ચોમાસું / 6.22 લાખ હેક્ટર ખરીફ પાકનાં વાવેતર સાથે કચ્છ રાજ્યમાં અવ્વલ નંબરે

• ગત વર્ષની તુલનાએ જિલ્લામાં 3.30 લાખ હેક્ટરમાં ખરીફ પાકનું વાવેતર
• ઓગસ્ટનાં અંતમાં 4.10 લાખ અને અત્યારે 6.22 લાખ હેક્ટર જમીનમાં વાવેતર

કચ્છમાં પાછલા ત્રણ વર્ષના દુકાળનું સાટું વાળતો હોય તેમ આ વર્ષે લગભગ 100 ટકા વરસાદ નોંધાયો છે. તેની સીધી અસર ખરીફ પાક (kharif crops) ની વાવણીમાં જોવા મળી છે. રાજ્યમાં અલગ અલગ જિલ્લામાં થયેલા વાવેતરમાં કચ્છ સૌથી વધુ વાવેતર સાથે મોખરે છે. અહીં ઓગસ્ટ મહિનામાં પડેલા ધોધમાર વરસાદના પગલે વાવેતર વિસ્તારમાં ખૂબ વધારો થયો છે. હજુ પણ તેમાં વધારો થઇ રહ્યો છે.

આ વર્ષે શરૂઆતનાં દિવસોમાં કચ્છ (Kutch) માં ચોમાસુ બરાબર જામ્યું ન હતું. તેથી ખેડૂતો ચિંતામાં હતા પરંતુ પાછળથી મેઘરાજાએ હેત વરસાવતા સ્થિતિ પલટાઇ ગઇ હતી. ઓગસ્ટના અંતમાં 4.10 લાખ હેક્ટર જમીનમાં વાવેતર થયું હતું પરંતુ ત્યાર પછી તેમાં સતત વધારો થતો રહ્યો હતો. અત્યારે 6.22 લાખ હેક્ટર જમીનમાં વાવેતર થઇ ગયું છે.

કચ્છમાં બાજરી, મગ, મઠ, મગફળી, તલ, દિવેલા. કપાસ, ગુવાર, શાકભાજી, જુવાર, રજકો, ઘાસચારો, મિંદિયાવળ અને શેરડીનાં પાકો મુખ્યત્વે લેવાય છે. રોકડિયા પાક તરીકે 1.33 લાખ હેક્ટરથી વધુમાં દિવેલા અને 51 હજારથી વધુ જમીનમાં પિયત કપાસનું વાવેતર (Planting) કરાયું છે. જો કે સૌથી વધુ વાવેતર ઘાસચારાનું 1.78 લાખ હેક્ટરમાં અને ઘાસચારા માટે જુવારનું 1.64 લાખ હેક્ટર જમીનમાં વાવેતર કરાયું છે.

આ વર્ષે સૌથી વધુ વાવેતર રાપર તાલુકામાં થયું છે. અહીં 1.65 લાખ હેક્ટર વાવેતર વિસ્તાર પૈકી 1.45 લાખ હેક્ટરથી વધુ જમીનમાં વાવેતર થયું છે જ્યારે સૌથી ઓછું ગાંધીધામ તાલુકામાં થયું છે. આ તાલુકાનો વાવેતર વિસ્તાર 5,200 હેક્ટરનો છે અને વાવેતર 3,395 હેક્ટરમાં થયું છે. કચ્છમાં 6.22 લાખ હેક્ટર, સુરેન્દ્રનગરમાં 6.03 લાખ હેક્ટર, બનાસકાંઠામાં 5.94 લાખ હેક્ટરમાં અને અમરેલીમાં 5.56 લાખ હેક્ટરમાં વાવેતર થયું છે. આમ સરવાળે કચ્છમાં સૌથી વધુ જમીનમાં વાવેતર થયું છે.

આ છે રાજ્યમાં સર્વાધિક વાવેતર વિસ્તાર ધરાવતા જિલ્લાઓ