મોટો ઘટસ્ફોટ / શ્રદ્ધા મર્ડર કેસમાં કઈ રીતે ખૂલ્યું ગુજરાત કનેક્શન: આફતાબને જુઓ ક્યાંથી મળતું હતું ડ્રગ્સ

• દિલ્હીના શ્રદ્ધા મર્ડર કેસમાં સામે આવ્યું સુરત કનેક્શન
• આરોપી આફતાબને ડ્રગ પહોંચાડનાર પેડલર સુરતનો
• ડ્રગ પેડલર ફૈઝલ મોમીનના કોલ રેકોર્ડની તપાસ કરાશે

દિલ્હીના શ્રદ્ધા મર્ડર કેસમાં ચોંકાવનારો ખુલાસો સામે આવ્યો છે. શ્રદ્ધા મર્ડર કેસમાં ગુજરાત કનેક્શન સામે આવ્યું છે. મર્ડર કેસના આરોપી આફતાબને ડ્રગ પહોંચાડનાર પેડલર સુરતનો હોવાનું સામે આવ્યું છે. આફતાબને ડ્રગ પહોંચાડનાર પેડલર ફૈઝલ મોમીનની સુરત ક્રાઇમ બ્રાન્ચે 4 દિવસ પહેલાં જ ધરપકડ કરી હતી.

ફૈઝલ મોમીનના કોલ રેકોર્ડની તપાસ કરાશે
જોકે ફૈઝલ મોમીન આફતાબને ડ્રગ પહોંચાડતો હોવાથી હવે ફૈઝલ મોમીનના કોલ રેકોર્ડની પણ તપાસ કરાશે. સુરત ક્રાઇમે પાંડેસરા અને અમરોલીમાં 4 કરોડના ડ્રગ કેસમાં મુંબઇથી ફૈઝલની ધરપકડ કરી હતી. ફૈઝલ મોમીન હાલ સુરતની લાજપોર જેલમાં છે.

તમને જણાવી દઇએ કે, ફૈઝલ મોમીન મુંબઈના વસઈ વેસ્ટમાં એ જ વિસ્તારમાં રહેતો હતો કે જ્યાં આફતાબ શ્રદ્ધા સાથે દિલ્હી શિફ્ટ થતાં પહેલાં ભાડે રહેતો હતો. સૂત્રોના જણાવ્યા અનુસાર, વસઈ પોલીસની તપાસમાં આફતાબ ફૈઝલ મોમીનના ઘરે અને તેના વિસ્તારમાં ઘણી વખત ગયો હોવાની માહિતી સામે આવી છે. ફૈઝલ ​​અને આફતાબના ઘણા કોમન મિત્રો છે. ત્યારે પોલીસ હવે ફૈઝલના કોલ રેકોર્ડની તપાસ કરશે જેથી આફતાબ તેના સંપર્કમાં કેવી રીતે આવ્યો તે અંગે મોટો ખુલાસો થઇ શકે.

આફતાબ ડ્રગ્સનું સેવન કરતો
ઉલ્લેખનીય છે કે, આફતાબ અને શ્રદ્ધાના ઘણા મિત્રોએ પોલીસ પૂછપરછમાં એમ જણાવ્યું છે કે આફતાબ ડ્રગ્સનું સેવન કરતો હતો. અગાઉ પણ અહેવાલોમાં એમ કહેવામાં આવ્યું હતું કે આફતાબ ડ્રગ એડિક્ટ હતો. તેણે પોલીસ પૂછપરછમાં પણ એવી કબૂલાત કરી છે કે તે ચરસ અને ગાંજાનું સેવન કરતો હતો અને તેને ડ્રગ્સની લત હતી.

આફતાબનો ફરીથી કરાશે પોલિગ્રાફ ટેસ્ટ
વધુમાં શ્રદ્ધા મર્ડર કેસ મામલે નવો ખુલાસો થયો છે. આરોપી આફતાબનો ફરીથી પોલિગ્રાફ ટેસ્ટ કરવામાં આવશે. અગાઉ 3 દિવસ પણ પોલિગ્રાફ ટેસ્ટ કરાયો હતો. હવે બાકીના પ્રશ્નો આરોપી આફતાબને પૂછવામાં આવશે. હાલમાં પોલીસ શ્રદ્ધાનો મોબાઈલ શોધવામાં નિષ્ફળ રહી છે.

જંગલમાંથી મળેલા હાડકાના DNA શ્રદ્ધાના પિતાના DNA સાથે મેચ!
મહત્વનું છે કે, દિલ્હી શ્રદ્ધા મર્ડર કેસમાં એક બાદ એક મોટા ખુલાસા સામે આવી રહ્યાં છે. છતરપુરના જંગલમાંથી મળેલા હાડકાના DNA શ્રદ્ધાના પિતાના DNA સાથે મેચ થયા છે. એ સ્પષ્ટ છે કે શ્રદ્ધાની હત્યા કરવામાં આવી છે અને જંગલમાંથી મળેલા હાડકાં માત્ર શ્રદ્ધાના જ છે. તાજેતરમાં જ પોલીસે જંગલમાં શોધખોળ દરમિયાન કેટલાંક હાડકાં મળ્યાં હતાં. આ પછી ફોરેન્સિક લેબમાં બ્લડ ક્લોટ અને આ હાડકાના ડીએનએ શ્રદ્ધાના પિતાના ડીએનએ સાથે મેચ થયા હતા. તેનો રિપોર્ટ હવે ફોરેન્સિક લેબ દ્વારા જાહેર કરવામાં આવ્યો છે. ફોરેન્સિક ટીમે સત્તાવાર રિપોર્ટ જાહેર કરવામાં હજુ બેથી ચાર દિવસનો સમય લાગી શકે છે. તેની તપાસમાં ફોરેન્સિકે પણ પુષ્ટિ કરી છે.