રિસોર્ટ પોલિટિક્સ / રાજ્યસભા ચૂંટણી પહેલા કોંગ્રેસને ધારાસભ્યો તૂટવાનો ડર, આ 19 MLAને રાજસ્થાનના રિસોર્ટમાં રખાયા

• રાજ્યસભા ચૂંટણી પહેલા કોંગ્રેસના ધારાસભ્યોને લઇ જવાયા રિસોર્ટમાં
• કોંગ્રેસને હજુ પણ પોતાના ધારાસભ્યો તુટવાનો ડર 
• કોંગ્રેસે પોતાના 19 ધારાસભ્યોને રાજસ્થાનના વાઇલ્ડ વિંડસ રિસોર્ટ લઇ ગઇ

ગુજરાત રાજ્યસભા ચૂંટણીની 4 બેઠકો માટે 19 જૂને ચૂંટણી યોજાવાની છે. જેમાં ભાજપના 3 ઉમેદવાર અને કોંગ્રેસના 2 ઉમેદવાર ચૂંટણી જંગમાં છે. તેવામાં કોંગ્રેસના 3 જેટલા ધારાસભ્યોના રાજીનામા પડતા હવે કોંગ્રેસ પોતાના ધારાસભ્યોને બચાવવા મથી રહી છે. કોંગ્રેસના 3 ધારાસભ્ય જીતુ ચૌધરી, અક્ષય પટેલ અને બ્રિજેશ મેરજાએ કોંગ્રેસમાંથી રાજીનામાં આપ્યા છે. તેવામાં કોંગ્રેસને હજુ વધુ ધારાસભ્યો તૂટવાનો ડર સતાવી રહ્યો છે, જેને લઇને ચૂંટણી પહેલા 19 ધારાસભ્યોને તે રાજસ્થાનના વાઇલ્ડ વિંડસ રિસોર્ટમાં રાખવામાં આવ્યા છે.

આ ધારાસભ્યોને રાજસ્થાનના રિસોર્ટમાં રખાયા

ગુજરાત કોંગ્રેસના નેતા સિદ્ધાર્થ પટેલની દેખરેખમાં લાવવામાં આવેલ ધારાસભ્યોમાં ચંદન ઠાકોર, ભરત ઠાકોર, ગેનીબેન ઠાકોર, શિવાભાઇ ભૂરિયા, ગુલાબસિંહ રાજપૂત, કાંતિ ખરાડી, સી.જે ચાવડા, બલદેવ ઠાકોર, ઋત્વિક મકવાણા, રાજેશ ગોહિલ, મહેશ પટેલ, રાજેન્દ્રસિંહ ઠાકોર, અશ્વિન કોટવાલ, વજેસી પણદા, જશૂભાઇ પટેલ, નૌશાદ સોલંકી, લખભાઈ ભરવાડ, નાથાભાઇ પટેલ અને સુરેશ પટેલ સામેલ છે.

કોંગ્રેસની પાસે બચ્યા છે 65 ધારાસભ્ય

પોતાના ત્રણ ધારાસભ્યોના રાજીનામા બાદ કોંગ્રેસ પોતાના ધારાસભ્યોને અલગ અલગ રિસોર્ટમાં લઇ ગઇ છે. 182 સભ્યોની વિધાનસભામાં હવે કોંગ્રેસ પાસે 65 ધારાસભ્યો જ છે.

કોંગ્રેસ ધારાસભ્યોના રિસોર્ટ પર રાજસ્થાન પોલીસનો પહેરો 

કોંગ્રેસ ધારાસભ્યોના રિસોર્ટ પર રાજસ્થાન પોલીસે પહેરો આપવાનું શરૂ કર્યુ છે. આબુ રોડ પર DySP પોતાની ટીમ સાથે વાઈલ્ડ વીન્ડ્સ રિસોર્ટ પહોંચ્યા છે. સ્થાનિક ભાજપના નેતાઓની ફરીયાદને લઇને તેઓ ત્યાં પહોંચ્યા છે. જાહેરનામા ભંગ અંગે મૌખિક ફરિયાદો કરવામાં આવતા પોલિસ રિપોર્ટ પર પહોંચી છે. આ રિસોર્ટમાં ધારાસભ્યોના રોકાણ અંગે DySPએ નિવેદન આપ્યું છે. તેમાં તેમણે જણાવ્યુ છે કે જાહેરનામા ભંગ અંગે કોઈ લેખિત ફરિયાદ મળી નથી. 8 તારીખ પહેલા રિસોર્ટમાં ધારાસભ્યો રાખવામાં આવતા ચહલ પહલ શરૂ થઇ છે. અનલૉક-1 માં 8 જૂન બાદ રિસોર્ટ ખોલવાની મંજૂરી આપવામાં આવશે. કોંગ્રેસના ધારાસભ્યોને 6 જૂનથી વાઈલ્ડ વીન્ડ્સ રિસોર્ટમાં રાખવામાં આવ્યાં છે.