પ્રતિક્રિયા / મધુ શ્રીવાસ્તવના દીકરાએ અપક્ષમાંથી ઉમેદવારી નોંધાવતા ભાજપના પ્રદેશ પ્રમુખ સી.આર. પાટીલે જાણો શું કહ્યું...

• ભાજપના ધારાસભ્ય મધુ શ્રીવાસ્તવના પુત્રએ અપક્ષમાંથી નોંધાવી ઉમેદવારી
• ભાજપના સગાવાદ અંગેના નિયમને લઇને ટિકિટ કપાઇ હતી
• મધુ શ્રીવાસ્તવ સામે કોઇ શિસ્તના પગલાં લેવાની વાત નથીઃ સી.આર. પાટીલ

ભાજપે વડોદરા મહાનગરપાલિકા માટે ઉમેદવારોની યાદી જાહેર કરતાની સાથે જ હોબાળો મચ્યો હતો. ભાજપે બનાવેલા નવા નિયમ અનુસાર, 60થી વધુ ઉંમર અને ધારાસભ્ય-સાંસદોના સગાને ટિકિટ ન આપવી. જે હેઠળ વાઘોડિયાના ભાજપના ધારાસભ્ય મધુ શ્રીવાસ્તવના દીકરા દીપક શ્રીવાસ્તવની ટિકિટ કપાઇ હતી. જેને લઇને દીપક શ્રીવાસ્તવે પક્ષ સામે બળવો કર્યો છે. ભાજપે ટિકિટ ન આપતા દીપક શ્રીવાસ્તવે વડોદરા શહેરના વોર્ડ નં-15માંથી અપક્ષ ઉમેદવારી નોંધાવી છે. દીપક શ્રીવાસ્તવે બળવો કરતા રાજકારણમાં ગરમાવો આવી ગયો છે. આ મામલે ગુજરાત ભાજપના પ્રદેશ પ્રમુખ સી.આર. પાટીલે નિવેદન આપ્યુ હતું.

મધુ શ્રીવાસ્તવ સામે કોઈ કાર્યવાહી નહી: સી.આર.પાટીલ

દીપક શ્રીવાસ્તવે અપક્ષમાંથી ઉમેદવારી નોંધાવવા મામલે ભાજપ પ્રદેશ પ્રમુખ સી.આર. પાટીલે કહ્યું કે, 576 ઉમેદવારો વચ્ચે કોઇ આવી ઘટના બને. મધુ શ્રીવાસ્તવ સામે કોઈ શિસ્તના પગલાં લેવાની વાત નથી. મધુ શ્રીવાસ્તવે ફોર્મ ભર્યું હોય તો પગલાં લેવામાં આવતા. તેમના દીકરાએ ફોર્મ ભર્યું તે શિસ્તભંગમાં આવતું નથી. ભાજપે મુકેલ નિયમ અંગે ભાજપ મક્કમ છે.

કોંગ્રેસે ટિકિટ આપવાનું કહ્યું પણ દીપક ભાજપ અથવા અપક્ષમાંથી લડશેઃ મધુ શ્રીવાસ્તવ

તો દીકરાએ ઉમેદવારી નોંધાવતા પહેલા ધારાસભ્ય મધુ શ્રીવાસ્તવે જણાવ્યું હતું કે, ગુજરાતમાં ઘણા એવા નેતાઓ છે, જેમનાં સગાંને ભાજપે ટિકિટ આપી છે. ભાજપે સાંસદના ભત્રીજાને ટિકિટ આપી છે. ભાજપમાં 50 ટકા ટિકિટો એવા લોકોને આપવામાં આવી છે, જેમાં સગાવાદ અને જાતિવાદ જોવા મળશે. લોકશાહીમાં પાર્ટી નહીં પણ વ્યક્તિ મહત્વનો હોય છે. મારો પુત્ર 10 વર્ષથી વડોદરા શહેરમાં કોર્પોરેટર છે. 60 વર્ષથી વધુની ઉંમર હોય અને ત્રણ ટર્મ થઇ ગઇ હોય તો બરાબર છે. મારો પુત્ર યંગ છે તેમ છતાં સગાવાદના નામે ખોટા બહાના કરીને ટિકિટ કાપી એનું દુઃખ છે. જોકે દીપકને કોંગ્રેસે ટિકિટ આપવાનું કહ્યું છે, છતા તેમાંથી તે નહીં લડે, તે ભાજપમાંથી કે અપક્ષમાંથી ફોર્મ ભરશે. તે અપક્ષમાંથી જીતશે એ નક્કી છે. આ પહેલાં પણ મધુ શ્રીવાસ્તવે નારાજગી દર્શાવતાં જણાવ્યું હતું કે ઘણી પાર્ટીઓ છે, એક જ પાર્ટી પર છાપ મારી નથી. હું ભાજપનો ધારાસભ્ય છું, અમે ભાજપને વફાદાર છીએ. ચૂંટાયા પછી પણ અમે ભાજપ સાથે જ રહેવાના છીએ.