લોકો વડે ચાલતા દેશમાં લોકોની ચક્કી કેવી પિસાય છે તેના દાખલા તમારી પાસે હજારો હશે. અમારી પાસે એક આવો દાખલો આવ્યો છે, તમને જોવો ગમશે અને થોડું દુઃખ પણ થશે.
આ બે તસવીરોમાં સ્થળનો મેળ ન શોધશો. પહેલી તસવીર રાજ્યકક્ષાના મંત્રીની છે. પહેલા રીક્ષા ચલાવતા હતા એટલે જૂના દિવસો યાદ આવ્યા અને ચૂંટણી પતી એટલે નિકળી પડ્યા. મંત્રી સરને હવે રીક્ષા ચલાવવાની જરૂર નથી, કારણ કે સરકારી ગાડી અને ધંધા રોજગાર સારા ચાલતા હોવાના કારણે પોતાની પણ સારી ગાડીમાં નેતા ફરી શકે છે. આમાં નસીબ રીક્ષાના છે કે મંત્રીને ફેરવવાનું સદભાગ્ય તેને મળ્યું.
બીજા દ્રશ્યો જુઓ છો તે એક કેબિનેટ મંત્રી કુંવરજી બાવળીયાનો મતવિસ્તાર છે. જસદણમાં છકડામાં લોકો ભરીને જતા ગરીબ પાસેથી પોલીસ રોકડા ગણી રહ્યો છે, અને પેસેન્જર જોઈ રહ્યાં છે. આ તસવીરમાં બદનસીબ છકડાનો ગરીબ ડ્રાઈવર અને જનતા બંન્ને છે. બાળ-બચ્ચાના પેટનો ખાડો પુરવા વધુ લોકોને પોતાના છકડામાં ન બેસાડે તો ખાય શું, જીવે શું. લોકોની પણ મજબૂરી જૂઓ છે, સરકારી વાહનની વ્યવસ્થા નથી અને છકડાવાળો પોતાને પરવડે તેમ મુસાફરી કરાવે છે. જનતા બિચારી તો બંન્ને બાજુથી પિસાય છે.
દ્રશ્યોમાં દેખાતા પોલીસ કોન્સ્ટેબલને સરકાર મારા અને તમારા ખિસ્સામાંથી ભરાયેલા ટેક્સમાંથી પગાર ચૂકવે છે. ગરીબ લોકો પોલીસના દંડાના સૌથી વધુ શિકાર બને છે. પોલીસના આવા કારનામાથી જનતા તેમને રક્ષક માની શકતી નથી.