ગુજરાત કોંગ્રેસના કાર્યકારી અધ્યક્ષ હાર્દિક પટેલની ગુજરાત બહાર જવાની મંજૂરી વાળી અરજી કોર્ટે ફગાવી દીધી. હાર્દિક પટેલે રાજ્ય બહાર જવાની મંજૂરી માટે સેશન કોર્ટમાં અરજી કરી હતી. ગુજરાતથી બહાર ન જવાની શરતે જ હાર્દિકને રાજદ્રોહના ગુનામાં જામીન મળ્યા છે.
હાર્દિક પટેલને અમદાવાદ સેશન્સ કોર્ટનો ઝટકો
ગુજરાત બહાર જવાની અરજી સેશન્સ કોર્ટે ફગાવી
રાજ્ય બહાર દિલ્હી જવા માટે માગી હતી મંજૂરી
હાર્દિક પટેલ વિરૂદ્ધ પાટીદાર અનામત સમર્થક રેલી બાદ થયેલી હિંસા મામલે દાખલ કરવામાં આવેલ રાજદ્રોહના કેસમાં તેમની ધરપકડ થઇ હતી. બાદમાં તેમને જામીન મળી ચૂક્યા હતા. હવે હાર્દિક પટેલે કોર્ટમાં અરજી આપીને ગુજરાત બહાર જવાની મંજૂરી માંગી છે જેને કોર્ટે ફગાવી દીધી છે. કોર્ટનું કહેવું છે કે, ગુજરાત બહાર નહીં જવાની શરતે જ જામીન આપવામાં આવ્યા છે.
હાર્દિકના રાજ્ય બહાર જવાથી શાંતિ ભંગ થવાનો ભય: સરકાર
હાર્દિક પટેલની સેશન્સ કોર્ટમાં અરજી પર આજે ચુકાદો આવી ચૂક્યો છે. હાર્દિક પટેલે રાજ્ય બહાર જવાની માગ કરી હતી. આ ગુજરાત બહાર જવાની અરજી સેશન્સ કોર્ટે ફગાવી છે. મહત્વનું છે કે, રાજ્ય સરકારે હાર્દિકની અરજીનો વિરોધ કર્યો હતો. સરકારે કહ્યું હતું કે હાર્દિક પટેલના રાજ્ય બહાર જવાથી શાંતિ ભંગ થવાનો ડર છે. હાર્દિક પટેલે દિલ્હી સહિતના રાજ્યોમાં જવાની માગ સાથે અરજી કરી હતી.
જણાવી દઇએ કે 25 ઓગસ્ટ 2015એ અમદાવાદમાં જીએમડીસી મેદાનમાં પાટીદાર અનામત આંદોલન રેલી યોજાઇ હતી. આ રેલી બાદ રાજ્યભરમાં તોડફોટ અને હિંસાની ઘટનાઓ સામે આવી હતી. ત્યાર બાદ ક્રાઇમબ્રાંચે એજ વર્ષના ઓક્ટોબરમાં એક કેસ દાખલ કર્યો હતો. પોલીસે પોતાના ગુનાપત્રમાં હાર્દિક પટેલ અને તેમના કેટલાક સહયોગીઓ પર હિંસા ફેલાવવા અને સરકાર તોડી પાડવાના ષડયંત્રનો આરોપ લાગ્યો હતો.