વિધાનસભા / મુખ્યમંત્રી રૂપાણીના કાફલા માટે નવી કાર માટે કરાઈ માંગણી, જાણો કેટલો થશે ખર્ચ

• મુખ્યમંત્રીના કોન્વોયમાં નવી કારો ખરીદવા માંગ
• રાજ્યપાલ અને પોલીસ દળના વાહનો બદલવા માંગ
• ગૃહ વિભાગ દ્વારા વિધાનસભામાં ખર્ચ કરવાની માંગણી કરાઇ

થોડા સમય અગાઉ ગુજરાતના મુખ્યમંત્રી માટે રૂપિયા 197 કરોડના ખર્ચે પ્લેન ખરીદવામાં આવ્યું હતું. ત્યારે હવે વર્ષ 2020-21ના અંદાજપત્રમાં મુખ્યમંત્રીની સુરક્ષા માટે વાહન ખરીદી હેઠળ રૂપિયા 1.44 કરોડનો ખર્ચ અંદાજ લગાવવામાં આવ્યો છે. જ્યારે રાજ્યપાલની સુરક્ષા માટેના વાહનો ખરીદવા રૂપિયા 3.12 કરોડનો ખર્ચ અંદાજવામાં આવ્યો છે. જ્યારે પોલીસ દળમાં જૂના વાહનો સામે નવા વાહનો ખરીદવા રૂપિયા 61.21 કરોડની માંગણી કરવામાં આવી છે.

મળતી માહિતી અનુસાર, ગુજરાતની રૂપાણી સરકાર હવે ગુજરાત સરકારના અધિકારીઓ અને કર્મચારીઓને ગાડી ખરીદવા માટે હવે 10 લાખ રૂપિયા અને ટુ વ્હિલર વાહન ખરીદવા માટે 75,000 રૂપિયા એડવાન્સ પેટે આપવા તૈયાર થઇ છે. ત્યારે રૂપાણી સરકારના આ નિર્ણયની ક્યાંક પ્રશંસા તો ક્યાંક ટીકા પણ થઈ રહી છે.

મુખ્યમંત્રી માટે રૂપિયા 197 કરોડના ખર્ચે પ્લેન ખરીદાયું હતું

ગુજરાત સરકારે મુખ્ય પ્રધાન વિજય રૂપાણી અને અન્ય મહાનુભાવોના ઉપયોગ માટે રૂા. 191 કરોડના ખર્ચે નવા વિમાનની ખરીદી કરી હતી. રાજ્ય સરકારે ૨૦ વર્ષ બાદ નવું ઍરક્રાફ્ટ ખરીદાયું છે.

આ નવા પ્લેનથી મુખ્યમંત્રી હવે લાંબા અંતરની મુસાફરી કરી શકશે. નવું વિમાન 12 મુસાફરોને લઇ જવામાં સક્ષમ છે અને તેની ફ્લાઇંગ રેન્જ 7000 કિલોમીટર જેટલી છે. તે લગભગ 870 કિલોમીટર પ્રતિ કલાકની ઝડપે ઊડી શકે છે. સરકારે ખરીદેલા બૉમ્બાર્ડિયર ચેલેન્જર 650માં ઇવસ્ટાર હૉટલના મિટિંગરૂમ જેવી વર્લ્ડ ક્લાસ લેવલની આલીશાન કૅબિનની સુવિધા છે.