રાજનીતિ / કોંગ્રેસના આ ધારાસભ્યએ આપી ભાજપને ચેલેન્જ, જો હું 25 લાખ કરોડમાં પણ વેચાઉં તો...

• કોંગ્રેસના ધારાસભ્ય વિક્રમ માડમનું મોટું નિવેદન
• કોઇનામાં તાકાત હોય તો મને ખરીદીને બતાવોઃ માડમ
• જે વેચાયેલા ધારાસભ્ય હોય તેના દિકરાને યાદ અપાવોઃ માડમ

જામનગરના કોંગ્રેસના ધારાસભ્ય વિક્રમ માડમે ભાજપ પર પ્રહાર કર્યાં. તેમણે કહ્યું હતું કે ભાજપ પાસે ધારાસભ્યો ખરીદવા પૈસા છે પરંતુ ઘઉં-ચોખા ખરીદવા પૈસા નથી. ખેડૂતો પર તીડ, લૉકડાઉન જેવી મુશ્કેલીઓ છે ત્યારે ભાજપ ધારાસભ્ય ખરીદી રહી છે. વિક્રમ માડમે કહ્યું કે ભાજપમાં તાકાત હોય તો મને ખરીદીને બતાવે.

વિક્રમ માડમે કહ્યું કે, 25 કરોડ નહીં 25 લાખ કરોડ લાવો તો પણ હું ન વેચાઉં. જો હું વેચાઉં તો મારા છોકરાના માથા પર લખી દેજો. જે વેચાયેલા ધારાસભ્ય હોય તેના દિકરાને યાદ અપાવો. વેચાયેલા ધારાસભ્યો લોકશાહીના હત્યા કરી રહ્યા છે. મહત્વનું છે કે, VTVના મહામંથનમાં મુખ્યમંત્રી રૂપાણીએ ટોણો મારતા કહ્યું હતું કે, 25 કરોડમાં તો આખી કોંગ્રેસ આવી જાય.

થોડા મહિના અગાઉ પણ વિક્રમ માડમે ભાજપ સાથે સંપર્ક હોવાના મુદ્દે પ્રતિક્રિયા આપી હતી. તેમાં તેમણે જણાવ્યુ હતું કે મારા 72 કટકા થાય તો પણ કમલમ્ નહીં જાવ. મને કોઈએ ધમકાવ્યો નથી અને મને કોઈને લલચાવ્યો નથી. મારા દિલમાંથી કોંગ્રેસને કોઈ કાઢી ન શકે.

19 જૂને રાજ્યસભાની ચાર બેઠક માટે ચૂંટણી યોજાશે. ત્યારે રાજ્યમાં કોંગ્રેસ તૂટતી હોય તેવા ઘાટ સર્જાયા છે. આ સમયે એક પછી એક કોંગેસ ધારાસભ્યોના રાજીનામા આપી રહ્યાં છે. ત્યારે સૌરાષ્ટ્રમાં કોંગ્રેસ પાસે 18, ભાજપ પાસે 23 અને NCP પાસે 1 બેઠક છે. હાલમાં રાજ્યમાં કોંગ્રેસ પાસે 65 ધારાસભ્યોનું સંખ્યાબળ છે. ત્યારે બે બેઠકો પર જીત મળે તે માટે કોંગ્રેસ દ્વારા પ્રયાસ કરવામાં આવી રહ્યા છે.