બિઝનેસ / EXCLUSIVE : મહારાષ્ટ્રની જેમ ગુજરાતમાં પણ સ્ટેમ્પડ્યૂટીમાં ઘટાડો કરવા બિલ્ડરોની માંગ

ક્રેડાઇના નેશનલ ચેરમેને જણાવ્યું હતું કે, "અમે વખતોવખત રાજ્ય સરકારોને સ્ટેમ્પડ્યૂટીના દરમાં ઘટાડો કરવા માટે રજૂઆત કરીએ છીએ કારણ કે જ્યારે જ્યારે સ્ટેમ્પ ડ્યૂટીના દરમાં ઘટાડો થયો છે ત્યારે વાસ્તવિક રીતે તો રાજ્ય સરકારની આવકમાં વધારો થયો છે. સ્ટેમ્પ ડ્યૂટીમાં ઘટાડો થવાથી રિયલ એસ્ટેટ ઉદ્યોગને વેગ મળશે અને સરવાળે સમગ્ર અર્થતંત્રમાં વૃદ્ધિ જોવા મળશે."

ગુજરાતમાં હાલમાં 4.9 ટકા સ્ટેમ્પડ્યૂટી દર છે અને એક ટકો રજિસ્ટ્રેશન ચાર્જ લેવામાં આવે છે એટલે કે દસ્તાવેજ કરતી વખતે કુલ 5.9 ટકા સ્ટેમ્પ ડ્યૂટી અને રજિસ્ટ્રેશન ખર્ચ ચૂકવવો પડે છે. ડેવલપરો આ દરને એક વર્ષ સુધી ત્રણ ટકા કરવા માટે માંગ કરી રહ્યા છે.

ક્રેડાઇ-ગાહેડના પ્રમુખે જણાવ્યું હતું કે, "રાજ્ય સરકારે તાજેતરમાં જ રિયલ એસ્ટેટને વેગ આપતા અનેક પ્રોત્સાહનો જાહેર કર્યાં છે પરંતુ જો સ્ટેમ્પ ડ્યૂટીમાં ઘટાડો કરવામાં આવશે તો તેનાથી ગ્રાહકોને ઘણો લાભ થશે. અનેક વખત એવું બનતું હોય છે કે એફોર્ડેબલ હાઉસિંગમાં મકાન ખરીદતા ગ્રાહકો પાસે છેલ્લે દસ્તાવેજ કરવાના નાણાં પણ હોતા નથી તેથી જો સ્ટેમ્પડ્યૂટી ઘટશે તો આવા બાકી રહેલા અનેક દસ્તાવેજ થશે અને સરકારની આવક પણ વધશે અને રિયલ એસ્ટેટ ઉદ્યોગને પણ વેગ મળશે. રિયલ એસ્ટેટ સાથે અન્ય 280 જેટલા ઉદ્યોગો સંકળાયેલા છે તેમને પણ મદદ મળશે."

પરાગ દવે, અમદાવાદ