ગુજરાતમાં ખાલી પડેલી બેઠકો પર પેટાચૂંટણી યોજાવા જઇ રહી છે. ત્યારે ચૂંટણીમાં ઉમેદવારી માટે 9 ઓક્ટોબરથી ઉમેદવારી માટે ફોર્મ ભરવાના શરૂ થઇ ગયા છે. તો ભાજપ અને કોંગ્રેસે પોતાના ઉમેદવારોની પસંદગી કરી લીધી છે. તેવામાં હવે કોંગ્રેસે ગઢડા બેઠક પર નક્કી કરેલા ઉમેદવારનો એક લેટર સોશિયલ મીડિયામાં વાયરલ થયો છે. આ પત્ર અંગે તેમણે VTV પર ખુલાસો પણ કર્યો છે.
ગુજરાત વિધાનસભા પેટાચૂંટણીને લઈને કોંગ્રેસે 5 ઉમેદવારોની કરી જાહેરાત: સૂત્ર
મોહન સોલંકીએ VTV સાથેની વાતચીતમાં લેટર અંગે કર્યો ખુલાસો
પેટાચૂંટણીને લઇને ભાજપ બાદ હવે કોંગ્રેસે પણ ઉમેદવારોની યાદી જાહેર કરી દીધી છે. ગુજરાતની 8માંથી 5 બેઠકો પર કોંગ્રેસે ઉમેદવાર નક્કી કરી નાખ્યા છે. જેમાં ગઢડાથી મોહન સોલંકી, અબડાસાથી શાંતિલાલ સેંઘાણી, ધારીથી સુરેશ કોટડિયા, મોરબીથી જેન્તી પટેલ અને કરજણ ધર્મેશ પટેલને ટિકિટ અપાઈ હોવાનુ સૂત્રો પાસેથી જાણવા મળી રહ્યું છે. તો લીંબડી, કપરાડા અને ડાંગ માટે ઉમેદવારોની યાદી જાહેર થવાની બાકી છે. તેવામાં હવે ગઢડા બેઠકના ઉમેદવાર મોહન સોલંકીનો નાદૂરસ્ત તબિયતને લઈને લેટર વાયરલ થયો છે. જેમાં તબિયત સારી ના હોવાથી ચૂંટણી નહીં લડવાની વાત થતી હોવાની વાત કરવામાં આવી છે. પત્રમાં મોહન સોલંકીએ અન્ય ઉમેદવારને ટિકિટ આપવાની વાત કરી છે.
VTVએ લેટર અંગે પૂછતાછ કરતા મોહન સોલંકીએ કર્યો ખુલાસો
ત્યારબાદ મોહન સોલંકીએ VTV સાથેની વાતચીતમાં આ વાયરલ પત્ર અંગે ખુલાસો કર્યો છે. જેમાં તેમણે કહ્યું કે, "મે અગાઉ લેટર લખ્યો હતો, લેટર મારો જ છે, પરંતુ પક્ષે મને જ લડવા માટે સુચન કર્યુ, હવે કોંગ્રેસે ટિકિટ ફાઈનલ કરતા હું જ લડીશ ચૂંટણી.
મહત્વનું છે કે કોંગ્રેસ અગાઉ ભાજપે પણ પોતાના 7 બેઠક પરના મહારથીઓને મેદાને ઉતાર્યા છે. ભાજપે આ ઉમેદવારોના સત્તાવાર નામ પણ જાહેર કર્યા છે.
અબડાસાઃ પ્રદ્યૂમનસિંહ જાડેજા
મોરબીઃ બ્રિજેશ મેરજા
ધારીઃ જે.વી.કાકડિયા
ગઢડાઃ આત્મારામ પરમાર
કરજણઃ અક્ષય પટેલ
ડાંગઃ વિજય પટેલ
કપરાડાઃ જીતુ ચૌધરી
ગુજરાત વિધાનસભાની પેટાચૂંટણીની તારીખ જાહેર
8 બેઠકો પર ગુજરાત વિધાનસભાની પેટાચૂંટણી 3 નવેમ્બરે યોજાશે. 9 ઓક્ટોબરથી ઉમેદવારી માટે ફોર્મ ભરી શકાશે. 16 ઓક્ટોબર ફોર્મ ભરવાની છેલ્લી તારીખ છે. તો 19 ઓક્ટોબર ફોર્મ ખેંચવાની છેલ્લી તારીખ છે. જ્યારે 3 નવેમ્બરે મતદાન થશે અને 10 નવેમ્બરે પરિણામ જાહેર થશે.
કઇ બેઠકો પર યોજાશે ચૂંટણી
રાજ્યમાં 8 બેઠક અબડાસા, લીંબડી, મોરબી, ધારી, ગઢડા, કરજણ, ડાંગ અને કપરાડા બેઠક પર મતદાન યોજાશે.