અમરેલીની ધારી બેઠક પર ભાજપ અને કોંગ્રેસ બન્નેમાં આંતરિક વિવાદ ચાલી રહ્યો છે. તેવામાં ધારી બેઠક પરથી ભાજપ સમર્થક ભરત ટાંકના પત્ની ઉર્વીબેન ટાંકે ઉમેદવારી નોંધાવવાના છે. અપક્ષ તરીકે મહિલા ઉમેદવારે ફોર્મ ઉઠાવતા રાજકારણમાં ગરમાવો આવ્યો છે.
અમરેલી ધારી બેઠક પેટા ચૂંટણીનો મામલો
ધારી બેઠક માટે ઉર્વીબેન ટાંકે ઉમેદવારી ફોર્મ ઉપાડ્યું
ભાજપ સમર્થક ભરત ટાંકના પત્ની કરશે અપક્ષ ઉમેદવારી
અમરેલી ધારી વિધાનસભાની પેટાચૂંટણી જાહેર થઈ ગઈ છે. પરંતુ ભાજપ અને કોંગ્રેસે હજુ સુધી ઉમેદવાર સત્તાવાર જાહેર નથી કર્યા. ત્યારે અપક્ષ ઉમેદવાર તરીકે મહિલા મેદાનમાં આવવાની શક્યતાએ રાજકીય ગરમાવો આવ્યો છે. જોકે ઉર્વીબેન ટાંકને ભાજપ સમર્થક ગણવામાં આવે છે. ભૂતકાળમાં મુખ્યમંત્રી વિજય રૂપાણીની અધ્યક્ષતામાં ભરત ટાંકે કાર્યક્રમ યોજ્યો હતો.
આગામી 3 નવેમ્બરે ગુજરાતની 8 બેઠકો પર પેટાચૂંટણી યોજાવાની છે. જેમાં અમરેલીની ધારી બેઠક પર પણ પેટાચૂંટણી યોજાશે. ત્યારે આ બેઠક પર સનસાઈન ગ્લોબલ ફાઉન્ડેશનના ચેરમેન ઉર્વીબેન ટાંકે ઉમેદવારી ફોર્મ ઉપાડ્યું છે. ઉર્વી ભરતભાઈ ટાંક ધારી બેઠક પરથી અપક્ષ ઉમેદવારી કરવાના છે. જેને લઇને રાજકારણમાં ગરમાવો આવ્યો છે.
અત્રે ઉલ્લેખનીય છે કે, ધારી વિધાનસભાની પેટાચૂંટણી માટે અત્યાર સુધીમાં કુલ 16 જેટલા ફોર્મ ઉપાડ્યા છે. પરંતુ એક પણ ફોર્મ અત્યાર સુધી રજુ થયા નથી. ભાજપ અને કોંગ્રેસ બન્ને પેટાચૂંટણીમાં ઉમેદવારોના નામની જાહેરાતમાં વિલંબ કરી રહ્યા છે. જોકે ધારી બેઠક પર જે.વી.કાકડિયાએ પ્રચાર શરૂ કરી દીધો છે. તેઓ પોતાને ભાજપના ઉમેદવાર ગણાવી રહ્યા છે. તો કોંગ્રેસને હજુ સુધી યોગ્ય ઉમેદવાર નથી મળ્યો. જોકે કોંગ્રેસ આયાતી ઉમેદવાર ઉતારે તેવી સંભાવના છે. આયાતી ઉમેદવારની શકયતાને પગલે સ્થાનિક આગેવાનોમાં કચવાટ છે.