રાજ્યસભા ચૂંટણી / ક્રોસ વોટિંગનાં ડરે કોંગ્રેસમાં ઉથલ પાથલ, આખરે શું છે 2017નાં પુનરાવર્તન પાછળની મનઃસ્થિતિ!

ગુજરાતની રાજ્યસભાની બે બેઠકો માટે પાંચ જુલાઈએ ચૂંટણી યોજાઈ રહી છે. ત્યારે રાજ્યસભામાં ચોખ્ખી હાર ભાળી ગયેલી કોંગ્રેસ 2017નાં ઘટનાક્રમનું જાણે પુનરાવર્તન કરવા જઈ રહી છે. મતદાન પૂર્વે ધારાસભ્યો તૂટવાનાં ડરે કોંગ્રેસ તમામ ધારાસભ્યોને રાજ્ય બહાર કે રાજ્યમાં જ કોઈ અજ્ઞાત ખૂણે લઈ જવા પ્લાન બનાવી રહી છે. ત્યારે ઠીક રાજયસભા ચૂંટણી પહેલા કેવી છે કોંગ્રેસની મનઃસ્થિતિ અને કોંગ્રેસ કેવું કરવા માગે છે ચિંતન મનન. તે જોઈએ આ અહેવાલમાં.

પાંચ જુલાઈએ યોજાનારી રાજયસભાની ચૂંટણી પહેલા કોંગ્રેસમાં ઉથલ પાથલ શરૂ થઈ ગઈ છે. કોંગ્રેસે પોતાનાં હેડક્વાર્ટરથી પક્ષનાં તમામ ધારાસભ્યોને વ્હીપ આપવાનું શરૂ કર્યું છે. જેને પગલે કોંગ્રેસનાં દંડક અશ્વિન કોટવાલ, સી.જે.ચાવડા, ગેની બહેન ઠાકોર અને બળદેવજી ઠાકોર સહિતના નેતાઓ વ્હીપ આપવા એમએલએ ક્વાર્ટરમાં અલ્પેશ ઠાકોર અને ધવલસિંહ ઝાલાનાં ઘરે પહોંચ્યા હતાં. પરંતુ અલ્પેશ ઠાકોર ઘરે હાજર ન હોવાથી તેમના નિવાસસ્થાનની બહાર વ્હીપ લગાવી દેવામાં આવ્યું છે.

કોંગ્રેસમાંથી ચૂંટાયેલા રાધનપુરનાં ધારાસભ્ય અલ્પેશ ઠાકોર અને ધવલસિંહ ઝાલા જો વ્હીપનો અનાદર કરીને ભાજપનાં ઉમેદવારને મત આપશે તો 6 વર્ષ માટે તે ગેરલાયક ઠરશે. ઘણા મહિનાઓ પહેલા સોશિયલ મીડિયા દ્વારા કોંગ્રેસમાંથી પોતાનું રાજીનામું આપનારા અલ્પેશ ઠાકોર ગમે તેમ કરીને કોંગ્રેસનાં ધારાસભ્ય પદે ચીપકી રહ્યાં છે. ત્યારે હવે કોંગ્રેસ દ્વારા તેમને અપાયેલા વ્હીપ સામે તેમનો કેવો વ્યૂહ રહેશે તેનાં પર કોંગ્રેસનાં નેતાઓની નજર છે.

એક તબક્કો આજનો દિવસ રાજ્યસભાની ચૂંટણીને લઈને અલ્પેશને ઘેરવા માટે કોંગ્રેસની રણનીતિથી ભરપૂર રહ્યો. કોંગ્રેસની રણનીતિ માત્ર રાધનપુરનાં ધારાસભ્ય અલ્પેશ ઠાકોરને ઊઘાડો પાડવા માટેની જ નહીં. પરંતુ અલ્પેશની તરજ પર ચાલનારા તમામ ધારાસભ્યોનાં વલણ જાણવાની કવાયતનો બની રહ્યો. તેમાં અલ્પેશનાં સમર્થનમાં ધારાસભ્ય ધવલસિંહ જોવા મળ્યાં. કોંગ્રેસ પોતાનાં ધારાસભ્યોને લઈને માઉન્ટ આબુ જશે તેવી એક સમયે વહેતી થયેલી અટકળો પર ધવલસિંહે ભારોભાર કટાક્ષ કર્યો અને પાર્ટીનું માઉન્ટ આબુ જવાના મુદ્દાને દારૂ સાથે જોડી દીધો. એટલું જ નહીં ધવલસિહે કહ્યું કે પોતાને હજુ સુધી પક્ષનો વ્હીપ મળ્યો નથી.

નારાજ કોંગ્રેસીઓ અને વ્યૂહકાર કોંગ્રેસીઓ વચ્ચે રાજ્યસભા ચૂંટણીમાં ભાજપ સામે લડતા પહેલા અંદરો અંદર આબુ અને દારૂનાં મુદ્દે ધમાસાણ શરૂ થઈ ગયું. આબુ જવા મુદ્દે અલ્પેશ ઠાકોરે પણ કોંગ્રેસી વ્યૂહકારોની કોમેન્ટ કરી અને તેમણે કોંગ્રેસનાં આ આયોજનને વેકેશન એન્જોય સાથે જોડીને આડકતરી રીતે દારૂ સાથે જોડી દીધો. તો ધારાસભ્ય લલિત વસોયાએ પણ અલ્પેશ ઠાકોરને તેમની જ ભાષામાં જવાબ આપ્યો.

લલિત વસોયાએ અલ્પેશ પર પ્રહાર કરતાં કહ્યું કે, અલ્પેશભાઈને પણ ખબર છે કે ગુજરાતમાં જોઈએ તે બ્રાન્ડનો દારૂ મળે છે. રાજ્યસભાની બે બેઠકોની ચૂંટણી આડે હવે માત્ર બે દિવસ બાકી રહ્યાં છે. ત્યારે હજુ કોંગ્રેસ રાજ્યસભાની ચૂંટણીમાં નવોદીત ધારાસભ્યોએ કેવી રીતે મતદાન કરવું તે અંગેનો મોકપોલ અને વર્ક શોપ ક્યાં યોજવો તેની મથામણમાં છે. ત્યારે હાલ તો કોંગ્રેસનાં ભાજપ સામે લડવાની તૈયારીનાં બદલે આંતરિક લડાઈમાં જ વ્યસ્ત જણાઈ રહી છે.