પેટાચૂંટણી / ગુજરાતની 8 બેઠકો પર મતદાન પૂર્ણ, 10 નવેમ્બરે પરિણામ, જાણો કેટલું મતદાન નોંધાયું

• રાજ્યની 8 બેઠક પરની પેટાચૂંટણીનું મતદાન પૂર્ણ
• ગુજરાત પેટાચૂંટણીમાં કુલ 58.14% મતદાન નોંધાયું
• 10 નવેમ્બરે પેટાચૂંટણીના પરિણામો જાહેર થશે

રાજ્યની 8 બેઠક પરની પેટાચૂંટણીનું મતદાન પૂર્ણ

પેટાચૂંટણીનું મતદાન પૂર્ણ થયું છે. ગુજરાત પેટાચૂંટણીમાં કુલ 58.14% મતદાન નોંધાયું છે. રાજ્યના તમામ 8 બેઠકો પર ઉમેદવારના ભાવી EVMમાં કેદ થયા છે. છેલ્લા કલાકોમાં પણ મતદારોમાં સામાન્ય ઉત્સાહ જોવા મળ્યો હતો. ગત વિધાનસભાની પેટા ચૂંટણી કરતા ઓછું મતદાન થયું છે. 10 નવેમ્બરે પેટાચૂંટણીના પરિણામો જાહેર થશે. ધારી, લીંબડી, મોરબી, અબડાસા, કરજણ, ગઢડા, ડાંગ અને કપરાડા વિધાનસભા બેઠક પર મતદાન પૂર્ણ થયું છે. 8 બેઠકો પર 3024 જેટલા મતદાન કેન્દ્રો પર મતદાન યોજાયું હતું. કુલ 81 ઉમેદવારોના ભાવી EVMમાં કેદ થયા છે. 419 માઈક્રો ઓબ્ઝર્વર અધિકારીઓ ફરજ આધીન રહ્યા. મતદાન પહેલા તમામ મતદાન કેન્દ્રો સેનેટાઇઝ કરાયા હતા.

મુખ્ય ચૂંટણી અધિકારી એસ.મુરલીક્રિષ્નનુ નિવેદન

એસ.મુરલીક્રિષ્ને કહ્યું કે, રાજ્યની 8 વિધાનસભા બેઠકો પર મતદાન પૂર્ણ થયું છે. ટીવી અને સોશિયલ મીડિયા મારફતે 19 ફરિયાદ મળી છે.  4 ઘટનામાં પોલીસે ગુના નોંધ્યા છે. જેમાં મોરબી 1, કરજણમાં 2 અને ડાંગમાં 1 પોલીસ ફરિયાદ નોંધાઇ છે. કોવિડના કોઈ દર્દી મતદાન કરવા આવ્યા નથી. 

ગુજરાત પેટાચૂંટણીમાં કુલ 58.14% મતદાન નોંધાયું

1. ધારી  45.74%
2. ગઢડા 47.86%
3. ડાંગ 74.71%
4. અબડાસા 61.31%
5. મોરબી 51.88%
6. લીંબડી 56.56%
7. કરજણ 69.96%
8. કપરાડા 67.34%

દિવસભરની ચૂંટણીની અપડેટ....

ધારી બેઠક પર ધીમીગતીએ મતદાન

રાજ્યમાં આજે વિધાસભાની 8 બેઠકો પર ચૂંટણી ચાલી રહી છે ત્યારે ત્યારે આ તરફ ધારી વિધાનસભાની પેટાચૂંટણીમાં નિરસ મતદાન થઇ રહ્યું છે. ધારીના ગ્રામ્ય વિસ્તારોમાં પણ ધીમીગતીએ મતદાન થઇ રહ્યું છે. ઉલ્લેખનીય છે કે, સરસીયા ગામે 4 બુથમાં માત્ર 40થી 45% મતદાન થયું છે. મતદાનની અંતિમ કલાકોમાં પણ મતદાન કરવામાં મતદારોની ઉદાસીનતા દાખવી રહ્યા છે.

મોરબીમાં CMના પત્ની ચાલુ મતદાને પ્રચાર કરતા હોવાનો કોંગ્રેસે લગાવ્યો આરોપ

મોરબી બેઠક પર હાલ ચાલી રહેલ પેટાચૂંટણીના મતદાનમાં મુખ્યમંત્રી વિજય રૂપાણીના પત્ની અંજલી રૂપાણી ચાલુ મતદાને પ્રચાર કરતો હોવાનો કોંગ્રેસ દ્વારા આરોપ લગાવામાં આવ્યો છે. કોંગ્રેસે ચૂંટણી પંચને CM રૂપાણીના પત્ની અંજલી રૂપાણી સામે કાર્યવાહીની માગ કરી છે. 

ભાજપ નેતાએ વ્યક્ત કરી ચિંતા 

8 બેઠકોમાંથી ધારીમાં સૌથી ઓછું મતદાન થતાં ભાજપ નેતા દિલીપ સંઘાણીએ વ્યક્ત કરી ચિંતા. કહ્યું ધારીમાં સૌથી ઓછું મતદાન એ ચિંતાની વાત, લોકશાહીના મહાપર્વમાં મતદાન થવુ જોઇએ. પરિણામ જે આવે તે પણ મતદાન વધુ થવુ જોઇએ.

કરજણના વાયરલ વીડિયો મામલે ફરિયાદ ન થયાનું ECનું નિવેદન

હાલમાં ચાલી રહેલ પેટાચૂંટણીમાં કરજણ બેઠકને લઇને રૂપિયા આપતા વાયરલ વીડિયો મામલે કોઇ ફરિયાદ કરવામાં ન આવી હોવાનું ચૂંટણી પંચે નિવેદન આપ્યું છે. જો કે કોંગ્રેસ પ્રવક્તા શૈલેષ અમીનનો EC થી વિરુદ્ધ દાવો છે.

કોંગ્રેસ પ્રવક્તા શૈલેષ અમીનનો ECથી વિરુદ્ધનો દાવો

શૈલેષ અમીને કહ્યું કે કોંગ્રેસ ECમાં ફરિયાદ કરી છે, છતાં કોઇ કાર્યવાહી કરવામાં આવી નથી. જેને લઇને ચૂંટણી અધિકારીને રજૂઆત કરવા ડેલિગેશન પહોંચ્યું છે. અમીને કહ્યું કે જો ચૂંટણી પંચ કાર્યવાહી નહીં કરે તો હાઇકોર્ટમાં જઇશું. શૈલેષ અમીન સહિતનું ડેલિગેશન રજૂઆત માટે પહોંચ્યું છે. 

પેટાચૂંટણી માટે મતદાન સમયે વીડિયો થયો વાયરલ

રાજ્યમાં ચાલી રહેલી પેટાચૂંટણીમાં મતદારોને આકર્ષવા નાણાં અપાતા હોવાના વાયરલ વીડિયોથી ચકચાર જોવા મળી છે. ભાજપને મત આપવા મતદારોને કહેવામાં આવી રહ્યું છે. કરજણ વિધાનસભાના આ વાયરલ વીડિયોને લઇને ચૂંટણી પંચે તપાસના આદેશ આપ્યાં છે. 



લીંબડીના ગેડી ગામે બોગસ મતદાનની ફરિયાદ

લીંબડી બેઠક પરની પેટાચૂંટણીમાં ગેડી ગામે બોગસ મતદાનની ફરિયાદ કરવામાં આવી છે. કોંગ્રેસે પ્રિસાઇડિંગ ઓફિસર અને ડેપ્યુટી કલેકટરને રજૂઆત કરવામાં આવી છે. જેમાં એક વ્યક્તિ 5થી વધુ વખત મત આપી રહ્યાં ફરિયાદ કરવામાં આવી છે. 

મુખ્યમંત્રી વિજય રૂપાણીનું પેટાચૂંટણી મુદ્દે ટ્વિટ

રાજ્યમાં ચાલી રહેલ 8 બેઠક પર પેટાચૂંટણીને લઇને રાજ્યના મુખ્યમંત્રી વિજય રૂપાણીએ ટ્વિટ કરી ભાજપ જીતશે તેવો વિશ્વાસ વ્યક્ત કર્યો. સીએમ રુપાણીએ કહ્યું કે 8 બેઠક પર ભાજપ જીતશે. સમર્પણ, સખત મહેનત, વિકાસ ભાજપને જીત અપાવશે.

ગુજરાત વિધાનસભાની પેટા ચૂંટણી માટે અત્યારે મતદાન થઈ રહ્યું છે, મારી તમામ મતદારોને અપીલ છે કે તેઓ લોકશાહીના આ પર્વને મોટી સંખ્યામાં મતદાન કરીને સફળ બનાવે.

મતદાન સોશિયલ ડિસ્ટન્સિંગ સાથે અને માસ્ક પહેરીને જ કરવા સર્વે મતદાતાઓને અપીલ કરું છું.

— Vijay Rupani (@vijayrupanibjp) November 3, 2020

વલસાડ-ડાંગના સાંસદ કે.સી.પટેલની VTV સાથે વાતચીત

વલસાડ-ડાંગના સાંસદ કે. સી. પટેલે VTV સાથેની વાતચીતમાં કપરાડા અને ડાંગના વિકાસ અંગે વાતચીત કરી. કે સી પટેલે કહ્યું કે અસ્ટોલ પાણી યોજના ઝડપથી પુરી કરાશે. ઇન્ટરનેટ બાબતે સરકારમાં રજૂઆત કરી છે. 

લીંબડી બેઠકના કોંગ્રેસ ઉમેદવારે જીતની આશા વ્યક્ત કરી

લીંબડી બેઠક પર કોંગ્રેસના ઉમેદવારે ચેતન ખાચરે VTV સાથે કરેલી વાતમાં જીતની આશા વ્યક્ત કરી છે. ચેતન ખાચરે કહ્યું કે 15 હજાર મતથી અમારી જીત નક્કી છે. લીંબડી વિકાસથી વંચિત છે. ભાજપે લીંબડી બેઠકોનો વિકાસ થવા દીધો નથી. જનતા ભાજપના એકહથ્થા શાસનને જાકારો આપશે.

કોળી સમુદાયના MLA કનુ પટેલ ભાજપની જીત નિશ્ચિત હોવાનું કહ્યું

હાલ લીંબડી બેઠક પર ભાજપના નેતાઓ પહોંચ્યાં છે. કોળી સમુદાયના MLA કનુ પટેલે VTV ન્યૂઝ સાથેની વાતચીતમાં ભાજપની જીત નિશ્ચિત હોવાનું જણાવ્યું. કોળી સમુદાયને ભાજપ પ્રત્યે ક્યારેય નારાજગી નથી. કોળી સમુદાય ભાજપ તરફી મતદાન કરશે. કોંગ્રેસના સ્ટ્રીંગ ઓપરેશનની મતદાન પર અસર નહીં પડે.

લીંબડી બેઠક પરના ભાજપ ઉમેદવારે જીતનો વિશ્વાસ વ્યક્ત કર્યો

લીંબડી બેઠક પર પેટાચૂંટણીનો જંગ જામ્યો છે. ત્યારે ભાજપના ઉમેદવારે કિરીટસિંહ રાણાએ મતદાન કર્યું. મતદાન બાદ VTV સાથે વાતચીતમાં જણાવ્યું કે ભાજપ આઠેય બેઠક પર જીતશે. કોંગ્રેસનું સ્ટીંગ ઓપરેશનની કોઇ અસર નહીં થાય. કોળી મતદારો પણ ભાજપની સાથે છે. મતદારો વિકાસના મુદ્દે મતદાન કરી રહ્યાં છે. 



ધારી બેઠક પર ભાજપના ઉમેદવારના પત્નીનું નિવેદન

ધારી બેઠક પર ભાજપના ઉમેદવાર જે. વી. કાકડિયાએ પરિવાર સાથે મતદાન કર્યું. જે. વી. કાકડિયાના પત્ની કોકિલાબેને મતદાન બાદ કહ્યું કે ચૂંટણી પ્રચારમાં લોકોનો અપાર પ્રેમ મળ્યો છે. જે. વી. કાકડિયાએ લોકોના હિત માટે રાજીનામું આપ્યું હતુ, વિસ્તારના વિકાસ માટે રાજીનામું આપ્યું, આ ચૂંટણીમાં અમારી જીત નક્કી છે. 

ગઢડા બેઠક પર ભાજપ કિશાન મોરચાના અધ્યક્ષે કર્યું મતદાન

ગઢડા બેઠક પરની પેટાચૂંટણીમાં ભાજપ કિશાન મોરચાના અધ્યક્ષ બાબુ જેબલીયાએ મતદાન કર્યું. ગઢડા એમ એમ હાઇસ્કૂલમાં મતદાન બાદ VTV સાથેની વાતચીતમાં મતદાતાઓને વહેલા મતદાન કરવા અપીલ કરી. જેબલીયાએ કહ્યું કે કેન્દ્ર અને રાજ્ય સરકારે ખેડૂતોને આર્થિક સહાય આપી. ગુજરાતનો ખેડૂત ભાજપ સાથે હતો અને છે. ભાજપ તમામ 8 બેઠકો જીતશે.
 

મોરબી બેઠક પેટાચૂંટણીને લઇને સાંસદ મોહન કુંડારિયાનું નિવેદન

મોરબી બેઠક પરની પેટાચૂંટણીને લઇને સાંસદ મોહન કુંડારિયાનું નિવેદન આવ્યું છે. સાંસદે ભાજપની જીતનો વિશ્વાસ વ્યક્ત કર્યો છે. કુંડારિયાએ કહ્યું ભાજપના ઉમેદવારની જીત નિશ્ચિત છે. 10 હજારથી વધુ મતની લીડથી ભાજપ જીતશે.


 

ડાંગ બેઠક પર કોંગ્રેસના ઉમેદવારે જીતનો વિશ્વાસ વ્યક્ત કર્યો

ડાંગ બેઠક યોજાઇ રહેલી પેટાચૂંટણીને લઇને કોંગ્રેસ ઉમેદવારે સૂર્યકાન્ત ગાવીતે જીતનો વિશ્વાસ વ્યક્ત કર્યો છે. ગાવીતે કહ્યું કે અમે 10 હજારથી વધુ મતથી જીતીશું. ડાંગના લોકો ઉપર ચૂંટણી થોપી દેવામાં આવી છે. ડાંગના લોકો કોંગ્રેસની સાથે હતા અને રહેશે.

જાણો મતદાન સમયે ક્યાં શું થયું...

• કપરાડામાં મોટી સંખ્યામાં મહિલાઓ મતદાન કરવા પહોંચી, પેટાચૂંટણીમાં દેખાયો ઉત્સાહનો માહોલ
• નલિયાના મતદાન મથક જોવા મળી રહ્યા છે ખાલીખમ
• ડાંગમાં જાહેરનામા ભંગ મામલે કોંગ્રેસની ફરિયાદ: ભાજપના પૂર્ણેશ મોદી સામે હેલ્પલાઈન પર કરાઈ ફરિયાદ
• કપરાડા વિધાનસભા પેટાચૂંટણીમાં વાપી તાલુકાના કોચરવા ગામે એક બૂથ પર EVM બગડતાં તંત્ર દોડતું થયું
• મોરબીના માળિયાના ન્યૂ નવલખીમાં અલગ ગ્રામ પંચાયતની માગ સાથે મતદાનનો બહિષ્કાર
• મોરબી બોયઝ હાઇસ્કૂલમાં ભાજપની પત્રિકા વહેંચતા કોંગ્રેસના કાર્યકર્તાઓને મતદાન કરાવ્યું બંધ
• લીંબડીના ગેડી ગામે બોગસ મતદાનની ફરિયાદ
• મોરબીના માળિયાના ન્યૂ નવલખીમાં મતદાનનો બહિષ્કાર
• ભાજપના સાંસદ વિનોદ ચાવડાએ અબડાસામાં મતદાન કર્યું
• મોરબીના ગ્રામ્ય વિસ્તાર બાદ શહેરી વિસ્તારોમાં પણ મતદારોમાં ઉત્સાહ
• કરજણની પેટાચૂંટણી પહેલા પોલીસે 57 હજાર રોકડા સાથે 3ની કરી ધરપકડ
• ગઢડા પેટાચૂંટણીમાં સ્વામિનારાયણ સંતોએ સામુહિક મતદાન કર્યુ 
• કપરાડાથી કોંગ્રેસના ઉમેદવાર બાબુભાઇ વરઠાએ મતદાન કર્યું 
• કપરાડા બેઠક પર અપક્ષ ઉમેદવાર પ્રકાશ પટેલે મતદાન કર્યુ
• અબડાસા બેઠક પર કોટડા ગામે સવારથી મતદાન માટે લાગી લાંબી લાઇન
• કપરાડા વિધાનસભા બેઠકના કોંગ્રેસના ઉમેદવાર બાબુભાઈ વરઠા એ  મતદાન કર્યું
• ધારી બેઠક પર ભાજપના ઉમેદવાર જે.વી.કાકડિયાએ પરિવાર સાથે મતદાન કર્યું
• લીંબડી બેઠક પર કોંગ્રેસના ઉમેદવાર ચેતન ખાચરે મતદાન કર્યું
• મોરબી ભાજપના ઉમેદવાર બ્રિજેશ મેરજાએ પરિવાર સાથે મતદાન કર્યુ
• મોરબીના કોંગ્રેસ ઉમેદવાર જયંતિ પટેલે બોયઝ હાઇસ્કૂલ ખાતે મતદાન કર્યું
• ભાજપ કિશાન મોરચાના અધ્યક્ષ બાબુ જેબલીયાએ  મતદાન કર્યું
• ધારી બેઠકના કુબડા મતદાન કેન્દ્ર પર મતદારોને મોબાઇલ સાથે ન લઇ જવા દેવાતા વિવાદ
• કપરાડા બેઠકના ભાજપના ઉમેદવાર જીતુ ચૌધરીએ જીતનો વિશ્વાસ વ્યક્ત કર્યો
• ગઢડાની એમ.એમ. હાઇસ્કૂલમાં બુથ નંબર 203માં EVM ખોટકાયું, ટેકનિકલ સ્ટાફે હાથ ધરી કામગીરી
• કપરાડા બેઠક પર મતદાન મથક પર મોટી સંખ્યામાં મહિલાઓ પહોંચી
• લીંબડી બેઠક પર સવારથી મતદારો મતદાન કરવા ઉમટયા
• કપરાડા બેઠક પર 45 મત પડ્યા બાદ EVM મશીન ખોટકાયું

આજે 3 નવેમ્બરના રોજ રાજ્યની 8 વિધાનસભા બેઠક પર પેટાચૂંટણીને લઇને મતદાન ચાલુ થયું છે. આ બેઠકમાં ધારી, લીંબડી, મોરબી, અબડાસા, કરજણ, ગઢડા, ડાંગ, કપરાડા વિધાનસભા બેઠક પર પેટાચૂંટણી યોજાઇ રહી છે. આ બેઠકો પર સવારે 7 વાગ્યાથી સાંજે 6 વાગ્યા સુધી મતદાન થશે. 

ગુજરાતમાં પ્રથમ વખત કોવિડના નિયમો હેઠળ મતદાન

આપને જણાવી દઈએ કે, ગુજરાતમાં પ્રથમ વખત કોવિડના નિયમો હેઠળ મતદાન થઇ રહ્યું છે. મતદાન પહેલા તમામ મતદાન કેન્દ્રો સેનેટાઇઝ કરવામાં આવ્યા છે.  સ્વાસ્થ્ય વિભાગ દ્વારા ચૂંટણી સ્ટાફ માટે 41 હજાર N95 માસ્ક, 82 હજાર ડિસ્પોઝેબલ માસ્ક અને 41 હજાર ફેસશીલ્ડની વ્યવસ્થા કરવામાં આવી છે. કોરોનાને લઈને 3400 થર્મલ ગનની વ્યવસ્થા કરવામાં આવી છે. આ સાથે મતદારો માટે 21 લાખ ગ્લવ્ઝ ચૂંટણી આયોગને સોંપ્યા છે. માસ્ક ન પહેરીને આવનારા લોકો માટે પોલીસને 3 લાખ માસ્કનું વિતરણ કરાયું છે. કોરોના સંક્રમિત અથવા શંકાસ્પદ મતદારો માટે 8 હજાર PPE કિટ પણ આયોગે ઉપલબ્ધ કરાવી છે.

ભાજપ અને કોંગ્રેસના પેટાચૂંટણીના ઉમેદવારોની યાદી

બેઠક	ભાજપના ઉમેદવાર	કોંગ્રેસના ઉમેદવાર
અબડાસા	પ્રદ્યુમનસિંહ જાડેજા	ડૉ.શાંતિલાલ સંઘાણી
મોરબી	બ્રિજેશ મેરજા	જયંતીલાલ પટેલ
ધારી	જે.વી. કાકડિયા	સુરેશ કોટડિયા
કરજણ	અક્ષય પટેલ	કિરીટસિંહ જાડેજા
ગઢડા	આત્મરામ પરમાર	મોહનલાલ સોલંકી
કપરાડા	જિતુ ચૌધરી	બાબુભાઈ વરઠા
ડાંગ	વિજય પટેલ	સૂર્યકાંત ગામિત
લીંબડી	કિરીટસિંહ રાણા	ચેતન ખાચર

આ 8 બેઠકો પર મતદાન

ગુજરાત વિધાનસભાની પેટાચૂંટણી રાજ્યની અબડાસા, લીંબડી, મોરબી, ધારી, ગઢડા, કરજણ, ડાંગ અને કપરાડા કુલ 8 બેઠક મતદાન થઇ રહ્યું છે.જેનું પરિણામ 10 નવેમ્બરે  જાહેર થશે.

8 MLAએ રાજીનામાં આપતા પેટાચૂંટણી

8 બેઠકો પર ધારાસભ્યોએ રાજીનામાં આપતા પેટાચૂંટણી યોજાવા જઇ રહી છે. જેમાં અબડાસાથી પ્રદ્યુમનસિંહ જાડેજા, મોરબીથીબ્રિજેશ મેરજા, કપરાડાથી અક્ષય પટેલ, ગઢડાથી પ્રવીણ મારૂ, ધારીથી જે.વી કાકડીયા, કપરાડાથી જિતુ ચૌધરી, ડાંગથી મંગળ ગાવિત અને લીંબડીથી સોમા પટેલનું રાજીનામું આપ્યું હતું. આ ધારાસભ્યોના રાજીનામાના કારણે 20 સપ્ટેમ્બરે ચૂંટણી પંચે આ બેઠકો પર પેટાચૂંટણીની જાહેરાત કરી હતી.