શીતલહેર / ઉત્તર ભારતમાં બરફવર્ષાથી ગુજરાતમાં ઠંડીનો ચમકારોઃ નલિયામાં સૌથી નીચું 6 ડિગ્રી તાપમાન

• ગુજરાતમાં ઠંડીનો ચમકારો યથાવત
• ઉત્તર ભારતમાં બરફવર્ષાથી ઠંડી વધી
• નલિયામાં સૌથી નીચુ 6 ડિગ્રી તાપમાન

મહાનગરોમાં પણ સરેરાશ 12 ડિગ્રી કે તેથી નીચા તાપમાન નોંધાયા છે.. હવામાન વિભાગની આગાહી મુજબ આગામી દિવસોમાં ઠંડી વધશે.
 

હવામાન વિભાગની આગાહી મુજબ ગુજરાતમાં આગામી દિવસમાં ફરી ઠંડીનું જોર વધશે. રાજ્યના મહાનગરો સહિત કેટલાક શહેરોમાં તાપમાનનો પારો ગગડશે. હાલ ઉથ્તર ભારતમાં બરફવર્ષા થઇ હતી. જેના કારણે ઉત્તર ભારતમાં શીત લહેર જોવા મળી રહી છે. 

 

આમ ઉત્તર ભારતમાં પડી રહેલી હિમવર્ષાની અસર રાજ્યના વાતાવરણમાં પણ જોવા મળી રહી છે. રાજ્યના મહાનગરોમાં સરેરાશ 12 ડિગ્રી કે તેથી નીચું તાપમાન નોંધાયું છે. રાજ્યમાં સૌથી નીચું 6 ડિગ્રી તાપમાન નલિયા ખાતે નોંધાયું છે. 

રાજ્યના શહેરોના તાપમાનની વાત કરીએ તો અમદાવાદમાં 13, ગાંધીનગરમાં 12 અને વડોદરામાં 14 ડિગ્રી તાપમાન નોંધાયું છે. જ્યારે રાજકોટમાં 12, જૂનાગઢમાં 13, ડિસામાં 11 અને જામનગરમાં 14 ડિગ્રી તાપમાન નોંધાયું છે. 

ગઇકાલે બનાસકાંઠા જિલ્લામાં ઠંડા પવન સાથે હાડ થીજવતી ઠંડી જોવા મળી હતી. ડીસામાં ઠંડીનો પારો 10 ડિગ્રી સુધી ગગડ્યો હતો. જ્યારે માઉન્ટ આબુમાં ઠંડીનો પારો માઇનસમાં પહોંચ્યો હતો. આગામી દિવસોમાં ઠંડીનું પ્રમાણ વધવાની આગાહી છે. 

હવામાન વિભાગની આગાહી મુજબ ઉત્તર-પૂર્વના પવનોના કારણે રાજ્યમાં આગામી 3 દિવસમાં ઠંડીનું જોર વધશે. જ્યારે કચ્છમાં 2 દિવસ કોલ્ડવેવની આગાહી કરવામાં આવી હતી. રાજ્યમાં વાદળછાયું વાતાવરણ યથાવત જોવા મળશે.

જ્યારે બીજી તરફ અમદાવાદમાં વહેલી સવારે ઠંડીનો ચમકારો જોવા મળતા લોકો મોર્નિંગ વોક કરવા માટે નીકળ્યા છે. લોકો શહેરના ગાર્ડન, રિવરફ્રન્ટ પર મોર્નિંગ વોક માટે પહોંચ્યા છે. રિવરફ્રન્ટ પર વોકિંગ સાથે સાઇક્લિંગ, સ્કેટિંગનો પણ ક્રેઝ જોવા મળી રહ્યો છે. જ્યારે અન્ય લોકો યોગ કરતા પણ જોવા મળ્યાં.