નવી ગુજરાત સરકારમાં આજે મુખ્યમંત્રી ભૂપેન્દ્ર પટેલની અધ્યક્ષતામાં કેબિનેટ બેઠકનું આયોજન કરવામાં આવ્યું છે ત્યારે કોઈ મોટો નિર્ણય લેવાઈ શકે છે.
આજે રાજ્ય સરકારની મળશે બેઠક
CM ભૂપેન્દ્ર પટેલની અધ્યક્ષતામાં મળશે કેબિનેટ બેઠક
રાજ્યમાં કોરોનાની સ્થિતિ અંગે કરવામાં આવશે ચર્ચા
મંત્રીઓને ખાતું સોંપાયા બાદ પહેલી કેબિનેટ બેઠક
ગુજરાતમાં નવી સરકારનાં ગઠન બાદથી મુખ્યમંત્રી પટેલ તથા અન્ય કેબિનેટ મંત્રીઓ એક્શનમાં દેખાઈ રહ્યા છે. રાજ્યના મુખ્યમંત્રીનાં માથે ઓછા સમયમાં વધુ કામ કરી બતાવવાનો પડકાર છે ત્યારે આજે કેબિનેટ બેઠકનું આયોજન કરવામાં આવ્યું છે જેમા મોટા નિર્ણય લેવાઈ શકે છે.
આજે કયા વિષયો પર થશે ચર્ચા
રાજ્યમાં નવી સરકારમાં મંત્રીઓને ખાતાની વહેંચણી બાદ પહેલીવાર કેબિનેટ બેઠકનું આયોજન કરવામાં આવ્યું છે. મુખ્યમંત્રી ભૂપેન્દ્ર પટેલની અધ્યક્ષતામાં આયોજિત બેઠકમાં મંત્રીઓ પાસેથી કામ અંગે રિવ્યુ લેવામાં આવશે. આ સિવાય વરસાદની સ્થિતિ અંગે પણ ચર્ચા કરવામાં આવી શકે છે. થોડા દિવસ પહેલા જ વરસાદનાં કારણે સૌરાષ્ટ્રમાં ભારે નુકસાન થયું છે ત્યારે અતિવૃષ્ટિમાં થયેલ નુકસાન અંગે પણ રિપોર્ટ રજૂ કરી સર્વે અંગે કોઈ નિર્ણય લેવાઈ શકે છે.
કયા મોટા નિર્ણય પર રહેશે નજર?
રાજ્ય સરકારનાં મોટા નિર્ણયોની વાત કરવામાં આવે તો ધોરણ 1થી 5ની શાળાઓ શરૂ કરવાને લઈને કોઇ મોટો નિર્ણય લેવાઈ શકે છે. આ સિવાય રાજ્યમાં કોરોના વાયરસની પરિસ્થિતિને ધ્યાનમાં રાખી વર્તમાનમાં લાગુ નિયમોમાં ફેરફારને લઈને પણ કોઈ નિર્ણય લેવાઈ શકે છે.