ગુજરાત / '17 વર્ષ જૂની વાત પર ચર્ચાનો મતલબ નથી' : નવી પેન્શન યોજનાનો વિરોધ કરી રહેલા સરકારી કર્મચારીઓ પર નાણામંત્રીનું નિવેદન

• જૂની પેન્શન યોજના લાગુ કરવાની માંગ ઉગ્ર બની
• જૂની પેન્શન યોજના પર ચર્ચા કરવા પર કનુ દેસાઈનો ઈનકાર
• 17 વર્ષ જૂની વાત પણ ચર્ચા કરવાનો કોઈ મતલબ નથીઃ કનુ દેસાઈ

સરકાર દ્વારા નવી પેન્શન યોજના લાગૂ કરવામાં આવતાં રાજ્યના સરકારી કર્મચારીઓ જૂની પેન્શન યોજના મુજબ જ લાભો આપવાની માગ કરી રહ્યા છે. ત્યારે હવે જૂની પેન્શન યોજના પર ચર્ચા કરવા પર કનુ દેસાઈએ ઈનકાર કર્યો છે. તેમણે કહ્યું કે, જૂની પેન્શન યોજના 2005માં બંધ કરવામાં આવી હતી. જૂની પેન્શન યોજનાના 17 વર્ષ થઈ ગયા. 17 વર્ષ જૂની વાત પણ ચર્ચા કરવાનો કોઈ મતલબ નથી. કર્મચારીઓની માગણી છે કે જૂની પેન્શન યોજના લાગુ થાય અને જેને લઇને 6 અને 9 મે ગાંધીનગર ખાતે કર્મચારીઓએ ધરણા પણ કર્યો હતો. પરંતુ નાણાકીય બાબતોને સ્પર્શતી આ બાબત હોવા છતાં નાણામંત્રીએ બોલવાનું ટાળ્યું હતું.

ઉત્તર ગુજરાત વીજ કંપની લોકાર્પણ પ્રસંગે આવેલા ઉર્જા મંત્રી અને નાણામંત્રીએ પાલનપુર ખાતેના રોજ સંકુલમાં નવા યુનિટનું લોકાર્પણ કર્યું હતું. ઊર્જા મંત્રી કનુ દેસાઈએ પાલનપુર વર્તુળ કચેરી તેમજ વિભાગીય કચેરી 2ના નવા કાર્યાલય ભવનનું લોકાર્પણ કર્યું હતું. પાલનપુરમાં વીજ કંપનીના લોકાર્પણમાં ઉર્જામંત્રીએ નિવેદન કર્યું હતું કે ગુજરાત 21 હજાર મેગા વોટ વીજળીનો વપરાશ કરે છે અને 2100 યુનિટનો વપરાશ એક વર્ષમાં 1 વ્યક્તિ કરે છે. જોકે વીજ સમસ્યા હલ કરવા નાગરિકોએ પણ ફાળો આપ્યો છે. જ્યારે ડિસેમ્બર સુધીમાં ગુજરાતમાં એક પણ વીજ જોડાણ બાકી નહિ રહે તેવી જાહેરાત પણ કરી હતી. ત્યારે રાજ્યના લાખો કર્મચારીઓનો મહત્વના પ્રશ્નોને લઈને નાણામંત્રીએ બોલવાનું ટાળ્યું હતું.

પ્રાથમિક શિક્ષક સંઘની માંગ શું?

1. જૂની પેન્શન યોજના ફરી શરૂ કરવી
2. સાતમા પગાર પંચના લાભ સમગ્ર દેશમાં સમાન રૂપે આપવા
3. પેન્શનમાં ગુજરાત સરકારનો હિસ્સો 10 ટકાની જગ્યાએ 14 ટકા કરવો
4. કેન્દ્ર સરકારના પરિપત્ર મુજબ ગુજરાતમાં જૂની પેન્શન યોજના લાગૂ કરાય
5. કરાર આધારિત શિક્ષકોને કાયમી કરવા
6. રાષ્ટ્રીય શિક્ષણ નીતિ 2020માં શિક્ષક વિરોધી જોગવાઈઓ દૂર કરવી
7. બદલીના નવા નિયમો ઝડપથી બહાર પાડવા
8. 10 વર્ષના બોન્ડમાં ભરતી થયેલા શિક્ષકોની બોન્ડની મર્યાદા ઘટાડવી
9. CCC પરીક્ષા માટેની મુદ્દત વધારવી
10. એસ.પી.એલ. રજા બાબતે નિર્ણય કરવો
11. એકવાર બદલી થયેલા શિક્ષકોને એ જ જગ્યાએ ફરી ન મુકવા
12. શિક્ષકોને બિન શૈક્ષણિક કામગીરીથી દૂર રાખવામાં આવે

જૂની પેન્શન યોજના V/S નવી પેન્શન યોજના

પેન્શન એટલે કર્મચારીઓ માટે નિવૃતિ સમયની નિરાંત માટેની વ્યવસ્થા. પેન્શનનો લાભ સરકારી નોકરી પ્રત્યેના લગાવનું એક મુખ્ય કારણ રહ્યું છે. હવે આવી લાભદાયી યોજનામાં જ્યારે ફેરફાર થાય તો સ્વાભાવિક છે તે કર્મચારીઓને આંખમાં કણાની જેમ ખટકે. રાજ્યમાં શિક્ષકો જૂની પેન્શન યોજના લાગુ કરવાની માગ સાથે સરકાર સામે પાટનગરમાં જ મેદાને ઉતર્યા છે. શિક્ષકોના વિવિધ સંઘોની માગણી છે કે નવી પેન્શન યોજના મંજૂર નથી. સરકારી નોકરીયાત નોકરી સમયે જેટલી ચિંતા તેની રજા, હકો અને ભથ્થાની કરે છે તેનાથી વધુ નિવૃતિ સમયે મળનારા લાભોની કરતો હોય છે. કેટલાક કિસ્સામાં આ લડતો કોર્ટ સુધી પણ પહોંચેલી છે. પેન્શનની યોજના પણ એટલે જ લાગુ કરાઇ હતી કે અગાઉના સમયમાં સરકારી કર્મચારી કોઇ અન્ય કોઇ ધંધાકીય પ્રવૃતિમાં સક્રીય ન હતો. આજે તેવું નથી રહ્યું, સમય બદલાયો છે. રોકાણના વિકલ્પો અને પસંદગી પણ બદલાઇ છે. સરકારે પણ સમય સાથે તાલ મિલાવીને કોર્પોરેટ કલ્ચર અપનાવવાનું નક્કી કરીને પેન્શનની પદ્ધતિમાં ફેરફારનો નિર્ણય કર્યો છે. લાભદાયી યોજના નાબૂદ થાય કે ફેરફાર થાય તેવું શિક્ષકો નથી ઇચ્છતા. પોતાની માગ મનાવવા ચૂંટણી પહેલા જ સરકાર સામે મેદાને ઉતર્યા છે. ત્યારે સવાલ એ છે કે નવી પેન્શન સ્કીમના કયા મુદ્દાઓને લઈને વિરોધ થઇ રહ્યો છે? જૂની સ્કીમ કેમ ઇચ્છે છે શિક્ષકો? શિક્ષકોની મૂંઝવણનું સરકાર પાસે સમાધાન શું છે?