ગુજરાતની વિધાનસભાની 8 બેઠકો પર પેટાચૂંટણી માટે આજે મતદાન થઈ રહ્યું છે. જેના પગલે વડોદરાની કરજણ બેઠક પર એવો વીડિયો વાયરલ થયો જેના પગલે ચૂંટણી પંચ દોડતું થઈ ગયું હતું.
વડોદરાની કરજણ બેઠક પર મતદાન સમયે એક એવો વીડિયો વાયરલ થયો હતો જેમાં પૈસા આપીને મતની ખરીદી કરતા હોવાનો આરોપ લાગી રહ્યો છે. મતદારોને આકર્ષવા માટે પૈસા અપાઈ રહ્યું છે તેવું વીડિયોમાં જણાવાઈ રહ્યું છે. જો કે આ વીડિયોની VTV પુષ્ટિ કરતું નથી. આજે સવારે જ જ્યારે મતદાન શરૂ થયુ તેના ગણતરીના કલાકો બાદ આ વીડિયો સોશ્યલ મીડિયા પર વાયરલ થયો હતો. આ વીડિયોમાં દેખાઈ રહ્યું છે કે 100-100 રૂપિયા અપાઈ રહ્યાં છે અને દાવો કરાઈ રહ્યો છે કે મત આપવા માટે પૈસા અપાઈ રહ્યાં છે.
વધુ એક વીડિયો કરજણથી જ થયો વાયરલ
સવારે જ્યારે પહેલેથી જ એક આ પ્રકારનો વીડિયો વાયરલ થવાથી વિવાદ ઊભો થઈ ગયો હતો ત્યા બપોરે ફરી એક વીડિયો વાયરલ થયો હતો. બીજા વીડિયોમાં પણ પૈસા દ્વારા મત ખરીદાઈ રહ્યાં છે તેવો વીડિયો વાયરલ થયો હતો.
ચૂંટણી પંચ હરકતમાં
આ વીડિયો વાયરલ થતાં જ વિવાદ ઊભો થયો હતો અને ચૂંટણી પંચ હરકતમાં આવી ગયું હતું. ચૂંટણી પંચે આ મામલે તાબડતોડ પત્રકાર પરિષદ યોજી હતી.
મુખ્ય ચૂંટણી અધિકારી એસ.મુરલીક્રિષ્નને પ્રેસ કોન્ફરન્સ કરીને કહ્યું હતું કે કરજણ મામલે હજુ કોઈ લેખિત ફરિયાદ મળી નથી. પરંતુ 2 વીડિયો અમારા ધ્યાને આવ્યા છે અને વિગતવાર રિપોર્ટ આવવાનો બાકી છે. જો કે મોરબીમાં વીડિયો મુદ્દે ફરિયાદ મળી છે અને વીડિયો મુદ્દે તપાસના આદેશ અપાયા છે. આ મામલે તપાસ કરવા DEO અને પોલીસને તપાસ માટે સૂચના આપી છે તેમ ચૂંટણી પંચે જણાવ્યું હતું.
જ્યારે કોંગ્રેસે કહ્યું કે ECમાં ફરિયાદ કરી છે
કરજણના વાયરલ વીડિયો મામલે કોંગ્રેસ પણ હરકતમાં આવી હતી. કોંગ્રેસે ECથી વિપરિત નિવેનદ આપ્યું હતું અને કહ્યું હતું કે તેમણે ECમાં આ મામલે ફરિયાદ નોંધાવી છે. કોંગ્રેસ પ્રવક્તા શૈલેષ અમીને જણાવ્યું હતું કે અમે ચૂંટણી પંચમાં આ મામલે ફરિયાદ કરી છે છતાં કોઈ કાર્યવાહી હજુ સુધી કરાઈ નથી. કોંગ્રેસે કહ્યું હતું કે જો EC કાર્યવાહી નહીં કરે તો હાઇકોર્ટ જશું. આ મામલે શૈલેષ અમીન સહિતનું ડેલિગેશન ECને રજૂઆત કરવા માટે પણ પહોંચ્યું હતું.
બીજી બાજુ લીંબડી બેઠકના ગેડી ગામમાં બોગસ મતદાન અંગે પણ મુરલીક્રિષ્નનને નિવેદન આપ્યું હતું. તેમણે કહ્યું હતું કે આ મામલે કલેક્ટરને તપાસ માટે સૂચના આપી દેવાઈ છે.
કચ્છમાં અબડાસા બેઠક પર પણ ધમાલ
ક્ચ્છના અબડાસાની પેટાચૂંટણીના મતદાન સમયે વાંકુ ગામમાં ભાજપના પોલિંગ બુથ એજન્ટ સામે ફરિયાદ દાખલ કરવામાં આવી હતી. આ દરમ્યાન પોલિંગ બુથ એજન્ટ પર દારૂ પીને ધમાલ કરવાના આરોપ સાથે ક્ચ્છ જિલ્લા કોંગ્રેસ દ્વારા કરાઈ લેખિત ફરિયાદ પણ નોંધવામાં આવી હતી.