દેવાદાર ગુજરાત / બીજા 6 સ્ટેચ્યુ ઓફ યુનિટી બની જાય એટલું તો ગુજરાત સરકાર વર્ષે વ્યાજ ચૂકવે છે

• દેવાના આંકડામાં વિકાસનું ગણિત ખોરવાયું
• વાર્ષિક આવકનું 19 ટકા દેવું
• દરેક ગુજરાતી માથે રૂા. 40,000નું દેવું

ગુજરાત દિવસેને દિવસે દેવામાં ડુબતુ જાય છે ભારોભાર કરવેરા વસૂલતુ હોવા છતાં ગુજરાતની તીજોરીના તળિયા વાસ્તવમાં ખાલી થઈ ગયા છે. બેફામ વિકાસની હરણફાળ, સ્ટેચ્યુ ઓફ યુનિટી, મેટ્રો ટ્રેન, બુલેટ ટ્રેન, કેવડિયાનું એકતાનગર, વાઈબ્રન્ટ સમિટથી લઈને કોઈ વિદેશી મહેમાનની આગતા સ્વાગતા કરવા માટે કરોડો રૂપિયા પાણીની જેમ વેડફાઈ રહ્યા છે દરેક ગુજરાતી માથે રૂા. 40000 જેટલુ દેવુ છે. આ દેવુ ઉત્તરો ઉત્તર વધશે ઘટશે નહીં. 2020માં આ દેવુ 51000ને પાર કરી જશે.

ગુજરાતનું કુલ દેવુ રૂા. 2,40,652 કરોડ

ગુજરાત વિધાનસભાના શિયાળુ સત્રમાં ઉનાના ધારાસભ્ય પુંજાભાઈ વંશે પૂછેલા પ્રશ્નના જવાબમાં ગુજરાત સરકાર તરફથી જવાબ રજૂ કરવામાં આવ્યો હતો જે મુજબ ગુજરાત માથે હાલ રૂા. 2,40,652 કરોડ દેવું છે. 

રૂ. 35,270 કરોડ ચુકવાયુ વ્યાજ

ગુજરાત સરકારે દેવા પેટે બે વર્ષની અંદર રૂા. 35,270 કરોડ વ્યાજ પેટે ચૂકવ્યા છે. જેમાં 2017- 18માં રૂા. 17,146 કરોડ વ્યાજ ચૂકવ્યુ હતુ. 2018-19માં રૂા. 18,124 કરોડ વ્યાજ ચૂકવવામાં આવ્યુ છે. 

મુદ્લ પેટે વ્યાજ કરતા પણ ઓછી રકમ ચુકવાઈ

મુદ્દલ પેટે 2 વર્ષમાં રૂા. 29,140 કરોડ ચૂકવાયા છે. મુદ્દલ પેટે 2017-18માં રૂા. 13,700 કરોડ ચુકવાયા અને 2018-19માં રૂા. 15,440 કરોડ ચૂકવવામાં આવ્યા હતા. 

દેવાના આંકડામાં વિકાસનું ગણિત ખોરવાયું

દેવાદાર રાજ્યોની યાદીમાં પણ ગુજરાત છઠ્ઠા નંબરે પહોંચી ગયુ છે ત્યારે ગુજરાત માટે આવનારૂ વર્ષ 2020 વધુ દેવું લઈને આવવાનું છે. દરેક ગુજરાતી માથે રૂા. 51000નું દેવુ હશે. નવું જન્મનાર બાળક પણ માથે 51000નું દેવું લઈને જન્મશે. 

વાર્ષિક આવકનું 19 ટકા દેવુ

રાજયની વાર્ષિક આવકના 19 ટકા જેટલું માતબર દેવું થઈ રહ્યુ છે. રાજ્યના દેવામાં સતત વધારો થઇ રહ્યો છે. 2020માં ગુજરાતનું દેવું 3.25 લાખ કરોડ થઇ જશે. જ્યારે હાલ ગુજરાતનું દેવું 2.40 લાખ કરોડ રૂપિયા છે. 

દરેક ગુજરાતી માથે રૂા. 40,000નું દેવું

સરકારનું દેવું 2001-02માં 45,000 કરોડ હતું કે જે 2017-18માં 2.15 લાખ કરોડ થઈ ગયું. અને હવે 2018-19માં આ આંકડો 2.40 લાખ કરોડ થઈ ગઈ છે જેને પરિણામે દરેક ગુજરાતી માથે લગભગ 40,000 જેટલુ દેવુ છે. 

સરકારના બજેટમાં ખાધ પોણા ત્રણ ગણી વધી 

2004-17 દરમ્યાન ગુજરાતના લોકોની આવક એટલે કે રાજ્યનો GDP 9.2 ટકાના દરે વધ્યો છે. પણ સરકારની કર આવક 14.19 ટકાના દરે વધી અને દંડ, ફી, ચાર્જ વગેરે જેવી બિન-કર આવક 17.26 ટકાના દરે વધી.લોકોની આવક વધી છે જેના કરતા સરકારની આવક ઘણી વધી હોવા છતાં દેવુ બેલેન્સ નથી થઈ રહ્યું. ગુજરાત દેશમાં ઘણા વધારે વેરા નાખનારું રાજ્ય છે. છતાં સરકારના બજેટમાં ખાધ પોણા ત્રણ ગણી વધી રહી છે તે વિચારવા જેવુ છે. 

આલેખનઃ ગાયત્રી જોષી