કોંગ્રેસના 8 ધારાસભ્યોએ રાજીનામાં આપી દેતા ખાલી પડેલી બેઠકો પર પેટાચૂંટણી યોજાઇ હતી. ત્યારે આજે (10 નવેમ્બર) આ પેટાચૂંટણીના પરિણામો આવી ચૂક્યા છે. જેમાં ભાજપને કોંગ્રેસ પાસેથી તમામ 8 બેઠકો આંચકી છે. જેને લઇને વિધાનસભામાં ભાજપના ધારાસભ્યોનું સંખ્યાબળ 111 પર પહોંચ્યું છે. ત્યારે 8 બેઠકોમાંની એક ધારી બેઠક જે કોંગ્રેસનો ગઢ ગણાતી હતી તેને પણ આંચકી લીધી છે. જોકે ભાજપે સૌરાષ્ટ્રની ત્રણેય બેઠકો જીતી છે. કોંગ્રેસે પોતાની હાર સ્વીકારી છે.
ભાજપે આઠેય બેઠકો કોંગ્રેસ પાસેથી આંચકી
કોંગ્રેસનો ગઢ ગણાતી ધારી બેઠક પર ભાજપની જીત
કોંગ્રેસમાંથી ભાજપમાં આવેલા જે.વી. કાકડિયા જીત્યા
સૌરાષ્ટ્રની ધારી બેઠક પર ભાજપ અને કોંગ્રેસના ઉમેદવાર વચ્ચે કાંટાની ટક્કર હતી. ધારીની બેઠક પર કોંગ્રેસે વર્ષો સુધી રાજ કર્યું છે, આ બેઠક કોંગ્રેસનો ગઢ ગણાતી હતી. પરંતુ હવે ચિત્ર બદલાયું છે. ભાજપે કોંગ્રેસના આ ગઢને ધ્વંસ કર્યો છે. કોંગ્રેસમાંથી ભાજપમાં આવેલા જે.વી. કાકડિયાને પ્રજાએ સ્વીકાર્યા છે. પક્ષપલટા બાદ પણ જે.વી. કાકડિયાની લોકચાહના યથાવત્ છે, જે પેટાચૂંટણીના પરિણામો દર્શાવી રહ્યા છે. કાકડિયાને 16,596ની લીડ છે. તો ધારીમા કોંગ્રેસના સુરેશ કોટડિયાની હાર થઈ છે.
ધારી બેઠક પર કાકડિયાની જીત સાથે જીતશે ધારી, જીતશે ભાજપના નારા લાગ્યા હતા. ભાજપના કાર્યકર્તાઓમાં ઉત્સાહ છવાયો છે. કાકડિયાની જીત પર કાર્યકર્તાઓએ જણાવ્યું હતું કે, જે.વી. કાકડિયા કોંગ્રેસમાં હતા તો પણ જીત્યા હતા અને હવે ભાજપમાં પણ જીત્યા છે. તેઓ વ્યક્તિગત રીતે કાર્યકર્તાઓ અને મતદારો સાથે જોડાયેલા છે. તેમની લોકચાહનાના કારણે તેમની જીત નક્કી જ હતી. તેઓ કોંગ્રેસમાં હતા તો પણ લોકોના કામ કર્યા હતા. જેથી એવું કહી શકાય કે ધારી બેઠક પર જનતાએ પક્ષપલટુ નેતાને જાકારો નથી આપ્યો, તેને સ્વીકાર્યા છે. કોંગ્રેસનો ગઢ ગણાતી ધારી બેઠક પર પણ કોંગ્રેસ ફાવ્યું નહીં.