આજે નીતિન પટેલ ગુજરાત માટે નવમી વખત બજેટ રજૂ કર્યું હતું જેમાં રાજ્ય સરકારના 2021-22ના બજેટમાં આરોગ્ય વિભાગ માટે 11323 કરોડની જોગવાઇ કરી હોવાની વાત કરી હતી.
આરોગ્ય વિભાગ માટે 11323 કરોડ
અમદાવાદ નવી સિવિલની સુવિધાઓ અપગ્રેડેશન માટે 87 કરોડ
કેન્દ્ર સરકારના સહયોગથી ગોધરા-મોરબીમાં બનશે નવી મેડિકલ કોલેજ
નાણામંત્રીએ જણાવ્યું હતું કે, આરોગ્ય વિભાગના બજેટ અંતર્ગત અમદાવાદ નવી સિવિલની સુવિધાઓ અપગ્રેડેશન માટે 87 કરોડની ફાળવણી કરવામાં આવી છે. આ સાથે જ PM માતૃવંદના યોજના માટે 66 કરોડની ફાળવણી કરાઇ છે.
ગોધરા-મોરબીમાં નવી મેડિકલ કોલેજ આકાર પામશે
નીતિન પટેલે વધુમાં જણાવ્યું હતું કે, કેંન્દ્ર સરકારના સહયોગથી ગોધરા-મોરબીમાં નવી મેડિકલ કોલેજ આકાર પામશે. જેના માટે 50 કરોડ રૂપિયાની ફાળવણી કરવામાં આવી છે.
PM જન આરોગ્ય અને CM માં-વાત્સલ્ય યોજના માટે 1106 કરોડ રૂપિયા રાજ્ય સરકારના 2021-22ના બજેટમાં ફાળવવામાં આવ્યા છે.
નવી 150 એમ્બ્યુલન્સ માટે 30 કરોડ ફાળવાયા
વહેલા જન્મતા બાળકોની સારવાર માટે 145 કરોડ રૂપિયાની ફાળવણીની જાહેરાત નીતિન પટેલે બજેટમાં કરી હતી. આ સાથે જ 108 એમ્બ્યુલન્સ સર્વિસમાં વધુ નવી 150 એમ્બ્યુલન્સ ઉમેરાશે તેવી જાહેરાત કરી હતી. તો નવી 150 એમ્બ્યુલન્સ માટે 30 કરોડની જોગવાઇ કરવામાં આવી હોવાનો ઉલ્લેખ કરેલ.
સુરતની જનતાને ખુશખબર આપતા નાણામંત્રીએ કહ્યું હતું કે, કિડની હોસ્પિટલને અદ્યતન બનાવવા 25 કરોડની ફાળવણી કરવામાં આવી છે આ સાથે જ વધુ 9 જિલ્લામાં મેડિકલ વેક્સિન સ્ટોર માટે 3 કરોડ ફાળવવામાં આવ્યા છે. તો રાજ્યની 20 સિવિલ હોસ્પિટલોમાં આર્યુવેદિક પદ્ધતિથી પંચકર્મ સારવાર અપાશે
બજેટ રજૂ કરતાં પહેલા કોરોનાકાળમાં સરકારે કરેલા કામોના કર્યા વખાણ
ગુજરાતના બજેટને રજૂ કરતાં પહેલા નીતિન પટેલે આજે કોરોનાકાળમાંઆ ગુજરાત સરકારે કરેલા કામ ગણાવ્યા હતા. નીતિન પટેલે કહ્યું કે રાજ્યના બધા જ જિલ્લાઑમાં વ્યવસથા ઊભી કરવામાં આવી. તેમણે કહ્યું કે કેટલાક રાજ્યોમાં તંબુઑ બાંધવા પડ્યા અને સ્ટેડિયમમાં દર્દીઑ રાખવા પડ્યા હતા પરંતુ ગુજરાતમાં ખૂબ મોટી વ્યવસ્થા ઊભી કરવામાં આવી અને તે બદલ વિજય રૂપાણીનો આભાર માનું છું. આવું સુંદર આયોજન આખા ભારતમાં માત્ર ગુજરાતમાં થયું છે. નીતિન પટેલે કહ્યું કે વડાપ્રધાન મોદીએ સતત માર્ગદર્શન આપ્યું હતું અને તેમાં તેમણે આયુર્વેદિક દવાઓ પર ભાર મૂક્યો હતો અને તે માટે અમે કરોડો લોકોને ઇમ્યુનિટી માટે પડીકી અને ઉકાળા આપ્યા.
ઇતિહાસનું સૌથી મોટું બજેટ
નાણામંત્રી નીતિન પટેલે 2021-22નું રજૂ કર્યું છે તે ઇતિહાસનું સૌથી મોટું બજેટ છે. નીતિન પટેલે કુલ 2 લાખ 27 હજાર 29 કરોડનું બજેટ રજૂ કર્યું છે જેમાં કૃષિ વિભાગ માટે 27 હજાર 232 કરોડ અને શિક્ષણ વિભાગ માટે 32 હજાર 719 કરોડની જોગવાઈ કરવામાં આવી છે. સાથે આરોગ્ય અને પરિવાર કલ્યાણ માટે 11 હજાર 323 કરોડ તથા મહિલા અને બાળ વિકાસ વિભાગ માટે 3 હજાર 511 કરોડ ની જોગવાઈ કરવામાં આવી છે.