લોકો જ ત્રીજી લહેર લાવશે? / કોરોનામાં અમદાવાદના લાલ દરવાજે બેદરકાર બની ફરતા લોકો, સ્મશાન અને હોસ્પિટલની લાઈનો ભૂલી ગયા કે શું?

• અમદાવાદમાં લાલ દરવાજાનું માર્કેટ ફરી ધમધમ્યું
• રવિવારના દિવસે ખરીદી કરવા લોકોની ભીડ ઉમટી પડી
• લાલ દરવાજામાં કોવિડ-19ના નિયમોના ધજાગરા ઉડ્યા

અમદાવાદનું લાલ દરવાજાનું માર્કેટ ફરી ધમધમતું થઇ ગયું છે. રવિવારના દિવસે ખરીદી કરવા માટે લોકોની ભીડ ઉમટી પડી હતી. લોકો મોટી સંખ્યામાં ખરીદી કરવા ઉમટી પડતા લાલ દરવાજાના માર્કેટમાં કોરોનાના નિયમોના ધજાગરા ઉડ્યા હતા. શહેરીજનોની આ બેદરકારી કોરોનાને આમંત્રણ આપી શકે છે. મહત્વનું છે કે, આશરે 40 દિવસ પછી સરકારે ધંધો-વેપાર ખોલવાની છૂટ આપી છે.

લોકો સ્મશાનની ચિતા અને એમ્બ્યુલન્સની લાઈનો ભૂલી ગયા?

સાથે ગુજરાતના તમામ જિલ્લામાંથી વેપારીઓ સરકાર પાસે છૂટ આપવાની માગણી કરી હતી. જેને લઈ સરકારે આંશિક લોકડાઉનમાં 3 વાગ્યા સુધી છૂટ આપી છે. પરંતુ લોકો પોતાની બેદરકારી હજુ પણ દેખાડી રહ્યા છે. આજથી થોડા દિવસ પહેલા સ્મશાનોમાં સળગતી ચીતાઓ જોઈને જે લોકો બૂમ-બરાડા પાડી રહ્યા હતા. એ જ લોકો જાણે બધુ ભૂલી બજારમાં બેદરકારી પૂર્વક ફરી રહ્યા છે. લોકોને એ યાદ અપાવવાની જરૂર છે કે, કોરોના હજુ પણ તમારી વચ્ચે જ છે.

અમદાવાદમાં છૂટ મળતાની સાથે પ્રથમ દિવસથી જ બજારોમાં ભીડ

મહત્વનું છે કે, અમદાવાદ વેપારમાં છૂટછાટના પ્રથમ દિવસે જ ગ્રાહકોની લાઈન લાગી હતી. ન્યૂ ક્લોથ માર્કેટ બહાર ટ્રાફીક જામ જોવા મળ્યો હતો. લગભગ એક મહિના બાદ બજાર ખૂલી થઈ હતી. જેને લઈ દેશના સૌથી મોટા હોલસેલ કાપડ બજાર પૈકી એક ન્યૂ ક્લોથ માર્કેટમાં ભીડ જોવા મળી હતી.