મહામારી / સુરત શહેરમાં કોરોના રોકેટગતિએ વધ્યો, અત્યાર સુધીમાં ફૂલ થયાં આટલા કોવિડ બેડ

• કોરોનાના કેસો વધતા હોસ્પિટલો ઉભરાઇ
• સ્મીમેર, સિવિલ અને ખાનગીમાં દર્દીઓ વધ્યા
• દર્દીઓની સંખ્યા વધતા તંત્રની ચિંતા વધી

ઉલ્લેખનીય છે કે,કોરોનાના કેસો વધતા હોસ્પિટલો ઉભરાઇ છે, ખાસ કરીને સ્મીમેર, સિવિલ અને ખાનગીમાં દર્દીઓ ચિંતાજનક રીતે વધ્યા છે. કોવિડ બેડની વાત કરવામાં આવે તો સ્મીમેર અને સિવિલમાં 25 ટકા બેડ ફૂલ થઇ ચૂક્યા છે. 

ખાનગી હોસ્પિટલમાં 50 ટકા બેડ પેક 

તો ખાનગી હોસ્પિટલમાં 50 ટકા બેડ ભરાયા છે. આપને જણાવી દઇએ કે, શહેરની 32 હોસ્પિટલને કોવિડ ડેઝિગ્નેટ કરવામાં આવી છે. ડેઝિગ્નેટ હોસ્પિટલોમાં 1810 બેડ સામે 947 દર્દીઓ હાલ કોરોનાની સારવાર લઇ રહ્યા છે. 

તંત્રની ચિંતા વધી 

સિવિલ, સ્મીમેર, સમરસ અને કોમ્યુનિટી સેન્ટરમાં 5306 બેડ છે. જેમાથી 1309 બેડ ભરાયા છે. સતત વધી રહેલા કેસ અને દર્દીઓની સંખ્યાને કારણે તંત્રની ચિંતા વધી છે. 

શનિવારે રાજ્યમાં 2276 કેસ 

રાજ્ય સરકાર દ્વારા જાહેર કરવામાં આવેલ આંકડા પ્રમાણે રાજ્યમાં ગત 24 કલાકમાં કોરોનાના 2276 કેસ નોંધાયા છે અને 1422 દર્દીઓ સાજા થયાં છે. આ સાથે જ અત્યાર સુધીમાં 2,83,241 દર્દીઓ કોરોના મુક્ત થયાં છે. તો 5 લોકોના સારવાર દરમિયાન મોત થયાં છે. આમ ગુજરાતમાં અત્યાર સુધીમાં 4484 લોકોના મોત કોરોનાને કારણે થયાં છે. તો સૌથી ચિંતાજનક બાબત એ પણ છે કે, રાજ્યમાં હાલ 157 દર્દીઓ વેન્ટિલેટર પર છે. 

છેલ્લા 5 દિવસથી કેસમાં ચિંતાજનક રીતે થઇ રહ્યો છે વધારો

ઉલ્લેખનીય છે કે, રાજ્યમાં છેલ્લા 5 દિવસથી ચિંતાજનક વધારો નોંધાયો છે. મંગળવારે 1730 કેસ, બુધવારે 1790 કેસ અને ગુરૂવારે 1961 કેસ અને શનિવારે 2190 કેસ અને આજે 2276 કેસ નોંધાયા છે. આમ ગુજરાતમાં કોરોના સંક્રમણ દિવસેને દિવસે ચિંતાજનક રીતે વધી રહ્યું છે તે સ્પષ્ટ છે.  

સુરત અને અમદાવાદમાં કોરોનાના કેસની ગતિ વધી

સ્થાનિક સ્વરાજ્યની ચૂંટણી બાદ ફરી કોરોનાએ માથું ઉચક્યું છે. કોરોનાના કેસમાં સતત વધારો થતા ચિંતા વધી છે. અમદાવાદ શહેરમાં રાજ્યના સૌથી વધુ 601 કેસ અને ગ્રામ્યમાં 11 નવા કેસ નોંધાયા છે. જ્યારે સુરત શહેરમાં 607 નવા કેસ, જ્યારે સુરત ગ્રામ્યમાં 153 કેસ નોંધાયા છે. વડોદરા શહેરમાં 269 કેસ, જ્યારે ગ્રામ્યમાં 67 કેસ નોંધાયા. રાજકોટ શહેરમાં 145 કેસ અને ગ્રામ્યમાં 27 કેસ નોંધાયા છે.