ચૂંટણીનો માહોલ / UPનો ગઢ જીતવા ગુજરાત ભાજપની સેના તૈયાર, આ મોટા ગજાના નેતાઓ ટીમ સાથે 16 ડિસેમ્બરથી ઉત્તરપ્રદેશ ભણી

• ઉત્તરપ્રદેશની ચૂંટણીમાં ગુજરાત ભાજપના નેતાઓ કરશે ચૂંટણી પ્રચાર
• ગુજરાત ભાજપના નેતાઓને જવાબદારી 
• 71 વિધાનસભા બેઠકોની અને 11 જિલ્લામાં ઉતરશે ટીમો

2022માં પંજાબ અને યુપી સહિત પાંચ રાજ્યોની વિધાનસભાની ચૂંટણી યોજાવાની છે. ભાજપે યુપી જીતવા માટે અત્યારથી કમર કસી છે. પ્રધાનમંત્રી મોદી પણ UP પર ખાસ ભાર આપી રહ્યા છે. અત્યારથી રેલીઑ અને વિકાસ કાર્યોના એક બાદ એક લોકાર્પણ અને ખાતમુહૂર્ત કરવામાં આવી રહ્યા છે. આગામી સમયમાં PM મોદી મોટી ચૂંટણી રેલીને સંબોધિત કરી શકે છે. ત્યારે ગુજરાત ભાજપના મોટા નેતાઓ અને જિલ્લા વાઈઝ ટીમોને ઉત્તર પ્રદેશમાં પ્રચારની જવાબદારી અત્યારથી જ સોંપવામાં આવી છે. 16 ડિસેમ્બરે તમામ નેતાઓ ઉત્તર પ્રદેશમાં 11 જિલ્લામાં પ્રચાર કરવા ફોજ ઉતારશે.

ગુજરાતના 168 કાર્યકરો યુપી વિધાનસભા ચૂંટણી પ્રચારમાં જશે
ગુજરાત ભાજપના પ્રવક્તા મહેશ કસવાલાએ ઉત્તર પ્રદેશ ચૂંટણીમાં ગુજરાત ભાજપના રોલને લઈને પ્રકાશ પાડ્યો હતો. તેમણે કહ્યું છે કે UPની ચૂંટણીમાં ગુજરાત ભાજપના નેતાઓને  જવાબદારી સોંપવામાં આવી છે. 11 જિલ્લાની 71 વિધાનસભા બેઠકોમાં પ્લાનિંગ અને પ્રચારની જવાબદારી ગુજરાતના 168 કાર્યકરોને સોંપવામાં આવી છે જે અર્થે 16 ડિસેમ્બરે તમામ નેતાઓ યુપી જવા રવાના થશે.જેમાં કે.સી.પટેલ, શબ્દશરણ બહ્મભટ્ટ, જનક બગદાણા, રમણલાલ વોરા, રામ મોકરિયા, મયંક નાયક જેવા ગુજરાત ભાજપના મોટા નેતાઓ યુપી પ્રવાસ ભાની જશે. જેમાં અવધ, ગોડા, રાયબરેલી, સીતાપુર, બલરામપુર, લખનઉ સહિત 11 જિલ્લામાં જઈ પ્રચાર કામગીરીને વેગવંતી બનાવશે.

રાજકોટ ટિમ ભાજપ આવતી કાલે જશે UP
ઉત્તરપ્રદેશમાં ગુજરાત ભાજપના અગ્રણીઓ-કાર્યકરોને UPની જવાબદારી શિરે આપવામાં આવતા રાજકોટ ભાજપ ટિમ આવતીકાલે ઉત્તર પ્રદેશ જવા નીકળશે. સાંસદ રામભાઈ મોકરીયા સહીત 5 અગ્રણીઓ જેવા કે ધનસુખ ભંડેરી, ઉદય કાનગડ, કશ્યપ શુક્લ, જયમીન ઠાકર પોતાના કાર્યકરોની ટીમ સહિત યુપીના જિલ્લાઓમાં ધામા નાખશે. મહત્વનું છે કે ચૂંટણી પંચના સૂત્રોના જણાવ્યાનુસાર જાન્યુઆરી 2022 માં પાંચ રાજ્યોની વિધાનસભાની ચૂંટણીની જાહેરાત થઈ શકે છે, ફેબ્રુઆરી અને માર્ચ મહિનામાં મતદાન અને મતગણતરીની તારીખ જાહેર થઈ શકે છે. ચૂંટણી પ્રક્રિયાની શરુઆત જાન્યુઆરી મહિનામાં શરુ થઈ શકે છે.