અમદાવાદઃ ભારત રમત ગમત ક્ષેત્રમાં આગળ વધી રહ્યો છે. વિશ્વભરમાં કાર રેસનું અનેરું મહત્વ છે. ગુજરાતમાં ખેલકુંભ જેવા અનેક મહોત્સવ કરીને સરકાર રમતવીરોને આગળ આવવા આહવાન કરે છે. ત્યારે આજે એક એવા રમતવીરની વાત કરીશું જે સરકારી કચેરીના ધક્કા ખાઈને થાક્યા છે. પરંતુ અધિકારીઓ કાર રેસને રમતની સ્પર્ધા ન ગણતા હોય તેમ લાગી રહ્યું છે.
રમતવીરના રમતની દાસ્તાન અને સમસ્યાઓ....
કાર રેલીને વિશ્વભરમાં સાહસિક રમતમાં સ્થાન અપાયું છે. જ્યારે કોઈ કાર રેસ કરે ત્યારે તે જીવના જોખમે પણ રેસ જીતવાનો પ્રયાસ કરે છે. તેને જોઈને આપણને પણ સવાલ થાય કે કાશ આપણે પણ આવી રેસ કરી શકીયે. ત્યારે ગુજરાતના સુરેન્દ્રનગરના રેસર ભરત દવે જે આંતરરાષ્ટ્રીય કક્ષાની રમત રમવા માટે સરકારી કચેરીના ધરમધક્કા ખાય છે.
ભરત દવેએ કાર રેસમાં મેળવેલી સિદ્ધીઓ પર નજર કરીએ તો ભરતભાઈએ દુનિયાના સાહસિક એવા હિમાચલ આફ્રિકન સફારીની કાર રેસમાં ખિતાબ મેળવ્યો હતો. 1993માં ન્યુઝીલૅન્ડમાં યોજાયેલી રેસમાં પ્રથમ સ્થાન મેળવ્યું હતું. આ રેસમાં પ્રથમ ભારતીય હતા જે આ રેસ જીત્યા હતા. આ ઉપરાંત 5 વખત હિમાલયમાં યોજાતી કારરેસમાં દેશનું નામ રોશન કરી ચુક્યા છે. આગામી સમયમાં શિમલાથી ચાલુ થતી બહુ અધરી કાર રેસમાં ભાગ લેવાના છે.
પ્રધાનમંત્રી નરેન્દ્ર મોદીએ પણ ભરત દવેની રમતને દાદ આપી
66 વર્ષનાં ભરત દવે હજી પોતાનો જુસ્સા સાથે ગુજરાત તરફથી દાવેદારી કરવા આગળ આવી રહ્યાં છે. પરંતુ ભરત દવેએ પોતાની રમત માટે ગુજરાત સરકારમાં 1986થી અનેક રજૂઆતો કરી અનેક પત્ર વ્યવહાર કર્યા તેના જવાબ પણ તેમને સકારાત્મક મળ્યા પરંતુ હજુ સુધી તેમને તેમનું ફળ મળ્યું નથી. અનેક વાર રજૂઆત છતાં તેમને નિરાશા જ મળી છે. તત્કાલીન મુખ્યમંત્રી અને હાલના પ્રધાનમંત્રી નરેન્દ્ર મોદીએ પણ ભરત દવેની રમતને દાદ આપી હતી. રાજ્યના રમતવીરમાં તેમને એકલવ્ય એવોર્ડથી સન્માનિત પણ કરાયા હતા.
ભરત દવેને આર્થિક કે રેસમાં કોઈ લાભ લેવાની મહેચ્છા નથી. તેમની રજૂઆત છે કે તેમને શકિતદૂત યોજના હેઠળ લાભ મળે પંરતુ તેમની ફાઈલ એક વર્ષથી પેન્ડિંગ છે. તે રૂબરું મળવા જાય તો તેમને જવાબ મળે છે કે કારરેલી સ્પર્ધા રમત નથી ગણાતી. જો ખરેખર એ રમત ન હોય તો તેમને એકલવ્ય એવોર્ડ કેમ આપવામાં આવ્યો હતો? આવા અનેક સવાલો ઉભા થાય છે.
ગુજરાત સરકાર કેમ આ રમતને રમત નથી માનતી
ભરત દવે 66 વર્ષની ઉંમરે પણ દેશમાં ગુજરાતનું નામ થાય તે માટે સાહસિક રેસમાં ભાગ લેવાના છે. ત્યારે તેમને અનેક લોકો સ્પોન્સર્સ પણ કરી રહ્યા છે. પરંતુ તેમની ઈચ્છા છે કે અન્ય રાજ્ય તેમને સુવિધા આપે છે પણ ગુજરાત સરકાર કેમ આ રમતને રમત માનતી નથી.
સરકારના નિરસ વલણના કારણે આ રમતના રમતવીરો નીરસ થઈ રહ્યા છે. સરકાર આ જ રમતવીરોને કોઈ ખિતાબ બદલ અભિનંદન તો પાઠવે છે પણ સરકારી લાભ આપવાનો આવે છે ત્યારે પીછેહટ કરે છે.