VTV Exclusive / હાર્દિક પટેલનું મોટું નિવેદન : ભાજપની ખેતી લીલીછમ તે કોંગ્રેસના કેટલાંક 'ગદ્દાર' લોકોની દેન, લિસ્ટ તૈયાર હોવાનો દાવો

• કોંગ્રેસ પક્ષમાં ‘ગદ્દારો’ કોણ છે?
• કોંગ્રેસના ‘ગદ્દાર’ નેતાઓનું લીસ્ટ તૈયાર છે!
• હાર્દિક પટેલનો કોંગ્રેસના નેતાઓ પર મહાઆરોપ

પાર્ટી વિરૂદ્ધમાં કોંગ્રેસના લોકો જ કામ કરે છે

ગુજરાતમાં સ્થાનિક સ્વરાજની ચૂંટણીને હવે ગણતરીના દિવસો બાકી છે ત્યારે કોંગ્રેસ અને ભાજપ બંને પોતાનું એડીચોંટીનું જોર લગાવી રહ્યા છે. જોકે આ ચૂંટણી પહેલા કોંગ્રેસમાં જૂથબંધીને લઈને અનેક આરોપો લાગ્યા હતા ત્યારે VTV ન્યૂઝ સાથે વાતચીતમાં ગુજરાત કોંગ્રેસના કાર્યવારી અધ્યક્ષ હાર્દિક પટેલે પોતાની જ પાર્ટીના અમુક નેતાઓને લઈને મોટું નિવેદન આપ્યું હતું. 

EXCLUSIVE : Hardik Patel નું મોટું નિવેદન : ભાજપની ખેતી લીલીછમ રાખવાનું કોઈ કામ કરતું હોય છે તે કોંગ્રેસના અમુક ગદ્દાર લોકો છે.@HardikPatel_ #VTVExclusive @BJP4Gujarat @INCGujarat @AmitChavdaINC @RahulGandhi pic.twitter.com/itUubBIZaD

— VTV Gujarati News and Beyond (@VtvGujarati) February 17, 2021

રાહુલ ગાંધી અને પ્રિયંકા ગાંધી બધુ જાણે છે : હાર્દિક પટેલ 

નોંધનીય છે કે કોંગ્રેસમાં વિરુદ્ધમાં કામ કરનારાઓનું લીસ્ટ તૈયાર હોવાનો દાવો પણ હાર્દિક પટેલ દ્વારા કરવામાં આવ્યો હતો. હાર્દિક પટેલે કહ્યું હતું કે પાર્ટીને બદનામ કરનારા ઘણા લોકો પાર્ટીમાં છે અને ભાજપની ખેતીને લીલીછમ રાખવાનું કામ કોંગ્રેસના જ કેટલાક ગદ્દાર નેતાઓ કરે છે. તેમણે વધુમાં કહ્યું કે કોંગ્રેસમાં ગદ્દારો કોણ છે તેની રાહુલ ગાંધી અને પ્રિયંકા ગાંધીને જાણ છે અને પાર્ટી હાઇકમાન્ડ બધુ જ જાણે છે. 

સત્તા આવે કે ના આવે જનતાની સેવા કરીશું : હાર્દિક પટેલ 

હાર્દિક પટેલે કહ્યું કે પાર્ટીની વિરુદ્ધ જે કામ કરી રહ્યા છે તેમની સામે પગલા લેવામાં આવશે. ગુજરાતમાં સ્થાનિક સ્તર પર પાર્ટીના નેતાઓ ભાજપ સાથે સાંઠગાંઠ ધરાવે છે તેવો આરોપ પણ તેમણે લગાવ્યો હતો. જોકે તેમણે કહ્યું કે આપણે લડવું હોય તો જનતાની સેવા કરવી જ પડશે. તેમણે કહ્યું કે સત્તા આવે કે ન આવે જનતા સેવા માટે અમે પ્રયાસ કરી રહ્યા છે.