રાજનીતિ / 'હાર્દિકને બોલાવીને ખુલાસો લઇશું' : જગદીશ ઠાકોર હાર્દિક પટેલના નિવેદનથી થયા નારાજ

• હાર્દિક પટેલના નિવેદન અંગે જગદીશ ઠાકોરની પ્રતિક્રિયા
• કોંગ્રેસ સામેથી એમને લેવાની વાત કરતી હોય ત્યારે અપમાન નથીઃ જગદીશ ઠાકોર
• મારા જેવું નરેશભાઈ સાથે ના થવું જોઈએઃ હાર્દિક પટેલ

રાજકારણમાં જોડાવું કે નહીં તે અંગે 20 એપ્રિલ પહેલા નરેશ પટેલ જાહેરાત કરશે. 15 એપ્રિલે સર્વેના પરિણામ બાદ જાહેરાત કરી શકે છે. નરેશ પટેલ કોંગ્રેસ, ભાજપ અને AAPના નેતાઓ સાથે કરી બેઠકો ચૂક્યા છે. આ વચ્ચે નરેશ પટેલના રાજકીય પ્રવેશ અંગે હાર્દિક પટેલે કરેલી ટિપ્પણીનો મામલો ગરમાયો છે. ગુજરાત પ્રદેશ પ્રમુખ જગદીશ ઠાકોર હાર્દિક પટેલના નિવેદનથી નારાજ હોવાનું સામે આવી રહ્યું છે.

નરેશભાઈ નિર્ણય ના લે ત્યાં સુધી કોંગ્રેસ ખુલાસો ના કરી શકેઃ જગદીશ ઠાકોર
કોંગ્રેસ પ્રદેશ પ્રમુખ જગદીશ ઠાકોરે હાર્દિકના નિવેદન પર પ્રતિક્રિયા આપી છે. જગદીશ ઠાકોરે કહ્યું કે, હાર્દિક પટેલ પાસેથી ખુલાસો લેવામાં આવશે. હાર્દિક પટેલને બોલાવીને તેમના નિવેદન અંગે પૂંછીશું. નરેશ પટેલ જેવા સારા વ્યક્તિનું કોંગ્રેસમાં સ્વાગત છે. કોંગ્રેસ સામેથી એમને લેવાની વાત કરતી હોય ત્યારે અપમાન નથી. નરેશ પટે સમાજના કહેવા મુજબ રાજનીતિમાં આવવાનો નિર્ણય લેશે. જ્યાં સુધી નરેશભાઈ નિર્ણય ના લે ત્યાં સુધી કોંગ્રેસ ખુલાસો ના કરી શકે. હાર્દિક પટેલનો પોતાનો વિચાર હોઈ શકે છે. ક્યારે નિર્ણય લેવો એ નરેશભાઇ નક્કી કરશે.

હાર્દિક પટેલે શું કહ્યું હતું...

કોંગ્રેસના નેતા હાર્દિક પટેલ હવે વિધાનસભાની ચૂંટણી લડી શકશે. સુપ્રીમકોર્ટે હાર્દિક પટેલને ચૂંટણી લડવાની મંજૂરી આપી છે.  હાર્દિક પટેલને સુપ્રીમકોર્ટ તરફથી રાહત મળ્યા બાદ તેમને ચૂંટણી લડવાની ઇચ્છા વ્યક્ત કરી હતી. હાર્દિક પટેલે જણાવ્યું છે કે હું ચૂંટણી લડીશ એ નક્કી છે પણ ક્યાંથી લડીશ તે હાલ નક્કી નથી. આ સાથે હાર્દિક પટેલે નરેશ પટેલના રાજકીય પ્રવેશને લઇને થતા વિલંબ પર સવાલ ઉઠાવ્યા હતા. આ મામલે કોંગ્રેસ હાઇકમાન્ડને ત્વરિત નિર્ણય લેવા માટે પણ જણાવ્યુ હતું.

લોકસભા અને તાલુકા-જિલ્લાની ચૂંટણીમાં પણ અમારો ઉપયોગ ન થયોઃ હાર્દિક પટેલ
રાજ્યમાં ચૂંટણીના માહોલ વચ્ચે હાર્દિક પટેલે સૂચક નિવેદન આપ્યું હતું. હાર્દિક પટેલે કહ્યું હતું કે, 2017 પછી મારો ક્ષમતા મુજબ ઉપયોગ નથી થયો. પાટીદાર આંદોલનથી કોંગ્રેસને ફાયદો થયો હતો. કોંગ્રેસે અમારી ક્ષમતા મુજબ યોગ્ય ઉપયોગ ન કર્યો. કોંગ્રેસના લોકો માને છે કે અમારો ઉપયોગ ન થયો. હું માનું છું કે અમારો ઉપયોગ થવો જોઈતો હતો. લોકસભા અને તાલુકા-જિલ્લાની ચૂંટણીમાં પણ અમારો ઉપયોગ ન થયો.

મારા જેવું નરેશભાઈ સાથે ના થવું જોઇએઃ હાર્દિક પટેલ
નરેશ પટેલ અંગે હાર્દિકે કહ્યું હતું કે, નરેશ પટેલનો પણ તેમની ક્ષમતા મુજબ ઉપયોગ થવો જોઇએ. નરેશ પટેલ પાર્ટીમાં આવે તો તેનો સારી રીતે ઉપયોગ થાય. મારા જેવું નરેશભાઈ સાથે ના થવું જોઈએ. નરેશ પટેલ મુદ્દે કોંગ્રેસ હાઇકમાન્ડ ત્વરિત નિર્ણય લે. નરેશ પટેલને લેવામાં કેમ આટલો વિલંબ થઈ રહ્યો છે તે એક સવાલ. નિર્ણય લેવામાં વિલંબ થતા નરેશ પટેલની છબીને નુકસાન થાય છે.