર્યું 
• ગુજરાત સરકારે હજીરા સ્ટીલ પ્લાન્ટ નજીક 600 કરોડની જમીન સ્ટીલ કંપનીને આપી
• વિવાદ વધતા સરકારે સ્ટીલ કંપનીને ફક્ત 18 કરોડનો દંડ કર્યો 

માર્ચ 2021માં ગુજરાત સરકારે આર્સલર મિત્તલ નિપ્પોન સ્ટીલ ઈન્ડીયાને 300 મેગાવોટ પાવર પ્લાન્ટની સ્થાપના કરવા માટે AMNS હજીરા સ્ટીલ પ્લાન્ટ નજીક 38.71 હેક્ટર જંગલનની જમીન ફાળવવાની મંજૂરી આપી દીધી હતી. ગુજરાત હાઈકોર્ટે પણ જંગલની જમીન પર કંપનીના અતિક્રમણની વિરૃદ્ધની એક જનહિતની અરજી પર સુનવાણી કરતી વખતે રાજ્ય સરકાર અને AMNS ને નોટીસ પાઠવીને આ અંગેનો ખુલાસો માગ્યો હતો તેમ છતાં પણ ગુજરાત સરકારે હાઈકોર્ટની નોટીસનો જવાબ આપવાની તસદી લીધી નહોતી. 

સૂત્રોના જણાવ્યાનુસાર ખુદ રાજ્ય સરકારના રિપોર્ટમાં જણાવાયું છે કે AMNS એ ધાતુનો ભંગાર નાખવા માટે 23 હેક્ટર જંગલની જમીન પર કબજો કર્યો છે. પરંતુ રાજ્ય સરકારે આ કેસમાં આંખ આડા કાન કરી રહી છે અને આ આખા ગંભીર કેસને ફક્ત નજીવો દોષ ગણાવીને કેસમાંથી હાથ અધ્ધર કરી લીધો છે.

AMNS એ 23.15 હેક્ટર જંગલની જમીન પર ગેરકાયદેસર બાંધકામ શરું કર્યું

સૂત્રોએ કહ્યું કે AMNS એ 23.15 હેક્ટર જંગલની જમીન પર ગેરકાયદેસર બાંધકામ શરું કર્યું તથા હજારો ટન ભંગાર ફેંક્યો તેવો આરોપ લાગી રહ્યો છે. કંપનીની હવે એવી ઈચ્છા છે કે ગુજરાત સરકાર સત્તાવાર રીતે તેને હાલના ભાવે જમીન વેચાણથી આપે. 

જંગલની જમીનનો બજાર ભાવ 600 કરોડ, પણ સરકારે ફક્ત 18 કરોડનો દંડ ફટકાર્યો 

ઉલ્લેખનીય છે કે હાલમાં હેક્ટર દીઠ જંગલની જમીનની નેટ વેલ્યુ વધારેમાં વધારે 9.5 લાખ રુપિયા છે જ્યારે આ જમીનનો બજાર ભાગ ઓછામાં ઓછો હેક્ટર દીઠ 16 કરોડ રુપિયા છે. આ હિસાબે ગણતરીએ કરીએ તો જંગલની જમીનનો બજાર ભાવ 600 કરોડ રુપિયા છે. રાજ્ય સરકાર દ્વારા કરવામાં આવેલો 18 કરોડનો દંડ બજાર ભાવ પ્રમાણે નથી. ગુજરાત સરકારે પાણીના ભાવે જંગલનની જમીન કંપનીને પધરાવી દીધી. 

કેન્દ્રીય  વન અને પર્યાવરણ મંત્રાલયે ગુજરાત સરકાર અને તેના વન વિભાગની પણ ઝાટકણી કાઢી હતી

સૂત્રોએ તો એવું પણ જણાવ્યું કે કેન્દ્રીય  વન અને પર્યાવરણ મંત્રાલયે પણ ગુજરાત સરકાર અને તેના વન વિભાગની પણ ઝાટકણી કાઢી હતી. કેન્દ્રીય મંત્રાલયે એક તપાસ પણ કરાવી હતી જેમાં ગુજરાત સરકાર અને વન વિભાગે હાઈકોર્ટનો આદેશ હોવા છતાં પણ આ કેસમાં કોઈ પણ પગલું ભર્યું નહોતું. AMNSના વ્યાવસાયિક હિતોના રક્ષણ માટે ગુજરાત સરકારે દેખીતો પ્રયાસ કર્યો છે. 

થોડા મહિના પહેલા AMNS ના ટોચના અધિકારીઓએ મુખ્યમંત્રી કાર્યાલયમાં એક યાદી જમા કરાવીને સરકાર પાસેથી હજીરા સ્ટીલ પ્લાન્ટના વિસ્તરણ માટે છૂટછાટો માંગી હતી કંપનીએ સરકારે પાસે માંગેલી છૂટમાં 6 મહિનાની અંદર 2006 ના ભાવે જમીનની ફાળવણી, વળતરની જોગવાઈમાં છૂટ, સિંગલ વિન્ડો ક્લીરન્સ, તથા વિશેષ સબસિડી સહિતની બીજી કેટલીક છૂટ માંગી હતી.  

AMNS, વિશ્વની ત્રીજી મોટી સ્ટીલ કંપની આર્સલર મિત્તલ એન્ડ નિપ્પોન સ્ટીલ કોર્પોરેશનનું સંયુક્ત સાહસ છે. ડિસેમ્બર 2019 માં જેવી ગ્રુપે 42,000 કરોડનું દેવું ચુકવીને એસ્સાર સ્ટીલને ખરીદી લીધી હતી. જેવી ગ્રુપે કંપનીમાં વધારાના 8,000 કરોડનું પણ રોકાણ કર્યું હતું.